Hafoin ita ukun an tinan 10 nia laran, ita iha ambisaun ida maka’as atu hola parte Asosiasaun Nasaun sira iha Azia Sudeste nebe baibain temi ho akronim ASEAN. Ita nia vizaun ida mak haree ba jeografika, nasaun sira membru ASEAN ne’e besik liu ita liuliu viziñu boot Indonezia nebe alende raiketan direta, atividade komersiu no negosiu nian barak liu ho nasaun sira ASEAN. Maski Timor Lorosa’e mos nakfati besik nasaun sira illa Pasifiku nian inklui Australia, relasaun ekonomika boot liu ho rai sira membru ASEAN.

Maski ita iha ambisaun maka’as atu tama ASEAN, iha kestaun balu mak ita tenke haree didiak molok tama ba nasaun 10 nebe sai membru ona liuliu aspetu ekonomia tanba koperasaun ASEAN ne’e foka liu ba dezenvolvimentu ekonomia no kultural. Nudar nasaun foin metin iha tinan 10 nia laran, dezenvolvimentu ekonomia iha sei iha okos. Ita nia rekursu naturais bele boot liu nasaun balu membru ASEAN, maibe ita nia rekursu umanu nebe kualifiakdu sei ki’ik liu. Liu-liu rekursu setor privadu sira nudar airiin ba dezenvolvimentu ekonomia to’o ohin loron, ita rasik rekoñese sei sai dezafiu boot ba ita atu sai membru ASEAN.

 

Vise Presidente Ezekutivu Kámara Komersiu no Industria Timor Leste (CCITL) Alberto C. Araujo rasik rekoñese katak bainhira ita tama membru ASEAN, iha vantajen no desvantajen.Ita tama kedas akordu katak ita nakloke atu simu ema liur, ita mos hetan difikuldade atu kompete ho sira iha ita nia rai rasik. Laran taridu ne’e razoavel tanba setor privadu ita nian sei fraku duni. Ita seidauk tama ASEAN deit setor publiku halerik ona ho atake emprezariu estranjeiru sira, satan tama ASEAN tenke simu konsekuensia free flow capital, free flow forsa traballador, free flow imigrasaun.

Haree ba difikuldade nebe setor privadu hasoru, ita aseita governu tenke fo apoiu ba setor privadu sira atu bele haboot kbiit nebe iha nune’e sira bele kompete ona iha setor ekonomia ho membru ASEAN sira seluk. Ita nia setor privadu sira, alende husu suporta kapital no finanseiru hosi governu, sira mos tenke iha esforsu atu labele depende bebeik ba ajuda governu. Durante ukun tinan lima governu ida agora atu remata ona ne’e, iha ona politika fo apoiu ba setor privadu sira nebe nabutuk iha area ida deit mak konstrusaun sivil.

Ba sira nebe hetan suporta governu liu hosi projetu pakote oioin to’o ohin loron tenke iha konxiensia atu investe fali iha area nebe sustentavel hanesan iha agrikultura nebe iha tendensia ba hamoris industria. Labele hanoin depende deit ba projetu konstrusaun sivil hosi governu depois hetan tiha osan uitoan hosi governu, la halo investimentu foun maibe ba estraga tiha iha estranjeiru Bali – Dili ba mai hanesan agrikultor sira ba to’os loro-loron.  Setor privadu sira tenke hanoin ona atu investe iha area agrikultura, pekuaria, peska no turizmu nian, atu nune’e aban bainrua tama ASEAN karik iha ona kbiit halo kompetisaun.

Bainhira ita nia emprezariu sira iha hanoin diak hanesan ne’e, ita la presiza importa foos, la presiza importa na’an-manu, na’an-karau, no ikan maibe ita mak exporta fali sasan hirak ne’e tanba ita sei iha rai luan ba agrikultura atu produs hare, batar, koto, fore, no kafe. Ita iha rai luan hakiak karau, bibi, fahi, manu, no ita iha tasi nebe luan soi ikan oioin deit. Se ita labele aproveita rekursu naturais nebe ita iha ne’e hodi depende deit ba projetu governu, maka labele fo sala ba ema ka entidade estadu nian bainhira labele kompete iha merkadu global ASEAN nian.***

Lali’an:
Setor privadu seidauk iha kbiit tama ASEAN
Tanba ne’e labele hodi osan projetu governu ne’e pasiar Dili-Bali ba mai
Setor industria sei sai dezafiu boot
Tanba emprezariu maioria rame-rame kaer projetu konstrusaun deit
Kompañia 26 implementa PDD distritu Dili
 Tenke iha komitmentu tinan oin halo investimentu foun iha area seluk