DÍLI----Sekretáriu Estadu Ambiente (SEA) liu husi Komisaun Avaliasaun Impaktu Ambiental (KAIA) aprezenta relatóriu estudu Avaliasaun Ambiental iha kapitál Díli iha Postu Administrativu 4 la inklui Ataúro, ne'ebé mak durante ne'e afeita ba inundasaun. Tuir Sekretáriu Exekutivu Ajensia Nasionál Lisensiamentu Ambiental (ANLA) António Lelo Taci hateten, enkontru ida ne'e atu aprezenta relatóriu dokumentu ne'ebé mak aprenzenta husi Ministériu Obras Públika liuhusi Diresaun Nasionál Drainajen.

“KAIA atu aprenzenta relatóriu asesmentu ba dokumentu ida ho naran Dokumentu Estudu Avaliasaum Ambiental, ne'ebé mak aprenzenta husi Ministériu Obras Públiku liu husi Diresaun Nasionál Drainajen nian," Dehan Sekretáriu Exekutivu Ajensia Nasionál Lisensiamentu Ambiental (ANLA) António Lelo Taci ba Jornalista Business Timor (BT) iha Salaun TradeInvest Kolmera, Tersa (22/12).

Nia hatutan, Projeitu ida ne'e bot no projeitu husi Governu nian, ho total lokalizasaun ne'e hamutuk 36 Km, total husi 26 Km ne'e lokaliza iha Postu 4 la inklui Ataúro.Tanbá ida ne'e mak ami halo aprezentasaun ne'e ba autoridade superior ambiental, no Sekretáriu Estadu Ambiente tuir dekretu leí lisensiamentu ambiental númeru 5/2011. Nia esplika, Tanbasá mak Komisaun Avaliasaun Impaktu Ambiental tenki mosu, tanbá KAIA kualker projeitu, liu-liu projeitu ne'ebé mak klasifikasaun grande projeitu kategória A, presiza hari komisaun Avaliasaun Impaktu Ambiental, nune'e bele halo asesmentu ba projeitu refere.

Agora sese mak involve iha KAIA, ne'e mai husi liña ministeriais sira hotu, liu-liu lina ministeriais sira ne'ebé mak ligadu ho asuntu ida ne'e. Primeiru projeitu konstrusaun drainajen nian, ho ida ne'e mak konvida mós ekipa ne'ebé mak hola parte iha asuntu ida ne'e, hanesan Ministru Obra Públiku, liu husi Diresaun Nasionál Ponte Estrada no Habitasaun Ministru Planu Ordenamentu, Ministru Administrasaun Estatal, Ministra Saúde no Ministru Agrikultura no Peska. “Ho ida ne'e kada Ministériu tenki hare ida-idak ninia área iha asesmentu ida ne'e, hanesan ekipa ida konvida mós parte husi IPG, tanbá ita hotu hatene IPG mós durante ne'e responsablidade ba estudu sira ne'ebé mak ligadu aspeitu geolojia nian,” Haktuir nia. (BT)