DÍLI----Governu Liuhusi Ministeriu Kordenadór Assuntu Ekonomiku (MKAE) Ministeriu Turizmu Komersiu no Industria (MTKI), Ministeriu Agrikultura no Peskas (MAP), Sekretariu Estadu Kooperativa no Seluk-seluk tan halo lansamentu ba Programa “Cesta Básica” ho Modalidade Voucher.

Vise Ministéiru Turizmu Komérsiu Indúztria (MTCI) Domingos Lopes hateten aktividade mai hamutuk iha fatin ne’e atu lansa “Cesta Básica” ho modalidade Voucher nian iha Munisipiu Díli ne’ebé mak sei fornese ba konsumidores hamutuk 285,660. “Ohin ita mai hamutuk iha ne’e atu lansa “Cesta Básica” ho modalidade voucher nian iha Munisipiu Díli ne’ebé mak sei fornese ba konsumidores hamutuk 285,660 (Cristo Rei, Dom Alexo, Na’in Feto no Vera Cruz). Dehan Vice Ministru komersiu no Indústria, Domingos Lopes liu husi ninia diskursu iha CCD Merkadu Lama, Sexta (04/12).

Nia hatutan, “Ita hatene ona katak governu foin lais lansa ona programa “Cesta Básica” iha fulan kotuk iha dia 27 Outubru iha Metinaro, to’o ohin loron distribuisaun la’o namanas iha teritoriu laran tomak, ohin MTCI halo distribuisaun hela iha suku Ailok, no semana oin hahu halo ona distribuisaun iha posto Metinaro,” Salienta nia. “Cesta Básica” hanesan medida kurtu prazu ida temporariu husi planu rekoperasaun ekonómiku ne’ebé governu intruduz ho objetivu atu halo mitigasaun husi impaktu COVID-19 sira imediatu, hodi loke dalan atu ba medidas sira ne’ebé sei implementa iha tinan oin no ba longu prazu nian.

“Cesta Básica” ne’e governu deside ho objetivu, garante katak ema hotu iha Timor-Leste iha asesu ba produtu ai-han ne’ebé nesesariu no nutritisional no produtu ijine, kombate hamlaha, malnutrisaun no vulneralibidadi seluk, fó prioridade na produtu lokal, ho objetivu atu apoiu agrikultor no produtor lokal sira iha rai laran. “Ba produtu sira ne’ebé ita la produz iha rai laran, servisu hamutuk ho loja no fornesedor komersiante sira ne’ebé iha ona Timor-Leste, hodi apoiu mós sira siatuasaun ekonómia no garante sira nia sustentabilidade atu nune’e sira la iha nesesidade atu taka sira nia empreza no kauza aumenta dezempregu iha rai laran.” Hateten nia.

Haktuir nia, Ho medidas sira ne’e sei empregu adisional ba joven sira ne’ebé mak loja sira rekruta servisu iha armajen no halo pakotamentu, governu bele sosa ona suku la’os plastiku, bote sira ne’ebé produz husi rai laran, no fó empregu ba sira ne’ebé homan bote. “MTCI halo parseria ho Inpresa Nasional, IP, TIC, Timor, no WFP juntamente halo deseña no impreme Voucher atu fasilita ita nia sidadaun sira iha Munisipiu Díli atu halo transaksaun fasil liu, Díli ho populasaun bo’ot tabes, infelismente populasaun husi suku ida sei la halo transaksaun dala ida de’it iha loja ida, maibé governu sei halo kalendariu atu nune’e populasaun ba gradualmente ba loja parseiru sira hodi evita lina naruk, no hodi mantein distansia sosial.” Salenta nia.

Nia hatutan, Ohin MTCI parseria ho Grupo Media Nasional (GMN) halo transmisaun direita ida kona-ba transaksaun ho Voucher husi Posto Dom Alexo ho loja parseiru sira hanesan W-Four iha Timor-Plaza, Leader no DiliMart no Golgota, Transmisaun ne’e bele fasilita halo sosializasaun ona oinsa atu utiliza Voucher hodi troka sasan iha loja. Semana oin loja hamutuk sanulu resin mak sei hahu simu transaksaun ho Voucher ba publiku (inkluinadu loja Amigu to’o na’in, Loja Agrikultor, Jacinto Supermarket, Lita Store, Lisun Supermerkadu, Funan Buras, Acelda, Sentru suprmerkadu, Star King, Meimart, Fitun Maubara no sira seluk).

Loja sira ne’e sei fasilita ita nia sidadaun sira ho cashier 2-3, meja reklamasaun no verifikasaun dadus ne’ebé mak kontribui staff MTCI, chefe Aldeia no Voluntariu ne’ebé MAE rekruta, Loja sira iha kapasidade atu simu ema husi 500-1000, maibé atu evita lina naruk loja sira sei simu de’it ema husi 400-500 pesoas loron ida. MTCI sei fornese kalendariu no lista benefisiariu sira ne’ebé mak atu simu Voucher nia ba xefe Aldeia sira no ema ida-idak sei simu sira nia voucher iha loja laran, ikus mai ema hotu sei simu nia voucher tuir kalendariu.

“Ha’u hasu autoridade sira nia apoiu, liu-liu xefe Suku no xefe Aldeia sira atu kolabora di’ak ho MTCI no loja fornesedor atu fasilita transaksaun sira ne’e ho di’ak husi oeganizasaun no kontrollu, husu ba autoridade liu-liu xefe Suku no xefe Aldeia sira atu resista reklamasaun sira ho staff MTCI nian no submete lista reklamasaun tuir vicha famíliar ida-idak nian ba MAE hodi fó fila-fali ba MTCI atu nune’e ema hotu bele hetan nia direitu.” Akresenta nia.

Nia afirma, Ba inan-aman no populasaun hotu iha Munisipiu Díli liu-liu iha Posto Administrativu ha’at (Cristo Rei, Dom Alexo, Na’in Feto no Vera Cruz) bainhira ba loja tenki lori imi nia ficha famíliar original, kopia kartaun eleitoral ka BI ba hatudu iha ekipa “Cesta Básica” nian hamutuk ho xefe aldeia iha loja molok imi foti imi nia voucher no sosa iha loja laran. Tuir dekreto lei no. 48/2020. Ema ida-idak sei simu voucher ho montante ate $25 ba fulan ida. Tanba ne’e ema ida-idak sei simu de’it voucher ida ho montante $50 ba fulan rua.

Nia akresenta, MTCI ho loja fornesedor sira iha aseitasaun atu fornese de’it ai-han nitrientes, limpeza no ijieniku nian ba populasaun tuir diploma konjunta mak tuir mai: Fos (fos mutin, fos mean), batar Uut, ikis, batar fai, Koto-Fore (koto, fore munga, for keli), Fore rai, Sorghum dulas, kafé, Masin, Fehuk (fehuk ropa, fehuk timor/midar), Susuben, Masin midar, Manu broiler, Manu tolun, Mina, Mina Nu, Trigu, Modo (Ervila, tomate, Koto-nurak, Fore-sikote, sst) no modo Ropolho, kouve, modo metan, modo mutin no sst), Ai-fuan Ikan-fresku, Ikan-maran, Na’an-karau, Na’an-Fahi, Sabonete, Alkool Jel, Pasta dente, Detergente, Eskova Dente. “Ami espera katak “Cesta Básica” ema hotu-hotu sei selebra loron natal ho ai-han nutrientes no kontinua pratika fase liman item ijieniku ne’ebé governu oferese.” Dehan Vece Ministru Comercio Induztria Domingos Lopes. (BT)