DÍLI----Diretora Sentru Proema Simone Barbosa de Assis hatete prosessu fó formasaun to’o ohin loron graduasaun ne’e, tuir formasaun fulan neen (6) no ba hala’o estajiu iha munisipiu semana rua. “Ami ohin fó graduasaun ba ami nia estudadnte na’in-37 mak tuir kursu gastronomia no nutrisaun iha ami nia organizsaun proema, estudante sira ne’e sira hotu feto foin sa’e no tuir kursu durante fulan neen, no estajiu semana rua iha Munisipiu, oinsa ami hadia parte nutrisaun iha uma laran, no iha komunidade nia laran,”dehan diretora Sentru Proema Simone Barbosa de Assis ba Jornalista BT iha Hotel Luz Klarita, Sexta (18/12).

Diretora ne’e kontete programa ne’ebé mak apoiu husi embaixador Nova Zelandia atu fó edukasaun profisionál ba feto foinsae sira. “Ami kontente tebes tanba prograna ida ne’e atu fó edukasaun profisionál ba sira, ami simu suporta husi Embaixador Nova Zelandia, husi sira nia programa ai-han di’ak ba moris di’ak,” tenik nia. Nia Informa, Graduasuan sira ne’e iha area Gastronomia Hotelaria maibe sira dezenvolve oinsa servisu iha komunidade laran, dezenvolvimentu komunitaria iha Area Nutrisaun, iha munisipiu Baucau, Vikeke, Manufahi, Díli ho Manatutu.

Sentru Proema programa projetu Ai-han di’ak ba iha komunidade nia ne’e apoiu husi embaixador Nova Zelandia, programa ne’e nia Objetivu atu hanoin feto foin sae sira atu aproveita produtu lokál, bele uza produtu lokál iha komunidade atu hadia nutrisaun uma laran.

Husi inisiu tinan 2018-2020 Sentru Proema produs ona juventude sira feto no mane hamutuk na’in-220, maioria idade 16-24, tanba projetu Proema ba vistu ba feto foinsa’e, husi na’in-220 ne’e maoria hetan ona servisu no na’in-9 ba servisu ona iha Portugal iha tinan 2019. Iha fatin hanesan Embaixador Nova Zelandia Philip Hewitt, fó Parabens ba graduadu sira ne’ebé mak remata ona nia formasaun iha Area Gastronomia iha Sentru Proema.

“Ha’u nia votus parabens ba graduante sira, no ekipa husi Proema tomak, ha’u sente orgullu tebes ho buat ne’ebé mak sira halo susesu ona ho imi nia servisu maka’as mak ohin loron susessu ona,” dehan Emabaixador Nova Zelandia Philip Hewitt. Embaixador Nova Zelandia husu ba Graduasaun sira, susessu ne’e imi lori ba aban bainrua no ba futuru imi nian, no labele influensia iha opsaun barak maibe imi sei troka no to’o iha imi nia distinu.

Reprezentante Graduasaun Guida Sousa fó nia agradesimentu ba formador sira hotu ne’ebé mak fasilita sira to’o ohin loron simu ona Gradusaun iha Area Hotelaria. “Ha’u agradese ba Proema nudar Organizasaun ne’ebé empodera ba iha programa Mulher no adolsente, programa ne’e kapaas atu lori ami atu hateke ba oin katak futuru la remata ohin maibe futuru sei naruk,” Hatete Guida Sousa iha nia agradesimentu.

Nia informa, liu husi Proema halo ami nia konhesementu klean kona-ba area Gastronnomia, Proema lori ami atu oinsa bele ba future kompete ba iha nasaun sira seluk, ida ne’e ami prepara-a’an ba kampu traballu ba futuru nian. Depois de Agradesiemntu partisipante sira husi Inan Aman, embaixador Nova Zelandia, Reprezentante Ministeriu Turizmu Komersiu Industria (MTKI) no ajensia sira hotu fahe Serfikadu ba graduasaun sira. (BT)