DÍLI----Prezidente Repúblika promulga ona Orsamentu Jeral do Estadu (OJE) ba tinan 2021. “Prezidente Repúblika, Francisco Guterres Lú Olo, iha loron 28 fulan-Dezembru tinan 2020, promulga ona Dekretu Parlamentu Nasionál númeru 26/V Orsamentu Jerál Estadu ba tinan 2021,” Nota Informasaun Media Presidente da Republika, Segunda (28/12).

Iha Komunikadu Imprensa ne’e, Orsamentu Jerál Estadu (OJE) ba tinan 2021 nian hamosu alterasaun metodolójika balu ne’ebé halo indikasaun kona-ba despeza sira tuir programa ida-idak nian, aleindé utiliza klasifikasaun orgánika (entidade ne’ebé mak atu realiza despeza) no klasifikasaun ekonómika (tipu despeza neebé mak atu realiza).

“OJE hamosu previzaun orsamentál ba órgaun no servisu sira iha Setór Públiku Administrativu, kompostu hosi Orsamentu Administrasaun Sentrál, hosi Orsamentu Rejiaun Administrativa Espesiál Oe-Kusse Ambenu no hosi Orsamentu Seguransa Sosiál nian,” Nota Komunikadu Imprensa.

Durante tinan 2021, Governu hetan autorizasaun atu realiza transferénsia hosi Fundu Petrolíferu too montante dóllar millaun 1.377,6. Parlamentu Nasionál aprova Dekretu númeru 26/V Orsamentu Jerál Estadu ba tinan 2021, ho votu a favór 44, laiha votu kontra no laiha abstensaun iha loron 12 fulan-Dezembru 2020. (BT)