Sasan importasaun iha merkadu sa’e ba beibeik. Povu halerik ba bebeik. Ne’e akontese hafoin governu liu hosi politika hatun tiha taxa importasaun ba sasan nesesidade baziku ho lei numeru 8/2008 atu importador sira labele hasa’e folin sasan. Tuir lei tributaria refere, taxa ka impostu ba sasan sira nebe tama 2,5% deit hosi sasan nia folin. Infelismente, lei ne’e labele implementa ho diak tanba sei iha importador nebe malandru manipula tiha sasan folin.

Bainhira tama iha portu, aeroportu no fronteira terrestre, importador sira hatudu sasan nebe sira hatama mai ho folin ki’ik tebes. Tuir nota sosa sasan nian nebe sira halo ona kulusaun ho kompañia produtor sasan, ho folin ki’ik para sira tama liu hosi alfandega karik selu taxa ki’ik. Hafoin hatudu “jurus” folin baratu ba Alfandega, bainhira sasan tama ona iha loja laran, folin sa’e fali tuir folin loloos hosi produtor sasan.

 

Ezemplu sasan hanesan bee-mineral aqua dos ida, tuir informasaun Alfandega nian, dala ruma hatama mai presu ne’ebe sira taka ba sasan ne’e Rihun Rp10 vale ba $1.00 (Dollar Amerikanu Ida). Loloos bee aqua dos ida nia folin iha hun ka fabrika ne’eba, importador sira sosa ho folin karik Rp20 ribu. Maibe sira halo nota kontratu ne’e Rp10 ribu deit, atu ne’e selu taxa tun tan. Se sasan folin $1.00 kali 2,5% mak nia tasa $0.03 (sentavus tolu) deit duke ho folin $2.00 selu taxa $0.06 (sentavus neen) boot liu.

Se la halo manipulasaun ba folin at uses hosi taxa, mosu pergunta ida hosi publiku tanba sa mak bee aqua dos ida iha loja grosir sira ho folin $3.25 (aqua gelas) no $4.00 (aqua botol)? Se loos duni folin bee aqua ne’e kada dos rihun 10 Rupiah (dollar ida) tanba sa mak fa’an iha loja ho folin $3.25 to’o $4.00, sa’e 200% to’o 300% hosi folin $1.00?  Tanba ne’e governu tenke halo intervensaun ida ba merkadu, hodi kontrola implementasaun lei tributaria ne’e bele la’o ho loloos. Labele fo sala deit ba importador sira maibe governu mos tenke kontrola sasan nia folin iha merkadu ne’e tuir duni folin loloos ka lae.

Tenke iha liña koordenasaun entre ministeriu kompetente hanesan ministeriu finansas nebe tutela ba servisu alfandega no ministeriu komersiu industria. Iha liña koordenasaun ne’e, parte Alfandega bazeia ba inspesaun ba sasan nebe tama mai ho nia folin tuir nota kontratu, informa ba ministeriu komersiu industria no ambiente iha sekretariu estadu komersiu nian atu bele intervene iha merkadu bazeia ba dadus hosi ministeriu finansas nian, katak sasan ne’e fa’an ho folin normal ka sa’e aas liu. Hanesan ezemplu nebe temi tiha ona, se bee aqua dos ida sosa iha produtor ho folin $1.00, bainhira fa’an ba konsumidor sira sura ho kustu tranporte no selu taxa nian, labele liu $2.00 tanba sa’e ona 100% hosi $1.00 ba $2.00.

Alende ne’e governu mos tenke fasilita importador sira ho infra-estrutura nebe diak hanesan portu no aeroportu, estrada liga ba fronteira, atu nune’e labele prejudika importador sira nia negosiu. Bainhira roo sasan para iha portu semana ida to’o fulan ida mak foin muta sai container hosi nia kabun laran, konserteza kustu transporte ba roo ne’e aumenta. Nune’e empreza importasaun nian sei fo razaun katak sasan folin sa’e tanba roo para kleur iha portu.

Governu mos tenke hadi’a servisu alfandega nian atu nune’e prevene pesoal sira iha terenu labele “main mata” ba malu ho importador sira, depois kontribui ba hahalok manipulasaun ba sasan folin. Tenke iha konxiensia katak nudar servidor publiku, tenke fo servisu nebe diak ba publiku. Tenke ho konxiensia katak moris diak iha ema seluk nia susar leten ne’e sei halo ita moris tempu baluk deit. Sensibilizasaun no solidariedade ba malu entre ita ne’e importante atu hatudu ba nasaun seluk katak ita mos ema nasaun sivilizadu.***

Lali’an:
*.Alfandega: Importador manobra folin sasan
- Importante mak alfandega labele “main mata” fali ho sira
* Investór li’ur 106 investe ona iha Timor Leste
- Basta la inklui ho aileba estranjeiru sira baibain tama sai uma
* SEIK - SEMA sei loke indústria daur ulang
- Ita hein realize, labele sai kompañia “Sei Lda” ka “Sei Unipessoal Lda”
* SEIK sei harii mini merkadu iha área rurál
- Importante harii ba ema, la’os ba bibi mak uza