DÍLI----Camara Comercio Indústria Timor-Leste (CCI-TL-sigla Portugés) apelu, ba emprezariu nasional sira ne’ebé hetan fiar husi governu hodi implementa programa “Cesta Bazika” tenke kumpre regras no proseimentu sira ne’ebé iha nune’e benefisiariu sira bele benefisia ba programa governu nian ne’e.

Prezidente CCI-TL-sigla portugés Oscar Lima, husu ba emprezarius sira ne’ebe responsavel ba pakote distribuisaun programa “Cesta bázika” tenke kumpri regras iha prosesu distribuisaun. “Kuandu lori sasán mak la to’o ha’u husu ba emprezariu sira kuidadu. Tanba agora ita iha CAC serteza sei buka tuir ita hotu ne’ebé ha’u hanoin tenke halo detallu, emprezariu sira mós labele nakar, ami mós labele nakar no ami tenke fó kontribuisaun para governu bele hetan rezultadu ne’ebé ke di’ak,” dehan Prezidente CCI-TL Oscar Lima ba jornalista sira iha Centru Convenções Dili (CCD), Sexta (04/12).

Nia dehan, ita hotu-hotu hatene agora iha tempu problema bo’ot ida ne’ebé mosu Covid-19 tanba Covid-19 governu realiza programa “Cesta bázika” hodi koresponde ka atu fó ajuda ba povu Timor-Leste tomak no sidadaun sira iha direitu atu simu hotu. “Serteza CCI-TL fó apelu ba ha’u-nia emprezariu sira, atu emprezariu fó sira-nia kontribuisaun bo’ot. Emprezario atu halo tuir regras ne’ebé mak iha governu kria. Antes emprezariu sira atu entrega pakote ida-idak sei lori uluk ba ministériu ne’ebé mak kompetente hodi haree tiha hotu aprova hotu mak halo distribui,” Tenik nia

Entretantu Lansamentu Programa Bote Ai-han (Cesta Básica) Governu Timor-Leste lansa ona, iha loron 27 fulan-Outubru tinan 2020, programa Bote Ai-han (Cesta Básica), iha Suku Sabuli, iha Metinaru, Dili. Bote ai-han ne’e fó ba populasaun tomak iha fulan-Novembru no fulan-Dezembru tinan 2020 no ho valór to’o dollar amerikanu $25 ba ema ida-idak ba fulan ida-idak ne’ebé temi ona. Ida-ne’e hanesan inisiativa ida iha ámbitu Planu Rekuperasaun Ekonómika, ne’ebé fornese ai-han no produtu sira ba ijiene pesoál nian ba populasaun hotu iha nasaun laran.

Objetivu boot husi medida ida-ne’e mak atu tulun família sira hodi hatán ba sira-nia nesesidade bázika sira, hodi kontribui ba halakon hamlaha no vulnerabilidade boot liu hirak ne’ebé eziste iha rejiaun balun husi país ne’e, ne’ebé kiak no izolada liu, aleinde objetivu ida ne’ebé mak apoiu ba agrikultór, produtór no komersiante lokál sira, atu estimula dinámika ekonómika lokál sira, liuhusi sirkulasaun rekursu finanseiru sira ne’ebé nesesáriu atu hasa’e produsaun nasionál, hodi redús impaktu sira husi krize ekonómika.

Implementasaun programa ne’e nian sai nu’udar responsabilidade Ministru Koordenadór Asuntus Ekonómikus (MKAE) nian, liuhusi serbisu hamutuk ho Ministériu Turizmu, Komérsiu no Indústria, (MTKI) Ministériu Agrikultura no Peskas, (MAP) Sekretaria Estadu Kooperativas (SEKoop), Sekretaria Estadu Ambiente (SEA), Autoridade Rejiaun Administrativa Espesiál Oekusi Ambenu (RAEOA) no Sentru Lojístiku Nasionál (CLN), no mós ho servisu públiku sira seluk ne’ebé relevante no instituisaun sira ne’ebé la pertense ba Administrasaun Públika.

Lista produtu nian sira ne’e simu validasaun husi Ministra Saúde, ne’ebé mak konsidera liuliu, ba nia valór nutrisionál no sanitáriu. Elaborasaun lista kona-ba xefe família sira no númeru totál husi membru uma kain benefisiáriu sira ba bote ai-han, nune’e mós organizasaun kona-ba oinsá fahe bote ai-han hirak ne’e, sai nu’udar responsabilidade Ministru Administrasaun Estatál nian, serbisu hamutuk ho autoridade no administrasaun munisipál no suku sira.

Ministra Solidariedade Sosiál no Inkluzaun disponibiliza rede nasionál sentru solidariedade sosiál nian sira, iha munisípiu sira, atu apoia asaun distribuisaun bote ai-han nian ne’e no Autoridade Rejiaun Administrativa Espesiál Oekusi Ambenu koordena implementasaun bote ai-han iha ninia sirkunskrisaun territoriál ne’e.

Iha fatin seluk, Sekretariu Estadu Kooperativa (SEKoop) Elizario Ferreira, Informa Konseitu distribuisaun ba programa Cesta Basika” sosa produtu husi populasaun hodi distribui fila fali ba populasaun iha produtu lokál 70% nomos importasaun nian mak, mina, rinso no sasan sira seluk hamutuk 30%.

“Distribuisaun ninia konseitu mak sosa husi populasaun iha baze depois distribui fila fali ba populasaun sira nian bazeia ba produtu ne’ebé sira iha, husi distribuisaun produtu lokal ne’e dominante. Por ezemplu, $50 dollar ba fulan rua nian, entaun kona ba importasaun ninian bolu dehan sabonte, mina, rinso ne’e 30% no 70% ne’e produtu lokál,” hatete SEKoop Elizario Ferreira.

Nia hatutan, problema ne’ebé mak durante ne’e SEKoop infrenta mak iha lokál balun balun produtu barak maibé ezempluu hanesan suku Vatu-Vou katak produsaun la iha tanba tinan ida ne’e bailoron naruk ne’ebé sira la iha produsaun signifika produsaun mai husi fatin seluk hodi dsitribui ba suku ida ne’e.

“Durante ne’e problema ne’ebé mak ami infrenta mak iha lokál balun produtu ne’e barak maibé por ezemplu iha suku ida ne’e hensan sefe suku hatete katak sira nia produsaun ne’e la iha babain iha batar maibé iha tinan ida ne’e bailoron naruk ne’ebé sira la iha produsaun, ne’e signifika katak produsaun tenki mai husi fatin seluk hafoin halo distribuisaun,” hatutan nia

Nia hatuir, tanba ida ne’e mak difikuldade bot ne’e mak transporta no empakotamentu , transportasaun produtu no empakotamentu ba produtu sira ne’e. Nia salenta, tanba iha suku ida ne’e miliaun 5 resin atu halo deit empakotamentu ne’e presiza lori loron 5 too 6 ne’e bele too tan semana tolu tanba ne’e mak problema bot ne’e iha empakotamentu no ninia distribuisaun ne’e ladun han tempu maibé han tempu ne’e iha transportasaun.

“Premeiru dekretu lei ne’e mak limita tiha kooperativa atu la partisipa tanba ida ne’e mak kooperativa servisu hamutuk fali ho kompañia sira oferese produtu ba kompañia sira,” Informa nia.

Komapañia 30 Resin Sai Parseiru ba SEKoop Oferese Produtu Lokal liuhusi programa "Cesta Bazica"

“Premeiru dekretu lei ne’e mak limita tiha kooperativa atu la partisipa tanba ida ne’e mak kooperativa servisu hamutuk fali ho kompañia sira oferese produtu ba kompañia sira, emprinsipiu iha SEKoop ne’e kompañia besik 30 mak hanesan parseiru ba SEKoop no sira ne’e distribui ba area ne’ebé mak SEKoop responsabiliza por ezemplu ba munisipiu-7 hanesan Likisa, Aileu, Ainaro, Suai, Manufahi, Manatutu no Lospalos,” hatete Sekretariu Estadu Elizario Ferreira ba jornalista sira hafoin halo abertura ba fahe aihan "sesta bazika", iha sede suku Vatu-Vou, Postu Administrativu Mubara, Munisipiu Likisa, Segunda (23/11).

Nia hatutan, kompañia 30 resin ne’e, hola parte iha sub-distritu hotu no rekejitu ne’ebé mak iha tenki sosa produtu lokál mak iha lokál duni. “Entaun Kompañia 30 resin ne’e hola parte iha sub-distritu sira hotu atu konta ba ida ne’e, agora rekejitu ne’ebé mak iha katak premeiru tenki sosa produtu lokál ne’ebé mak iha lokál segundu sira tenki koopera ho kooperativa atu kooperativa bele oferese produtu ba sira,” hatutan nia

Nia informa, tanba kooperativa ne’ebé hanesan organizador iha nivel baze ne’ebé barak teb-tebes maibé sira senti la iha benefisiu tanba lei ne’e limita tiha kooperativa labele sosa. Nia haktuir, tanba be’e kompañia senti lakon oportunidade hodi hetan rendimentu no sira rasik la husi lei hodi limita atu labele partisipa.

“Entaun sira senti hanesan lakon oportunidade ne’ebé sira atu hetan rendimentu maibé sira rasik la hetan tiha no la husu lei ne’e para atu limita tiha atu labele partisipa, tanba ne’e mak iha kontratu ne’e tau kedas katak sira tenki koopera ho kooperativa atu kooperativa oferese produtu ba sira, se koopeartiva la koopera ho sira signifika sira la hetan produtu,” haktuir nia

Durante ne’e lao diak kompañia sira ligasaun ho koopertiva no koopertiva oferese produtu ba kompañia sira, tanba ida ne’e mak ami sedauk rona lamentasaun ruma husi koopertiva no komapañia sira depois negósiu sira hanesan ema bolu tranjaksaun entre sira lao diak hela no ami sedauk rona lamentasaun ruma husi parte-2 ne’e. (BT)