DILI - Prezidente Republika Demokratika de Timor Leste José Ramos Horta no Direktor Ezekutivu Organizasaun Naun Govermental LutaHamutuk Mericio Akara Eziji ba Parlamentu Nasional (PN) atu aprova lalais lei brankamentu kapital atu dezenvolve ekonomia finanseiru iha Timor Leste.

Lei ne’e mos atu haree hodi regula ministru, diretures no deputadus sira ne’ebé mak nakar hakarak ba ferias hodi pasa vida iha rai liur lori osan ho montante ne’ebé mak boot. Lei brankamentu ne’e atu haree mos osan hira mak tama mai Timor Leste no hira mak sai husi Timor leste.

Wainhira lei ne’e hetan aprova ona husi Parlamentu Nasional, entaun defisil oituan Ministru, diretur, diretur no emprezariu nakar sira lori osan povu nian pasa vida iha estranjeiru. “Ha’u hanoin mekanizmu lei hirak ne’e tenki iha duni, tamba ne’e sai hanesan sistema integradu.

Bainhira ita koalia konaba dezenvolvimentu ekonomia, bainhira ita koalia konaba sirkulasaun osan sistema finanseiru iha rai laran, tamba ne’e sé lei ne’e la haree lalais ha’u hanoin ita hanesan iha problema iha sistema finanseiru rai laran, dezenvolvimentu ekonomia,” hatete Direktor Ezekutivu Luta Hamutuk Mericio Akara ba Jornalista Jornal Business Timor iha nia servisu fatin Farol, Segunda (12/12).

“Ha’u hanoin Prezidente iha razaun forti hodi eziji. Ha’u hanoin la’os Prezidenti deit maibe ema hotu tenki eziji tamba lei konaba money laundry ne’e prinsipais, sa tan agora iha era globalizasaun nasaun nakloke ba ema hotu, entaun krimi organizadu ne’ebé mak toman halo money laundry ne’e nia biasa buka nasaun ne’ebé mak sei fraku no lei laiha,” katak Akara.

Nasaun ne’ebé mak fraku no lei laiha fasil ba krimi organizado aproveita tama explora, entaun Timor Leste labele julga sira, tamba laiha lei. Ne’ebé iha kontekstu ida ne’e tuir Akara, Parlamentu Nasional fraku liu no Parlamentu ladun iha spiritual atu kompleta lei ne’ebé mak importante. Iha fatin seluk Prezidente Republika José Ramos Horta hateten katak, tenki isin moris liu tan atu nune’e bele halakon tiha gastus ne’ebé la presiza, jestaun a’at no korupsaun iha nivel hotu-hotu.

“Ita iha Parlamentu Nasional tenki aprova lalais lei importante rua, lei anti korupsaun no lei fase osan (brankamentu kapital),” informa Horta.Horta mos fiar katak deputadu sira iha Parlamentu Nasional hakarak atu adopta lei anti korupsaun no lei fase osan ne’ebé forte atu nune’e bele proteze TL husi hahalok a’at ne’ebé bele estraga Timor Leste hanesan korupsaun no krimi organizadora sira ne’ebé hakarak uza atu sai fase osan ne’ebé mai husi rai liur.

Hatan ba kestaun ne’e Prezidente Komisaun C Parlamentu Nasional Manuel Tilman hateten katak, lei fase osan agora deskute hela iha uma fukun Parlamentu Nasional.Tilman informa katak, lei ne’e atu kontrola osan ne’ebé mak tama mai no osan ne’ebé mak sai ba liur. Kuandu lei ne’e aprovadu maske deputadu sira kuandu sai husi frontera, sidadaun hotu-hotu tenki priense surat oan ida atu sai ba liur, osan hira mak lori iha bolsu no osan hira mak hatama.

“Sé lori liu rihun sanolu tenki hatete osan hira mak lori, sé menus rihun sanolu la presija priense buat ida. Karik lori liu e la hatete buat ida mak ita nia Alfandega kaer osan ne’e lakon ba estadu,” informa Deputadu Bankada Kota ne’e.Sansaun mak Deputadu ne’e informa katak, lakon osan. Wainhira sidadaun ida lori osan rihun sanolu resin ida lei hatete katak lei tenki priense.

““Sé ita boot priense lori sanolu resin ida ne’e bele lori osan, mais supenhamus que komu lakohi hatete buat ida finzi katak la lori osan. Lei hatete katak sé mak lori rihun sanolu ba leten tenki deklara,” katak Tilman.  Nia informa klean liu tan katak, lei brankamentu kapitais ne’e mos atu labele sosa kilat, atu labele fa’an ema, atu labele hatama komersiu de droga nian no komersiu ema duni. (R-6)