Parte governu durante ne’e esforsu daudaun oinsá bele tulun setór privadu sira atu bele iha kbiit hala’o dezenvolvimentu nasional hamutuk setór públiku ka governu nu’udar parseiru. Parte governu durante ne’e rona ona saida mak parte setór privadu sira ne’ebé maioria empreteiru ba projetu governu sempre halerik bebeik, katak sira hakarak sai parseiru governu maibe laiha kbiit finanseiru. Setór privadu sira mos halerik katak sira susar hetan asesu emprestimu ka kreditu iha banku estranjeiru sira ne’ebé eziste iha rai ida ne’e.

Ne’e duni mak halo sira sempre ezije ba governu oinsa buka meius ba sira atu hetan kreditu iha banku ho funan ne’ebé natoon, la’os hanesan banku estranjeiru balu fo kreditu maibe ho funan ne’ebé dehan la’os atu hamoris setor privadu maibe hetok atu hamate de’it. Haree ba problema ne’e governu iha duni sensibilidade atu hatan ba preokupasaun hirak ne’e. Liu hosi sekretaria estadu ba apoiu no promosaun setór privadu governu buka hela dalan oinsa setor privadu sira bele hetan emprestimu iha banku nasional komersiu (BNC).  

Sekretariu Estadu Veneranda Lemos rasik fo ona lia-foun katak tinan oin 2014 iha posibilidade boot BNCTL loke ona kreditu ba públiku tanba governu preve ona orsamentu hodi fo apoiu ba emprezariu no  grupu ne’ebe halao sira nia atividade ekonomiku. Ita apresia ba esforsu governu ne’e no oinsa mak setor privadu sir abele aproveita oportunidade ne’e atu la’o ba oin liu-liu prepara mental ho mehi sai investidor la’os sai nafatin empreteiru. Bainhira governu realize duni ninia komitmentu tulun setor privadu sira, setor privadu mos tenke iha esforsu atu hetan konfiansa hosi banku nu’udar parseiru ba atividade ekonomiku. BNCTL nu’udar banku nasional uniku iha rai ne’e, bainhira fo kreditu karik tenke haree mos ba prosperidade negosiu ne’ebé iha hosi kliente ne’ebé hakarak halo emprestimu. Banku tenke haree negosiu ida bele viavel no sustentavel.

Kestaun ne’e presiza hetan atensaun maka’as mos hosi governu (SEAPRI) ne’ebé fo injeksaun ba BNC, labele akontese hanesan politika governu nian iha banku estranjeiru sira balu, governu fasilita deit empreteiru ne’ebé halo ona kontratu ho governu mak bele hetan kreditu. Seluk husi ne’e labele hetan maski atividade negosiu ne’e hosi empreza puru ne’ebé viavel no iha prosperidade diak. Banku tenke hanoin ida ne’e tanba fo imprestimu ne’e kestaun negosiu ne’ebé banku mos iha obrigasaun eduka no enkoraza empreza ida atu bele moris ba bebeik hodi kontribui ba dezenvolvimentu nasional. La’os servi deit ba empreteiru projetu governu nian.***

Kakein:
“Negosiante  ne’ebé la rejistu sei labele muda bá Taman Mini no mós  tuir feira  ida ne’e. Razaun feira ne’e atu evita de’ít movimentu transporte públiku.”

Ricardo Lay Nheu
Sekretáriu Estádu Komersiu
Business Timor edisaun 185

Lali’an:
* BNCTL iha posibilidade loke kreditu ba publiku
- Ida ne’e mak durante ne’e ita mehi no hein
* SEK la autoriza fa’an paison iha loja     
- Entaun kalan-kalan tarutu hela deit ne’e se mak autoriza?
* UNPAZ hetan subsidiu governu $347.000
- Ida ne’e mak tranparansia, la’os hanesan portal transparansia governu