DILI - Departamentu Inspeksaun  Jeral Ministeriu Turizmu Komersiu no Industria (MTCI) semana liuba fo ultimatum ba komersiante estranjeiru hanesan xineza sira nebe fa’an sasan iha merkadu tradisional sira sai ona hosi merkadu iha tempu semana ida nia laran. Maibe to’o semana ida liu ona, xineza sira la hatudu sinal pozitivu atu sai husi merkadu tradisional.

Tuir lei numeru 24/2011, komesa iha fulan Novembru governu hahu ona implementa dekretu lei ne’e ba negosiante estranjeiru sira nebe fa’an sasan iha merkadu tradisional. Problema xineza okupa merkadu tradisional sira, tanba governu rasik la implementa lei ne’e ho loloos.

Parte MTCI duun timoroan balu iha merkadu laran mak fo aluga fali fatin ne’e ba xineza sira. Maibe loloos ofisial MTCI mak hakfudik la kontrola. Baibain, bainhira komersiante sira husu lisensa negosiu nian, ofisial MTCI sei haree uluk lai fatin atu hala’o negosiu iha no serve duni hala’o atividade negosiu tuir lei ka lae. Se xineza sira laiha fatin negosiu, governu labele fo lisensa. Maibe saida mak akontese ne’e xineza laiha fatin negosiu mos governu fo lisensa halo sira tama to’o okupa merkadu tradisonal sira.

Cuong Jien Chun, xineza nebe fa’an sasan iha merkadu Hali-laran informa ba Business Timor, kuarta semana liuba katak, governu bele aviza atu hasai sira, maibe sira hein deit governu atu ba hasai sira. Sira sei la sai hosi fatin ne’e tamba sira fa’an ne’e aluga. Nia dehan sira tama iha merkadu la’os ilegal maibe legal. “Ha’u fa’an sasan iha ne’e komesa iha tinan 2009, fa’an iha ne’e selu fo uma nain la’os gratuita. Ha’u lahatene tamba saida mak derepente deit governu hakarak hasai ami husi fatin ne’e. Nebe ha’u hein deit desizaun husi governu karik tebes atu hasai ami husi fatin ne’e,” nia dehan.

Timoroan sira nebe fo aluga ba Xineza sira fa’an sira nia sasan sei mos preokupa ho politika governu ho mandamentu ne’e. Nain ba fatin iha merkadu Markus da Cruz nebe fo aluga uma ba Xineza sira iha Merkadu Hali-Laran hatete fou-foun nia fo aluga deit kuartu ida maibe to’o fulan haat ka lima hanesan ne’e, xineza sira bolu malu husu aluga tan kuartu sorin nebe sei mamuk hela. Nia fo deit xineza sira atu aluga ninia uma ne’e tamba nia hetan osan, bele sustenta ba nia familia no fo eskola ba nia oan sira.

Hau fo aluga ba xineza sira fa’an sasan iha ne’e tamba hau persiza osan. Hau agora serbisu laiha hodi sustenta hau nia familia no dudu oan sira ba eskola. Tamba ne’e hau hanesan uma nain fo aluga uma ne’e hau bele sustenta netik hau nia familia no haruka hau nia oan sira ba eskola,”  Marcos fo razaun.Nia parte triste ho desizaun husi governu nebe fo sai iha televizaun katak, atu hasai ema estranjeiru sira nebe fa’an sasan iha merkadu tradisional. Tuir nia, governu labele hasai ema sira hanesan ne’e, maibe husu deit atu hasa’e tasa ba sira, tamba tasa nebe mak sira selu ne’e, tama iha kofre nasaun nia.

Iha fatin hanesan, Vendedor Anacleto da Costa nebe fa’an ropa iha Merkadu Hali-Laran fo agradese ba governu tamba hasai ona desizaun atu hasai hotu ema estranjeiru sira nebe  fa’an sasan iha merkadu tradisional sira iha Dili laran, tamba hare xineza sira atu domina tiha timoroan, nebe fa’an sasan iha merkadu tradisional. Entretantu Diretor Lisensamentu MTCI Fernado Hi hatete katak lei lisensamentu sira seidauk implementa tanba falta sosializasaun iha distritu. “Lisensamentu ami  seidauk implementa  Dekretu lei no 4 2011, tanba ami seidauk  halo difulgasaun iha distritu sira hotu” hateten director ne’e, ba BT iha ninia fatin Fomentu Mandarin dili tersa feira  8/11.

Tanba  ne’e governu liu husi  MTCI kria lei  lisensamentu oinsa atu regula no atu admiti maibe to’o  oras ne’e seidauk  implementa tanba  sei falta sosializasaun  iha distritu, hanoin implementa lei refere. Nia esplika liu tan katak kestaun  maluk Xinesa sira ne’ebe to’o oras ne’e sei kontinua fa’an iha merkadu tanba sira hetan fatin husi timoroan sira hodi fo sira aluga, tanba ne’e nia husu ba timoroan sira atu labele kontinua ho hahalok hanesan ne’e, tanba ema estranjeriu mai ho capital ne’ebe boot. Entretantu bapa sira ne’ebe fa’an iha kampo Alor ne’ebe uluk fa’an ho grosir maibe agora fa’an enceran, nia hateten mos katak ba lei foun ne’ebe sira kria atu nune’e bele admiti sira atu fa’an grosi no mos enceran,” nia hatete.(R-2)