DÍLI----Sentru Logistika Nasional (CLN) garante stock fós 28.000 Toneladas ne’ebé mak importa husi rai-liur liuhusi kooperasaun Governu Timor-Leste (TL) ho Governu Vietname ne’ebé tama ona iha armajen sei sufisienta ba komunidade to’o fulan tolu no haat nia laran.

Tambá ne’e Sentru Logistika Nasional (CLN) husu ba Komunidade labele paniku ho stock fós ne’ebé menus, no Governu nafatin prezensa iha Povu nia le’et hodi asegura povu Timor-Leste la iha problema ba stock fós no komunidade sira sei laiha hamlaha.

Prezidenti Konsellu Administrasaun CLN, Augusto Junior Trindade hatete, stock Fós 28.000 Toneladas ba dadus konsumu Nasional Timor-Leste iha nomor ne’ebé bele prense ba fulan tolu no ha’at, alende Sentru Lojistika Nasional, estadu no Governu, maibé mezmu imagen hatudu katak komesa stok fos mamuk maibé la’os mamuk liu regularmente fós sira tama husi rai liur.

“Fós 28.000 toneladas ne’e ita koalia lolos katak ba dadus konsumu Nasional Timor-Leste nian ita bele hatete katak ita iha nomor ida ne’ebé bele prense ba fulan tolu no to’o ha’at, tambá ita hatene Sentru Lojistika Nasional hanesan stock ida ne’ebé Estadu iha no Governu iha, maibé iha setor privadu sira mós mezmu imagen hatudu katak komesa mamuk maibé la’os mamuk liu regularmente fós sira tama husi rai liur,” Heteten Prezidenti Konsellu Administrasaun Sentru Logistika Nasional (CLN) Augusto Junior Trindade ba jornalista BT iha nia kna’ar fatin MTCI Mandarin Dili, Sexta (08/01).

Nia hatutan, CLN foin mak hasai por volta 2.000 ba Protesaun Sivil no MSSI depois ita iha hela pedidu ida mai husi RAEOA ne’e ba iha 3.000 toneladas maibe’e ne’e iha hela prosesu negosiasaun ba iha fós 28.000 toneladas.

“Ita hatene katak loron rua ka tolu liu ba hamosu tiha ona preukupasaun tiha ona iha komunidade nia let hahú kedas husi loron rua liu ba no media nasional komesa tau ona imagen armajen balu iha setor privadu nian ne’e mamuk, no iha tan informasau balun husi media fós menus, maibé atu hatete katak sentru logistika nasionál ne’e hanesan ita hotu hatene katak ne’e estadu nian, governu Timor-Leste nian ne’e agensia autonomia ida,” dehan nia

Nia dehan, Iha tinan kotuk wainhira estadu deklara EE ba dahuluk ita hahú kedas halo atuasaun ba rapidamentu ho SE. Primeiru Ministru, nia esforsu makas tebes ita konsege hatama tiha ona fós husi rai liur liu husi kooperasaun husi Governu Timor-Leste no Vietname hamutuk 30.000 Toneladas, agora iha tiha ona armajen katak ita iha stok ne’ebé sufisiente.

Nia hatete, agora programa “Cesta Bazika” lao hela, komunidade sira simu hela fós kilo 10 ou 5 iha sira nia uma, loron-loron satan hanesan familia bo’ot ne’ebé balun bele simu to’o kilo 100, entaun ida ne’e signifika katak ita iha fós ba situasaun ida ne’ebé agora ita hasoru la’os situasaun ne’ebé atu halo paniku iha komunidade nia let.

Nia afirma, CLN hanesan mós liman ain estadu nian iha area ida ne’e husu atu povu labele paniku, importante liu kolaborasaun husi media sira nian atu fahe informasaun ida ne’ebé lolos atu haklaken lia los ba Komunidade sira katak Governu iha hela situasaun ida ne’e bele garantia hela katak ita la iha problema.

“28.000 ton ne’e inportasaun husi rai liur, ita uluk iha 30.000 maibé ita uza ona por volta 2.000 ton ita sei iha 28.000 ton ne’e inportasaun husi Vietname liu husi kooperasaun Governu Timor-Leste no Governu Vietname,” hatutan nia.

Nia haktuir tan, Iha tinan kotuk ita hola hare kulit husi Komunidade sira iha tonelada 900, maibé ita dulas ona balun no balun agora iha hela prosesu foin mak dulas, ita atu rai ba rezerva atu ita halo kalkula besik 600 ton, maibé husi 600 ton ita distribui ona lubuk ida ba ona “Cesta Basica” ba kompañia sira ne’ebé hetan fornese produtu Cesta Basica ba Komunidade sira.

“Wainhira sira menus fós rai sira mai Sentru Lojistika Nasionál liu husi Miniteriu Turizmu Komersiu no Industria (MTCI) no Sekretaria Estadu Kooperativa (SEKoop), sira mai CLN depois apoiu sira entaun ida ne’e mak porvolta 200 ital Toneladas ba tiha ona, agora ita iha prosesu dulas hela, ita haree ita-nia fós rai-laran ita bele hatete menus dadaun, tambá ita halo distribuisaun ba hela programa "Cesta Bazika" ne’e, maibé fós importasaun sei sufisiente hela,” afirma nia.

Nia dehan, Importante tebes ba komunidade sira labele paniku ba situasaun ne’ebé media sira fó sai ona iha armajen sira mamuk fós komesa sae, maibe Governu nia prezensa nafatin iha povu nia le’et hodi asegura katak la iha problema ba stock fós.

“Ha’u hanoin importantes tebes ita lalika paniku ba situasaun ida hanesan ne’e, ita foin hahú tinan foun ida, tinan foun ida diak tebes iha 2021, mezmu inisiu kedas media fó sai ona iha armajen sira mamuk fós komesa sae, maibé bele hatete katak governu nia prezensa nafatin iha povu nia leet hodi asegura katak ita la iha problema ba stock fós,” hatete nia.

Nia dehan, Ita iha armajen ne’ebé seidauk bo’ok, ne’ebé husu nafatin ba komunidade atu labele paniku, CLN sei iha ekipa ida atu tun direitamente ba Munisipiu atu halo levantamentu ba dadus, liliu iha presu ne’ebé agora dadaun komesa sae.

“Importante mak labele paniku, tamba ita-nia armajen sira to’o agora seidauk bok, ami iha segunda ou tersa ami sei iha ekipa ida sei ba iha munisipiu sira atu halo levantamentu dadus liliu kona-ba sibtituasaun presu ida ne’ebé agora komesa sae, se afinal iha duni presu ida ne’ebé bok an sae tebes no afeta ba komunidade sira, entaun ami husu atu halo intervensaun ida atu normaliza fila fali presu iha teritoriu laran tomak,” katak nia.

Nune’e mos iha dalan seluk ita atu halo mak ita nafatin leno kapasidade stock ne’ebé ita iha ba komunidade sira katak labele iha paniku no labele hare’e katak agora iha loja sira ne’e stok komesa menun depois ita hanoin komesa hamlaha atu mai ne’e la iha. “Ha’u bele hatete dehan ba fula tolu no fulan ha’at mai oin ne’e mai labele mai, tambá ita iha hela stock ida ne’ebé iha no setor privadu sira ita bele akompaina diak regularmente mós sira hatama husi rai liur,” Informa nia.

Stock Fós Iha Armajen Perisos Mamuk
Nune’e, observasaun Jornalista BT iha terenu nota katak fos iha armajem Perisos mamuk, mais ou menus hela fós ho marka Folsom lato’o saku 20 iha laran tanba komprador sira husi munisipiu sira hasoru difikuldade sosa sasan kios nian inklui fós realidade fós menus iha loja sira iha Díli laran.

Tuir observasaun jornalista Busienss Timor nian. iha area Bidau, komprador sira tama sai loja sosa fós maibe fós laiha, kios no loja sira iha parte Bidau nian dalan sa’e ba Hospital hare’e katak, iha loja sira fós rai iha loja laran la to’o saka 20 ona kuaze saka 20 mai kraik. Alende ne’e iha kios sira fós hada iha kios laran balu iha saka 10 balu iha saka 20 maibe maioria la to’o saka 50.

Hafoin observasaun iha Bidau iha oras tuku 11 ba observasaun iha Audian iha ne’ebá loja xina nian iha audian husi Supermarket Mei Mart tesik mai nota katak fós sira seluk hotu ona, agora hela de’it fós folson mak iha hada iha laran. Nune’e, Iha fontes balun fo sai husi jornal Timor Post iha loron kuarta, (06/01) iha loja Kriative Furak Bidau, nia ho kareta baskolante ida atu sosa fós saka 150 maibe iha loja fós la to’o.

“Agora atu sa’e ba $14, uluk ne’e dolar $11, no $12,50, tanba uluk ne’e fós Bintang 25kg $11.50, fos ida Manu Faktura ne’e $12 dolar, tanba ne’e ohin atu hola iha loja laran fós la iha ona,” Espresa sidadaun ida ne’ebé Timor post hasoru bainhira buka hela fós atu sosa laiha iha Bidau.

“Agora atu sosa lori ba Aileu, iha ne’ebá mós fos minus ona laiha ona, tanba ema hola hotu ona, tanba ema hola hotu ona, tanba ema hola hotu ona, iha loron 4 segunda ne’e sira ba loja Perisos ba fós laiha, iha loja balun iha dili laran fós atu hola barak fós barak laiha, ohin mai tan mos laiha nafatin,” Nia hateten atu sosa fós ne’e lori ba iha aileu suku Liurai, agora sai husi ne’e ba liu ona tanba fós laiha. (BT)