DÍLI----Governu liuhusi Ministeriu Koordenadór Asuntu Ekonómia (MKAE) foin lalais ne’e halo vizita dahuluk ba industria produsaun bee-moos Agua Fresca hodi haree direita oinsá governu bele apoiu investimentu iha Timor liliu industria bee-moos hodi bele hamenus bee importasaun.

MKAE Joaquim Amaral, hatete vizita dahuluk ne’e nu’udar apoiu governu nian ba investimentu iha Timor liliu industria transformada hanesan bee tanba ne’e oinsa bele hamenus bee importasaun no programa husi governu nian la’os promove investimentu maibé halo akompainamentu ba investimentu.

“Objetivu husi vizita nee dahuluk atu apoiu ba investimentu sira ne’ebé iha Timor liliu iha industria tranformadora sira hanesan bee, tanba ida ne’e importante tebes atu bele hamenus bee importasaun, Tanba ne’e hanesan parte ida husi programa governu nian laos deit promove investimentu maibe halo akompainamentu ba investimentu sira ne’ebé iha,” hatete MKAE Joaquim Amaral ba jornalista BT, hafoin remata vizita iha Agua Fresca, Beduku-Díli, Sexta (12/02/2021)

Nia hatutan, Ohin mai ho Diretor sira ne’ebé iha relasaun direita hanesan diretor jeral Alfandega, diretor ezekutivu SERVE, kordenador AIFAESA, diretor trade-Invest ho ekipa tomak iha ne’e hanesan governu ita nia obrigasaun atu iha faze ida agora rekoperasaun ekonómia ne’e atu akompaina besik liu setor privadu sira nia investimentu.

“Ha’u mai vizita kompania bee Fresca ida ne’e atu hatudu deit governu nia suporta, dala ida Tan governu nia apoiu konfiansa ba iha setor privadu sira ne’ebé halo ona investimentu iha ita nia rain. Tanba agora iha periodu ida ne’e importante tebtebes mak oinsa atu hakiak harii kampu servisu tanba ne’e mak kompania sira ne’ebé halo investimentu konsege sira fo servisu ba Timor oan sira governu iha obrigasaun atu servisu besik liutan ho sira no rona sira nia difikuldade ne’ebé sira hasoru atu nunee sira bele halo sira nia operasaun ho normal no bele mos suporta ekonómia lao fila-fali ba normalidade lalais,” Esplika nia.

Governante ne’e esplika, Sira iha difikuldade ida mak infraestruturas sira ne’ebe besik para husu governu atu bele tau matan hanesan asesu estrada ita haree husi estrada boot ne’e mai ita tenki hakat mota tempu nee mota boot difisil atu bele liu atu hadia dalan sira ne’e.

“Difikuldade seluk mak ita-nia situasaun ekonómia agora halo kuaze produtu ninia komersializasaun nia pemasaran ne’e sei kiik maibe sira mos komprende situasaun ekonomia ne’ebé iha hela Covid nia laran tanba fabrika bee ne’e ninia orientasaun ne’e mos atu exporta ba Australia tanba ne’e mak importante tebes governu fo nia apoiu atu hakiak industria sira hanesan ne’e atu bele boot no buras nunee nia bele halo too exportasaun nee dala ida Tan ne’e orguillu ba ita la fasil atu hatama ba merkadu Australia maibé sira konsege halo iha sira nia komprador iha ne’eba no sira nia merkadu iha ne’eba ne’e, ida ne’e dalan diak tebtebes para ita halo luan ita nia merkadu husi Timor ba Australia,” dehan Joaquim

Nia haktuir, Laos Australia deit mak mai, maibe Timor mos exporta sasan balun ba iha ne’eba ida ne’e mak ita nia governu mai ho nia ekipa tomak dala ida Tan hatudu apoiu ne’ebé governu atu fo ba sira liliu ita nia prezensa ho publisidade sira ne’e parte apoiu ida Importante ona.

Iha fatin hanesan diretor Agua Fresca, Tan Chang Ji, hatutan vizita governu liuhusi MKAE ne’e senti konteti ne’e oportunidade ida ba fabrika tanba governu haree ona fatin ida ne’e no rona difikuldade balun ne’ebé mak hatoo ona ba governu oinsa governu bele tau matan.

“Governu mai iha ne’e ha’u senti kontenti tebtebes tanba estadu mai iha ne’e oportunidade ida ba ami nia fabrika tanba estadu bele haree ami nia fatin ne’e tanba governu bele ajuda tan ami nia difikuldade ruma ka buat ruma ne’ebé sei falta estadu bele tau matan Metin,” dehan Tan Chang Ji

Nia informa, Difikuldade mak kona-ba Bee hanesan husi Indonezia tama hanesan Aquase sira mai ida ne’e mak produtu hanesan ita nian maibe nusa mak la lori ita nia bee ne’e kualidade diak no bee importasaun mai iha ita nia rain entaun ita nia bee hanesan valor la iha ba ita. “Tanba ne’e agora ami loke lina ida deit produs bee kada loron halo Agua Fresca hamutuk-1.500 no traballador sira ne’ebé mak produs bee ne’e mais ou menus ema na'in-10 too 15,” dehan nia (BT)