DÍLI----Fátin turizmu relijioza Kristu Rei naran ne'ebé mak koñesidu iha Timor-Leste, maske kada tinan Governu tau prioridade nafátin ba fátin turizmu relijioza, maibé realidade fátin turizmu Kristu Rei kontinua laiha bee-moos hodi difikulta vizitante sira. Tanbá ne'e, vizitante sira husu Governu atu hadia fila-fali bee-moos ne'ebé mak iha fátin turizmu relijioza Kristu Rei, tanbá dau-daun ne'e laiha bee-moos kuaze tinan ida ona iha Kristu Rei hodi difikulta vizitante sira, bainhira vizitante sira ba vizita iha tempu fin de semana bee mos laiha.

Tuir Negosiante Virgina da Costa Hateten Senti triste, tanbá faan sasan iha Kristu Rei kuaze tinan ida ona bee laiha, maske Governu kria Sentina no Haris fátin, maibé bee laiha hodi difikulta vizitante sira tanba dala barak vizitantes sira mai husu haris fatin maibe tama ba laran bee laiha. “Komesa mai faan sasan iha ne'e, desde fulan Agostu to'o agora, kuaze tinan ida ona, maibé bee laiha, ami senti triste, tanbá fátin turizmu relijioza kada loron vizitante sira kontinua mai nafátin, maibé difikulta mak bee laiha,” Hatete negosiante Virgina da Costa ba Jornalista Business Timor (BT), Domingu (13/12).

Negosiante esplika, senti triste, tanbá bainhira ami mai faan sasan iha ne'e laiha bee-moos, ami senti atu ba sentina no haris fátin maibé bee laiha, obrigatóriu ami hein faan sasan to'o lokraik mak foin fila dala ida. “Mai faan sasan iha ne'e, kuaze tinan ida ho balun, maibé bee laiha nafátin to'o agora, bainhira ami atu uza bee, lori ami nia osan hodi sosa bee atu uza ba sentina no haris fátin, tanbá realidade bee ne'ebé mak iha ne'e laiha,” Esplika nia.

Enkuantu Virgina salienta, mai faan sasan iha ne'e, kuaze tinan ida ona, maibé Governu liuhusi Diresaun Agua no Saneamentu laiha hodi mai rehabilita fila-fali bee-moos, maske sentina no haris fátin iha, maibé laiha bee atu ita uza lor-loron. Tanbá ne'e, hanesan negosiante rekomenda ba Governu bele mai hadia fila-fali bee-moos, nune'e vizitante sira mai iha fátin ida ne'e, bele utiliza sentina no haris fátin, tanbá fátin ida ne'e fátin turizmu relijioza ne'ebé mak koñesidu iha Timor-Leste inklui mundu.

Virgina subliña, kada loron ema vizitante sira husi timoroan no estranjeiru nafátin mai vizita fátin ida ne'e, maibé atu uza sentina, ami fó hatene katak, bee laiha kuaze tinan ida ona. Tuir nia, faan sasan iha ne'e mak senti iis, obrigatóriu ami tenki ba lalin tasi ben no es batu nia ben hodi lori ba hamos sentina no haris fátin, tanbá vizitante sira mai uza de'it, maibé la uza bee, nune'e bele fó impaktu ba ami nia saúde. Tanbá ne'e, negosiante no vizitante sira husu Governu, bele hakat ba fátin turizmu relijioza Kristu Rei hodi hadia bee-moos, nune'e vizitante sira bele uza, bainhira sira presiza haris fátin no sentina.

Entretantu, iha fatin seluk Vizitante Marcelina de Sousa Haktuir tan katak, Sente lasatisfaz ho fatin turizmu ne’ebe mak kuinesidu maibe bee-moos laiha entaun ida ne’e sai preokupasaun ba ita hodi hadook vizitantes sira mai iha fatin Kristu Rei. Nia haktuir, bainhira haris fátin no sentina laiha bee-moos, oinsa dada turista lokal no estranjeiru sira mai vizita fatin turizmu koñesidu Kristu Rei, tanba laiha bee-moos ida ne’e hatudu momos ema atu kuidadu ambiente ka kuidade imagem Kristu Rei araska.

Tanba, ezemplu deit hanesan ami vizitante dalaruma maluk balun hemu bee Aqua soe tuir dalan, ne'ebé mak soe arbiru tanba be’e laiha entaun buat hot-hotu ema atu kuida susar. Vizitante senti triste, tanbá fátin ida ne'e, fátin turizmu relijioza ne'ebé mak ejiste iha Timor-Leste, tanbá ne'e mak husu parte Ministériu relevante bele tau matan ba situasaun ne'ebé mak akontese iha fátin públiku ida ne'e.

Ne’e dunik, hatan ba preokupasaun hirak ne’e, Ministru Obras Públika (MOP) Salvadór Eugénio Dos Reis Pires profunda katak kona-ba bee-moos ba area Kristu Rei rekopera ona iha fulan hirak liuba, lakleur bee kotu fali. Tanbá ida ne'e mak, Ministru Obras Públika apela ona ba autoridade lokál no Ministeriu Administrasaun Estatal atu koordena hodi hare, nune'e mós kontribuisaun husi komunidade sira, nune'e atu asegura hodi bee labele kotu iha dalan.

Governante ne'e klarifika, “Fulan hirak liuba ami rekopera asesu bee to'o iha leten, hotu tiha derepenti kanu kotu ne'e ita tenki atende, tanbá ne'e siklu ida, maibé ida ne'e, ita nia dezafiu ne'ebé mak ita hasoru,” salienta nia. Tanbá ne'e, agora Diresaun Jerál Aqua no Saneamentu saí empreza públika, sira bele haree di'ak liu tan ba jestaun hirak ne'ebé mak akotese iha Kristu Rei. (BT)