DÍLI----Xefí Governu Taur Matan Ruak iha nia diskursu iha ambitu serimonia festeza natal esplika, Orsamentu Jerál Estadu 2021 bele loke fila-fali siklu foun hodi nune'e bele rekopera fila-fali ita-nia ekonómia iha Timor-Leste. Tanba hahú husi tinan 2017 to'o 2020 iha negativu tebés ba povu no nasaun Timor-Leste, laiha orsamentu ne'ebé mak iha hodi dezenvolvimentu ba rai ida ne’e.

“Orsamentu 2021 taka siklu no bele hahú siklu foun, nune'e bele normaliza fila-fali, espera ida bele akontese, maibé ida ne'e dezafiu bo'ot ida ba ita katak, oinsá mak ita bele rekopera ekonómia iha Timor-Leste,” Dehan Primeiru Ministru (PM) Taur Matan Ruak iha nia diskursu iha serimonia festeza Natal hamutuk ho Funsionáriu no Jornalista sira iha residensia Ofisial Primeiru Ministru-Farol, Sabadu (19/12).

Xefí Governu hatutan, Hahú husi tinan 2017, 2018 ita iha negativu, agora 2019 ita iha taxa kresimentu oituan, no 2020 negativu, previzaun 100%, espera 2021 bele iha kresimentu. Maibé nia esplika, kreximentu ida ne'e depende ba ita-nia esforsu no dedikasaun, primeiru iha nivél ejekusaun ba orsamentu, espera 2021 ita bele halo ejekusaun ne'ebé mak di'ak liu, la'os ejekuta arbiru maibé ejekuta tuir programa no planu ne'ebé mak iha. Bainhira ita tau osan la ejekuta nune'e kreximentu ekonómiku labele monu, ho nune'e tenki ejekusaun orsamentu ida ne'e tenki ho di'ak.

Xefe Governu mos husu funsionáriu sira iha Gabineti Primieru Ministru tinan oin ba ajensia sira ne'ebé mak iha Gabineti Primieru Ministru no propriamente Gabineti rasik oinsá mak ita hadia ita nia ejekusaun. “Ita hotu hanoin katak labele gasta, karik ita lagasta dezenvolvimentu labele iha, no labele la'o, ho ida ne'e ita gasta rekursu, maibé importante mak ita gasta di'ak, nune'e bele lori benefisiu ba ita nia Komunidade sira tanba Ha'u espera iha tinan oin ita bele iha enerjia di'ak no foun nune'e ita bele ajuda malu hodi hasa'e ita nia nivél ejekusaun,” Hateten Nia.

Nia kontinua Salienta, Ita komesa hakat ona ba 2020, espera 2021 ne'e di'ak liu, Timor-Leste ukun a'an to'o agora primeira iha estadu timor ne'ebé mak iha tinan ho balun Governu ida ho orsamentu dala-6, pratikamente tinan ida halo orsamentu rua. Enkuantu, Pandemia Covid-19, moras ida ne'ebé mak ita la espera, ne'ebé mak iha mundu tomák, afeita ekonómia familia sira nian, lori barak mak ba dezempregu no ki'ak. Maibé konsege ultrapasa ba situasaun ida ne'e.

“Ita-nia nasaun no povu livre nafátin husi pandemia Covid-19, tanbá ne'e mak ita fó agradese ba ajensia servisu iha área Saúde nian, no Forsa sira ne'ebé mak durante ne'e mós fó kontribuisaun ba situasaun ida ne'e. Ita haree dezastre naturais ne'ebé atinji ba familia sira, iha tinan 2020 liu-liu iha kapital Díli laran kuaze 5 mill familia mak atinji hetan estragus husi inundasaun, ne'e dezafiu ida bo'ot oinsá Governu tuir nia kb'it ho posibilidade ne'ebé mak iha hodi ajuda no rekopera sira nia moris,” Dehan PM Taur. Nia dehan, VIII Governu iha tinan rua ho balun, 2018, 2019 to'o 2020, tinan rua ho balun ita hetan dezafiu barak, mate la mate moris la moris maibé ita konsege hakat liu dezafiu barak.

“Ita laiha ekonómiku, kreximentu ba ita-nia nasaun nian, prátikamente ita halo sesaun ba tinan 2019, ita funsiona baze ba orsamentu duadésimu, ida ne'e lori implikasaun makás ba ita-nia ekonómia Timor-Leste, iha ita-nia familia no empreza. VIII Governu Konstitusionál hetan pose, mak ita hasoru malu iha ne'e, ita iha ungoin nia laran maibé ita bo'ot sira barak iha ne'e ha'u ladun koñese mós, maibé mós ne'e hanesan kareta, dala-barak ita hare mesin travaun bolante tenki nia funsaun komplementar,” Informa nia. (BT)