DÍLI----Parlamentu Nasionál (PN) iha loron 12-12-2020 debate final aprova ona Proposta Orsamentu Jerál Estadu (OJE) ba 2021 hamutuk billaun $1.895, ho Votus A-Favor (44) Abstensaun (0) no Kontra (0). Antes hakat ba Votasaun finál ba Orsamentu Jerál Estadu (OJE) 2021, deputadu sira halo uluk aprovasaun husi proposta ne'ebé mak deputadu sira aprezenta iha meza Parlamentu Nasionál. Hafoin remata votasaun ba OJE 2021, kada bankada Opozisaun no Bankada Governu hato'o ninia deklarasaun ikus, iha ámbitu debate Orsamentu Jerál Estadu ho espesialidade iha Parlamentu Nasionál.

Primeiru Ministru (PM) Taur Matan Ruak senti kontenti no orgullu hodi bele loke siklu foun ida, hodi normaliza fila-fali ita nia fitura orsamentu kada tinan. Xefí Governu mós salienta nune'e mós bele fó kbi’it ba Governu nune'e bele rekopera ekonómia, hafoin efeitu Covid-19 ne'ebé akontese durante ne'e povu Timor-Leste infrenta. PM Taur, lori VIII Governu Konstutuisionál nia naran, agradese ba Parlamentu Nasionál, liu husi Deputadu no Deputada sira ne'ebé mak ho pasiensia no dedikasaun tomák, hodi fó apoiu ohin loron ita aprova ona proposta orsamentu jerál estadu 2021.

Alende ne'e mós husi Prezidenti Parlamentu Nasionál (PPN) Aniceto Longuinhos Guteres hatutan, Orsamentu Jerál Estadu 2021, nu'udár instrumentu fundamentál no determinante, atu fó solusaun ba problema Estadu no Povu ne'ebé mak hasoru durante ne'e. Lider Orgaun lejislatura ne'e fundamenta, Orsamentu Jerál Estadu 2021 nu'udár ran Povu no Estadu agora no ba futuru, OJE presiza instrumentu orgániku hodi dinamiza no atualiza ninia jestaun, no utilizasaun ba atinji metas no objetivu estratéjiku dezenvolvimentu nasionál. Nune'e iha ámbitu ida ne'e, Governu mak seí saí ezekutor prinsipál no Parlamentu Nasionál hala'o nia funsaun hanesan fiskalizador. (BT)