DÍLI----Prezidenti Federasaun GOLF Timor-Leste Christopher Henry Samson hateten, lansamentu federasaun GOLF Timor-Leste ne'ebé seí hala'o iha tinan oin tanba dadaun ne’e prosesu prepasaun la’o hela, nune'e estudante sira bele partisipa iha aktividade ida ne'e. “Prosesu harí GOLF la'os ona ita nia naran la'os ona TOP GOLF, maibé federasaun GOLF Timor-Leste, ne'ebé mak tinan oin ofisialmente seí komesa, ne'ebé mak ita seí halo GOLF Timor-Leste ne'ebé mak iha Hera,” Dehan Prezidenti GOLF Timor-Leste hafoin remata hala'o eventu TOP GOLF ba Jornalista Business Timor (BT) iha Pasir Putih, Kristu Rei, Dili, Domingu (13/12).

Nia haktuir, fátin ida ne'e hanesan prátika nian, maibé iha diferensia iha Hera hodi bele partisipa iha ita nia aktividade ne'ebé mak ita seí hala'o iha tinan oin. Nune’e programa ida ne'ebé mak tama iha Timor Plaza nia programa anuál, hanesan na'in ba TOP GOLF, maibé ba federasaun seí lansa ninia programa iha tinan oin. “GOLF Timor-Leste seí lansa ninia programa, bainhira prosesu tomák finaliza ona, entrega ona ba Governu liu husi Sekretáriu Estadu Juventude no Desportu (SEJD) no ba Ministériu Justisa (MJ) hafoin mak GOLF Timor-Leste bele hala'o nia programa ba futuru” Esplika nia.

Enkuantu, aktividade ida ne'e kada fulan, TOP GOLF sempre organiza Fongen, maibé lolos loron ohin estudante sira ne'ebé mak mai husi eskola Portugés no DHS, lolos sira ohin loron bele partisipa iha programa, maibé ita tama ona iha tempu feriadu, tanbá ne'e mak ita muda fila-fali ba tinan oin. Tuir nia, Prosesu ne'ebé mak ita hala'o iha TOP GOLF, ne'e ita hanoin ba futuru, mak ita bele deside atu hodi kria federasaun ida ne'e, iha federasaun ne'ebé mak ita deside hodi kria, federasaun ne'ebé mak ema lubuk ida.

Tanbá ne'e, tuir ona lei ne'ebé mak iha, no ita halo ona asembleia jerál, ita konsege hili ona prezidenti, no sekretária Jerál, Vise-Prezidenti, Vise-Sekretáriu Jerál no iha membru na'in-5, ne'ebé mak tama ona iha GOLF Timor-Leste. Tanbá iha Konsellu fiskál hamutuk ema na'in-3, ne'ebé mak ita hili, ne'ebé mak prosesu ida ne'e la'o hela, óras ne'e dau-daun, membru sira liu-liu Prezidenti ho nia membru sira komesa prepara ona, dokumentu sira ne'ebé mak presiza hodi lori ba Governu liu husi Sekretáriu Estadu Juventude no Desportu (SEJD), verifika hotu hafoin lori ba Ministériu Justisa (MJ) hodi ba notariadu.

Programa Dadaun la'os federasaun nian, federasaun iha prosesu, no federasaun seí lansa iha tinan oin bainhira prosesu remata, maibé federasaun komesa fó ona treinamentu ba juventude sira hamutuk ema na'in-20. Membru sira ne'ebé mak asina ona hamutuk 45, ne'ebé mak rejista ona iha prosesu nia laran, maibé sira maiória mak husi internasionál no timoroan sira mós maiória mak involve, ne'ebé mak mai husi Úniversidade, Sekundária, Grupu no individu ne'ebé mak mai tuir treinamentu klinika, ne'ebé mak husi ema estranjeiru mak fó treinamentu.

Tanbá ida ne'e mak ita kada loron fó agradese ba Timor-Plaza, hodi motivia juventude sira bele prepara an hodi reprezenta nasaun Timor-Leste ba mundu. Nia dehan, GOLF Federasaun Austrália, Indonézia, Singapura no sira seluk, bainhira ita hetan ona legalidade automatikamente oan sira bele ba joga iha Austrália, Amérika, Japaun, Xina no Brunei. “Bainhira ami fiar programa ida la'o los hotu, timoroan sira iha oportunidade lori Bandeira Timor-Leste ba nasaun sira seluk hodi reprezenta nasaun Timor-Leste ba mundu,” Salienta nia.

Iha sorin seluk Marketin Timor-Plaza iha Hotel no TOP GOLF Lizeti Lucas esplika, óras ne'e dau-daun, juventude ne'ebé mak marka prezensa iha GOLF, durante ne'e, ne'ebé mak atu tama iha federasaun juventude hamutuk na'in-20, maibé ne'e kada ema, ne'ebé mak hakarak involve iha federasaun, ne'ebé kada semana sira mai nafátin tuir treinu no halimar iha ne'e. (BT)