Apolo J. França da Silva

Programa merenda escolar ne’ebé mak ohin loron governu liu husi Ministériu Edukasaun (ME) halao ho objetivu ikus mak oinsa tulun alunus sira hetan alimentar ne’ebé diak no saudavel, nune bele rezulta kualidade rekursus humanus iha futuru. Programa merenda escolar ne’e bele lao ho susesu wainhira parte integradu no relevantes hothotu kontribui ho ispíritu nasionalismu no responsabilidade. Sasukat husi kualidade servisu ba programa ne’e hodi fó atendimentu ne’ebé diak ba alunus sira mak liña koordenasaun hodi produs mekanismu implementasaun ida ne’ebé efisíensia no efikásia.

Atraves husi programa merenda escolar iha duni efeitu multiplika, katak laos deit prepara hahan ba alunus sira, maibe kria ona kampu servisu ba ema lubuk ida. Ida ne’e signifika katak ema sira ne’ebé involve direita sei hetan rendimentu permanente (durante programa merenda escolar eziste) hodi hadiak sira nia moris. Tan ida ne’e, presija iha seriedade no responsabilidade másimu hodi hetan rezultadu ne’ebé diak no sustentavel.

Ministériu Edukasaun liu husi Diresaun Nasional ba Asaun Sosial Escolar (DNASE) nian, halo ona esforsus oin-oin atu fornesimentu aihan ba alunus sira labele hetan impedimentu ruma (liafuan seluk ita dehan programa merenda escolar labele lao kotu-kotu). Iha variabel lubuk ida mak fó influensia ba programa ne’e, dalaruma lao no dalaruma paradu temporariamente. Variabel ida mak ita bele temi katak kapasidade orsamentu husi grupo fornesidor sira ne’ebé dependenti tebes ba alokasaun orsamentu husi Ministériu Edukasaun. Wainhira alokasaun orsamentu tarde, signifika alunus sira mós la han ona no Ministériu Edukasaun sei sai nafatin alvu ba krítikas husi parte oin-oin. 

Kapasidade orsamentu husi grupo fornesidor sira, nudar parte ida atu garante sustentabilidade aktividades merenda escolar. Orsamentu ne’ebé aloka mai grupo hirak ne’e, dalabarak atende deit fo han ba alunus iha fulan ida ka fulan rua deit. Liu husi fulan ne’e, aktividades merenda escolar mós macet/paradu ona. Problema ne’e mosu dalaruma falha iha aspeitu jestaun finanseira ka utilizasaun orsamentu mak la ho responsabilidade, nune sei afeita mós wainhira atu halo relatóriu final. Falha iha jestaun osan no falha iha relatóriu sei fó influensia boot ba performa Ministériu Edukasaun nian. Tan ba ne’e, importante tebtebes atu parte ME no fornesidor sira tenke solusiona problema jestaun ne’e atu labele difikulta kontinuidade servisu ba atendimentu hahan ba alunus escola ensinu baziku iha teritoriu tomak.

Solusaun ida mak ME liu husi DNASE hahú ho programa inovativu ida ne’ebé kopera ho Ministériu Komérsiu Indústria no Ambiente, Ministériu Saúde no Ministériu Agrikultura no Peskas atraves husi workshop hodi fó kapasitasaun ba grupo fornesidor iha distritu 13. Programa ne’e interesante tebtebes, tan ba liñas ministeriais bele hola funsaun tuir papél ministériu nian. Programa integradu ne’e hahú lansa iha 20 de Junho de 2014 hola fatin iha Salaun Tokodede, Distritu Liquiça, ho partisipasaun husi fornesidores merenda escolar no profesores/as iha ensinu bazika. Lansamentu ba programa ne’e hala’o husi Ministru Edukasaun no Secretário Estadu ba Indústria no Cooperativas. Realizasaun programa workshop ne’e sei halao to iha 8 de Julho de 2014.

Ministériu Komérsiu Indústria no Ambiente hola papél ida importante atu fó formasaun no kapasitasaun hodi hasae koñesimentu fornesidores merenda escolar nian iha area jestaun no kontabilidade. Formasaun no kapasitasaun ne’e importante hodi solusiona problema jestaun finanseira ne’ebé dalabarak grupos fornesidor sira enfrenta hodi labele difikulta tan atendimentu fó han ba alunus sira. Formasaun ida ne’e ho objetivu mak oinsa fornesidor sira bele iha koñesimentu naton hodi jere osan ho kuidadu.

Iha formasaun ne’e, sei haré hikas fali responsabilidade entre grupo fornesidores no parte escola, oinsa parte rua ne’e bele servisu hamutuk hodi asegura aktividade merenda escolar, liu-liu oinsa bele estabelese mekanismu servisu mútua, transparensia, no akuntabilidade. Wainhira iha mekanismu servisu ne’e, sei evita sentimentu diskonfia malu no sentimentu hakarak hariku an rasik, nune mós karik grupo fornesidor sira bele implementa jestaun ida ne’ebé diak, sira bele poupa orsamentu no bele rai osan hodi garante atendimentu hahan ba alunu sira karik alokasaun orsamentu mai tarde husi ME.

Bazeia ba relatoriu vizita Sra. Vice Ministra Saúde Assunto da Gestão, Apoio e Recursos ne’ebé observa direitamenta programa merenda escolar organiza husi Prinseza Tailándia Maha Chakri, fulan Fevereiru 2014, fó inspirasaun no lisaun importante oinsa organiza no melhora programa merenda escolar ho involvimentu minitérius relevantes. Iha Tailándia, involvimentu alunus, profesór/a sira, no entidades relevantes, partisipa direita, hahú husi preparasaun to hetan rezultadu ikus. Ne’e hanesan síklu rotativa ne’ebé sira sempre halao hodi hasae kualidade programa merenda escolar. Programa ne’e hahú husi prepara espasu ba aktividades agrikultura (kuda modo no aihan seluk tan), kahur adubu orgániku, tau matan ba modo tahan (kuidadu, rega no hamoos) to iha prosesu koleita. Iha prosesu ne’e prezensa Ministériu Agrikultura (ekstensionista), profesór/a sira importante hodi bele tulun, akompaña no orienta alunu sira nune sira bele partisipa aktivu.

Husi rezultadu koleita nian ne’e, entrega ba cooperativa escola no membru sira rejista no marka presu ba modo tahan hirak ne’e no fa’an fali ba fornesidores merenda escolar no ba komunidade sira ne’ebé hela besik escola. Ba iha parte ne’e ita bele haré importansia husi cooperativa hodi bele sai nudar ponte transaksaun entre escola ho fornesidor sira. Iha prosesu ne’e kontrola bele fasil liu. Modelu no lisaun ne’e ita bele implementa iha Timor-Leste, liu husi koordenasaun servisu ne’ebé intensivu (ME, MAP, MS, no MCIA). Ita hein projetu pilotu, karik ME hahu ona iha Escola Ensinu Baziku Akanunu, Hera.

Rezultadu ikus, karik ida ne’e mós nudar rekomendasaun ida, liu husi formasaun ne’e, iha inisiativa husi parte fornesidor sira no parte escola bele estabelese cooperativa ida hodi asegura prosesu tomak iha programa merenda escolar. Cooperativa ne’e bele hari’i  iha escola ho inisiativa husi mestri no mestra sira ne’ebé orienta liu ba aktividades ekonomiku, inklui oinsa mak bele halo jestaun ida diak ba aktividades merenda escolar. Cooperativa bele sai nudar aktividade ekstrakurikuler hodi hanorin alunu sira hamosu espíritu enpreendidorismu nivel baziku.

Ita hotu iha esperansa katak ho liafuan baziku cooperativa nian mak coopere (Latin) dehan servisu hamutuk, nudar modalidade ida ita hahú dezemvolve servisu ne’ebé mak iha kooperasaun (koordenasaun, komunikasaun no tulun malu) hodi bele fó valor aas ba dezemvolvimentu nasaun nian. Impresta lia fuan S.E. PM Kay Rala Xanana Gusmão iha Retiru I V Governo Konstitusional iha Dare, 9 de Augostu de 2013: “ita hotu nudar pesa ne’ebé hola parte iha mákina boot estadu nian, governo nudar isin lolon ida, tan ne’e tenke halakon mentalidade departamentalista, sente katak hau mak diak liu. Iha kna’ar balun todan liu, no kna’ar balun k’man, maibe hothotu ki’ik ka boot dezempenha funsaun importante ne’ebé hanesan. Povo persija rezultadu ne’ebé nia bele kaer no sente”.