DÍLI----Kordenadór Pilár VII COVID-19, Dr. Nilton Do Carmo Da Silva hatete Atualizasaun dadus Covid-19 iha Timor-Leste Aumenta na’in-2 konfirmadu ne’ebe hela iha ótel Vila-Verde sira na’in-2 mai ho Aviaun AirAsia, ida mai husi UK no Ida seluk mai husi Portugal.

“Komulativu Kazu-46, Kazu Foun Aumenta na’in-2, Atuál Baixa hamutuk Na’in-15,” Hateten Kordenadór Pilár VII COVID-19, Nilton Do Carmo Da Silva liuhusi Konferensia Imprensa iha Palasiu da Sinzas, Kaikoli, Domingu (03/01).

Nia hatutan, Iha loron 22 Dezembru aviaun AirAsia tuun iha Díli ho pasajeiru hamutuk na’in-100. Pasajeiru hirak ne’e na’in-14 hela iha kuarentena ótel Vila-Verde, na'in-8 iha ótel YQ no na’in-78 seluk hela iha kuarentena Otel Regal Apartment, ótel Time Square, ótel Fortuna, ótel Carla Mension.

Nia dehan, Swab foti iha loron 30 Dezembru 2020, no rezultadu relata iha 2 Janeiru 2021. Status pasajeiru hirak ne’e hotu kategoria close contact tamba iha ona istoria kontaktu ho na’in-1 pozetivu detetadu iha Malazia ne’ebe lakonsege mai Timor-Lete. Depois, Kazu pozetivu na’in-2 ne’e hela iha ótel Vila-Verde. Tamba ne’e sidadaun sira ne'ebe konfina iha ótel Vila-Verde hahú ohin estende tan kuarentena loron-14.

“Kazu rua ne’e, mane ho idade-24, asimtomatiku pasajeiru mai husi Portugál iha 20 Dezembru 2020 ho TAP Airlines no tránzitu iha Madrid. Iha data hanesan sai husi Madrid ba Doha ho Qatar Airlines no tránzitu iha Doha, iha 21 Dezembru viájen husi Doha ba Malázia no toba kalan ida iha ótel sama-sama Airport Kuala-Lumpur. Loron 22 Dezembru husi Kuala-Lumpur Malázia mai Díli ho AirAsia.

Depois seluk, Mane ho idade-34, asimtomatiku, Husi Londres UK iha 20 Dezembru ho Qatar Airlines no tránzitu iha Doha. Iha loron 21 Dezembru viájen husi Doha ba tránzitu iha Malázia, iha 22 Dezembru husi Malázia mai Díli ho AirAsia,” Esplika Kordenadór Pilár VII COVID-19, Nilton Do Carmo Da Silva.

Ikusliu nafatin lori ministériu saúde nia naran nomós ekipa Covid-19 hakarak hato’o mensajen ba populasaun hotu katak ita sei iha estadu emerjénsia ita presiza kumpri regras sira ne’ebé ministériu saúde fó sai ona atu prevene moras Covid-19. Ita hotu-hotu hatene ona katak saúde iha idak-idak nia liman rasik tamba ne’e diakliu ita prevene antes halo tratamentu. (BT)