DÍLI----Primeiru-Ministru (PM) Taur Matan Ruak hateten katak esforsu sira ne’ebé Governu halo hodi prevene Covid-19 hanesan medida restrisaun, suspensaun no obrigatóriu kumpre regra Estadu Esmerjénsia (EE) ne’e atu nune’e sidadaun ida labele mate iha Timor-Leste.

“Esforsu sira ne’ebé ita halo para evita ema labele mate, sira ne'ebé infetadu labele mate, maibé mós sira labele kontajia ba sira-nia família sira no ba komunidade,” nia hato’o lia hirak ne’e ohin (07/01), hafoin hasoru malu ho Prezidente Repúblika Francisco Guterres Lú Olo iha Palásiu Prezidensiál Ai-Tarak Laran, Dili.

Tanba ne’e Xefe Governu husu atu inan-aman no populasaun tomak tenke koopera hodi kumpre regra sira ne’ebé Governu implementa ona iha EE ne’e hodi evita kontájiu Covid-19 iha Timor-Leste. Entretantu, Iha Reunianun Konsellu Ministru ohin (08/01) Ministra Saúde, Odete Maria Freitas Belo no Diretora-Jerál ba Prestasaun Servisu Saúde, Odete Viegas, halo ona aprezentasaun ida kona-ba planu introdusaun vasina COVID-19 iha Timor-Leste.

Aprezentasaun ne’e konta mós ho intervensaun husi Reprezentante husi Organizasaun Mundiál Saúde (OMS) iha Timor-Leste, Rajesh Pandav. Durante iha aprezentasaun, esplika ona kona-ba vasina saida maka eziste no vasina saida mak adekuadu liu ba kontestu nasionál, liuliu husi nesesidade sira ba armazenamentu ne’ebé eziste ona iha País.

Aprezenta ona mós prioridade sira ba kurtu-prazu ba estabelesimentu husi mekanizmu nesesáriu sira ba planeamentu no koordenasaun ba implementasaun efikás vasina nian no ba identifikasaun husi grupu-alvu prioritáriu. Sei konstitui ekipa téknika interministeriál ida ne’ebé sei responsavel ba elaborasaun planu vasinasaun kontra COVID-19 iha Timor-Leste. (BT)