DÍLI----Bazeia ba Sorumutuk Estraordináriu Konsellu Ministrus nian iha loron 8 fulan-Janeiru tinan 2021, Governu liuhusi Konsellu Ministrus aprova ona projetu Dekretu Governu nian kona-ba ezekusaun Orsamentu Jerál Estadu (OJE) ba tinan 2021, ne’ebé aprezenta husi Ministru Finansas, Rui Augusto Gomes.

Dekretu Governu ida-ne’e hatuur regra sira kona-ba Ezekusaun Orsamentu Jerál Estadu nian ba tinan 2021, ne’ebé hetan aprovasaun husi Lei n.14/2020, loron 29 fulan-Dezembru no aplika ba orsamentu sira ba órgaun no servisu sira husi Administrasaun Sentrál, Rejiaun Administrativa Espesiál Oekusi Ambenu no Seguransa Sosiál.

Diploma ida-ne’e hakarak fó garantia ba efetivu no rigorozu kontrolu orsamentál no, ba tempu hanesan, hodi simplifika prosedimentu sira ezekusaun orsamentál nian, ne’ebé fó kontinuidade ba mudansa sira ne’ebé hahú ona iha tinan 2020, ho objetivu atu fasilita ezekusaun Orsamentu Jerál Estadu nian ba tinan 2021 husi órgaun no servisu sira Setór Públiku Administrativu nian.

Entre diferensa sira ba Dekretu Governu husi Ezekusaun ba OJE tinan 2020, destaka katak eziste de’it rejime finanseiru rua, inklui implementasaun husi orsamentasaun liuhusi programa sira, halo alterasaun ba data husi taka ezersísiu orsamentál, aumenta fleksibilizasaun husi ezekusaun orsamentál no aumentu obrigasaun hodi fahe informasaun kona-ba ezekusaun. Entretantu Iha Intrevista Primeiru Ministru iha Palasiu Prezidente katak Uluk dehan 2020 nia mak la mai, mas 2020 hotu tia ona ami ida la keixa dehan osan laiha.

“Ha’u hanoin ita-boot sira se bele ne’e rona mak Primeiru-Ministru, labele ba rona fali A, B, C iha kotuk ne’ebá dehan osan laiha, tanba uma vez que Parlamentu aprova, Prezidente Repúblika promulga, Ministru Finansas fó ordem ba Banku Sentrál osan mai, kuandu osan la mai naturalmente ami sira ne’e (Governu) mak hatene uluk mak ami informa ba imi,” Informa PM. (BT)