By Hernani Agostinho Soares

Timor Leste hanesan nasaun foun ho kondisaun kiak iha mundu, maibé pursentajen krescimentu ekônomia Timor Leste boot, komesa husi: 2007 (9.1%), 2008 (12.1%), 2009 (12. 8%), 2010 (9.5%), 2011 (10.8%), 2012 (10.6%), 2013 (10.45). Data emperiku ne’e hatudu katak, krescementu ekônomia Timor Leste avansadu ou rapidu i hetan progresso boot liu kompara ho nasaun desenvolvidu (riku ona), fenomena ne’e ita temi cutch-up effect. Husi tinan 2007-2013, krescimentu ekônomia Timor-Leste ita bele dehan “dinamikú” tebes. Maibé, to’o ohin loron fenomena krescimentu ekônomia ne’e hamosu ideas pro no kontra, i polimiku tebes iha sociedade: tantu organizasaun akademikú, Sociedade Civil ou NGOs, Deputados sira etc.

Pro no kontra ideas ne’e mosu ho razaun diferentes: Governantes ho ninia assessor sira hateten “krescimentu ekônomia Timor Leste 12% ne’e ri’il,” no orgulho. Maibé iha parte seluk; organizasaun akademikú, Sociedade Civil ou NGOs, Deputados sira sente triste no hateten: “krescementu ekônomia ne’e la ri’il ou falsu, tanba timor oan barak mak sidauk sente krescementu ekônomia ne’e rasik.” Tanba ne’e, organizasaun akademikú, Sociedade Civil ou NGOs, Deputados sira sempre exiji redusaun orsamental, maibé governu ignora no optimiza nafatin orsamentu estadu bo’ot ba despeza social no investimentu fiziku.

Optimizasaun ne’e ho objetivu atu atinji krescimentu ekonomia: rapidu, avansadu no sustentável iha futuru (2020-2030), ne’ebé hakerek ona iha Planu Estratejiku Dezenvolvimentu (PED) nian. Rezultadu husi impementasaun ne’e, “iha duni krescimentu ekonomia double digitu,” maibé iha mos “kresciamentu gasta públiku” ne’ebé sedauk bele responde Planu Estratejiku Dezenvolvimentu (PED) ne’e rasik. Ho fenomena ne’e, iha artikel ne’e sei esplika kona-ba: saida mak sei bottleneck  ba krescimentu ekônomiku Timor Leste iha futuru (tinan 2020 ou 2030).

I. Krescimentu Ekônomia Doubel Digitu vs Kiuk ou Pobreza
Maske vizaun dezenvolvimentu ekonomia Timor-Leste artikula ona iha Planu Estratejiku Dezenvolvimentu (PED) katak, “Timor-Leste sei sai nasaun ida ho rendimentu médiu-altu (a upper-middle income country) ho seguru, moris diak, hakmatek no saudável.” Maibé atu atinji objetivu planu ne’ebé refere; perciza hadia politika makro ekonomia no jestaun fiskal ida ne’ebé diak (eficiência no efikaz), prepara rekursus umanu ne’ebé apropriadu, lei no ordem (role of law) ba ekônomia nasional ne’ebé adekuadu no forca, infra-estrutura ne’ebé favorável no apropriadu; atu nune’e bele hamosu krescimentu ekônomia sustentável, inflasaun ne’ebé ki’ik no kria emprego boot. Husi meus hirak ne’e mak sei garante timor oan ba moris diak, saudavel no hakmatek.

Relacionadu ho vizaun PED nian, ita nia  lideranca sira husi governu AMP okupadu hodi halo pull marketing: sosializa planu liu husi media TVTL, RTTL no journal mesak furak deit, i ita mos koriozu no iha esperansa katak; “se planu ne’e haklaok ou realiza ho diak mak sei transforma vida sosiadede Timor Leste husi vida agraria ba iha vida industrial ho servisu.“ Maibé infelismente, durante periodu lima rezultadu mak iha K4: (K1) krescimentu gastu públiku, (K2) krescimentu ekonomiku kiuk, (K3) krescimentu desempregu (K4) krescimentu pobreza.

Nune’e mos akontese iha V governu Konstitusional katak konselu ministru no assessor sira sei optimizadu liu orsamentu jeral estadu (OJE) ba investimentu. Termu ou lia “investimentu” ne’e famosos tebes no pretíjiu liu iha governasaun rua ne’e. Exemplu konkretu ida mak husi prezidente konsellu ministru nian ne’ebé hateten: “iha tinan 2014  orsamentu sei investe makas iha area MGDs, Solidaridade Sosial hanesan subsidiu ba veteranus, idojus, defisente ninian,” (24/10/2013).

Nune’e mos, Assessor Ekonomista ministeriu financa nia liu husi aprezentasaun mos hateten tan katak: “ orsamentu jeral Estadu ba tinan 2014 nian bilaun 1.5 dolar Amerikanu tamba aloka biliaun 1,029 ba investimentu social no fiziku, tokon 295.4 ba investimentu social hanesan: Edukasaun, Saude no programa asitensia social.” Hare’e husi deklarasaun rua ne’e, sira enfatiza iha lia (kata) “investimentu.” Termu prestíjio “investimentu” ne’e rasik dala ruma fo siginifikasaun ambigú, la informativu no kontraversial ba públiku. Tanba ne’e, autor simplifika tia politika orsamentu estadu ne’e ba kategoria rua: (1), konsumpsaun despeza públiku mak hanesan: subsidiu ba veteranus, idojus, defisente, fo’os MTC, pensaun vitalista, saude, edukasaun no bolsu estudu.

Despeza ne’e ita temi government transfer ou transfer payment. (2), Government expenditure mak hanesan despeza ba investimentu fiziku: aumenta salariu, sosa bens i servisu, kapital minor, infraestrutura, Agrikultura no industria. Orsamentu ba despenzas públika ne’e bo’ot liu mai husi fundu petroleum nian, tanba ita hotu hare’e no hatene katak, kontribusaun impostu husi rai laran (rendimentu domestiku) sei ki’ik liu ho porvolta 8-10% deit. Ida ne’e signifika katak, receitas rai laran ne’e rasik sei ki’ik liu i la to’o tan hodi sustenta ba despeza salario i vensimentu. Tan ne’e, decizaun fiskal ne’ebé ita nia lidranca foti mak deficit orsamentu “deficit budget” ou decizaun fiskal ekspansivu; katak, decizaun governu ba gastu públika boot liu fali husi rendementu no hatun taixa.

Politika orsamentu ne’e ho metas atu estimula ita nia ekonomia tanba Timor Leste foin ukun a’an ho fundamentu ekônomia fraku, no foin sai husi krize nasional (post conflict). Rezultadu exekusaun orsamentu husi governasaun AMP no V governo konstitusional hatudu duni krescimentu ekônomia double digitu maibé “mandul ou laiha kualidade.” Indikador lubuk ida hatudu dadauk hanesan: dezenvolvimentu rekursu umanu sei fraku, infra-estrutura sei fraku no laiha kualidade, produsaun sasan husi setor agrikultura la aumenta, bens e servisu sei domina husi importasaun, investimentu nasional la aumenta, nível industria nasional sei ki’ik no desempregu mos sei a’as liu.

Tanba, Setor hirak ne’e iha kait malu maka’as ho krescimentu ekonômiku; katak, kuandu wainhira iha krescimentu ekonômia: mak iha redusaun ba importasaun, produktividade setor agrikutura mos sae (rendimentu agrikultor sira aumenta), Servisu (jasa) no industria aumentu. Nune’e mos, investimentu nasional sae, kampu servisu aumenta, receitas nasaun nia mos aumenta ne’ebé ita temi ceteris paribus. Maibé krescementu ekônomia Timor Leste sae maka’as, desempregu mos sae maka’as, importasaun sae maka’as, numeru kiak aumenta maka’as no recessaun mos sae maka’as (iha 2013 restaurantes barak mak rendimetu tun no servisu/ jasa barak mak taka wainhira UNU nia-misaun remata).

Indikador hirak ne’e hatudu krescimentu ekônomia Timor Leste neneik liu “kiuk no laiha kualidade.” Frakeja hirak ne’e kuandu la hadia ho diak mak sei la atinji vizaun PED nian katak, “iha tinan 2030, Timor-Leste sei sai nasaun ida ho rendimentu médiu-altu (a upper-middle income country) ho seguru, edukadu, moris diak, hakmatek no saudável.”

II. Optimizasaun OJE ba Investimentu vs Desperdicio (Pemborosan)
Kada tinan-tinan governu nafatin hasae proposta OJE ho montante bo’ot, optimizasaun orsamentu ne’e bá investimentu social no fiziku ho sintidu katak “iha tinan 2030, “Timor-Leste sei sai nasaun ida forte ho rendimentu médiu-altu no avansadu.” Maibé durante periodu hitu ona absorsaun kualidade husi investimentu ne’e ki’ik liu i la iha efecensia no efikaz. Ne’e akontece tanba frájil kapasidade institusional no rekursu umanu, la iha sensibilidade tarjet ba servisu no planuamentu integradu ne’ebé hamosu desperdicio OJE, mak hanesan :

1. Investimentu Setor Agrikultura:
Ministério agrikultura gasta orsamentu bo’ot los: hodi fila rai kuaze hektares ba hektares, halo iragasaun no fahe traktor ba agrikultor sira. Politika ne’e ho objetivu atu hasae produktividade produtu agrikola atu nune’e bele transforma no difersifika ita nia-ekonomia, maibé rezultadu saida mak gaina husi investimentu ida ne’e? “laiha produktividade agrikola mak aumenta ne’ebé produtu agrikola sei domina husi importasaun.” Embora programa ne’ebé mak iha “povu kuda governo mak sosa” maibé fos MTC 100% sei mai husi importasaun.

Frakeza ne’e akontese tanba irigasaun ne’ebé sira konstrui ho kondisaun klot: oinsa atu fornece be’e ba natar hodi hasae produtividade, rai ne’ebé sira fila barak mak abandonadu tanba kondisaun iklimatiku no fini la kompetibilidade, traktores ne’ebé fahe la utiliza ho diak tanba feças no mina karun, falta treinamentu no manda funsionario professional hodi advokancia agrikultor sira iha baze, i la iha estudu viabilidade ida hodi buka solusaun ba problema iklimatiku ne’ebé agrikultor sira infrenta. Indikador hirak ne’e hatudu katak la iha sensibilidade tarjet ba servisu no planejamentu apropriadu hodi jere investimentu ne’e.

2. Investimentu Setor Infra-estrutura:
Durante periodu hitu nia laran, orsamentu bo’ot liu mak investe iha setor infra-estrutura maibé investimentu ne’e laiha kualidade i la dura; liliu estradas, pontes no edificios. Ida ne’e akontese tanba la iha quality assurance no quality control husi parte ADN nian. Agora dadauk ne’e Kondisaun estrada husi nasional ba distritu to’o sub-distritu sei a’at nafatin, ne’ebé sei impede processu distribuisan logistiku iha rai laran. Nune’e mos kondisaun infras-estrutura iha portu tantu aero no maritima mos klot los i la favorável, ne’ebé sei hamosu dwelling time (tempu-hein: sasan sai husi portu) ho kleur. kondisaun ida ne’e sei impede krescimentu ekônomia iha Timor Leste.         

3. Investimentu Kapital Minor:
Hatene katak ita nia receitas nasional ki’ik liu maibé ita nia parlamentu nasional no governu prestijiu: hakarak sosa kareta luxu ho folin karun. Kareta luxu hirak ne’e peças mos karun no despeza bo’ot liu ba kombostível, manutensaun no reparasaun. A’at liu tan, kuandu to’o ona tinan lima deputadu sira rasik lelang tia i sira la hanoin katak kareta sira ne’e sei iha “valor kontábil ou depresiasaun” ne’ebé ki’ik no sei bele utiliza ba tinan lima oin mai. EDTL sosa geradores ho folin karun, kostu ba manutensaun no reparasaun bo’ot, i peças mos karun. Nune’e mos, kapacidade makina mos bo’ot ne’ebé loron-loron konsumi mina maka’as maibé rendimentu EDTL rasik la balansu ho osan ne’ebé mak gasta (sai).

Frakeza ida ne’e akontese tanba EDTL rasik la iha jestaun ba tarifa, katak, “subsídiu enerjia hira mak fornece ba governu, povu kiak no ba povu sira ne’ebé mak iha kbi’it.” Nune’e mos tarifa hira mak “imposta (imposed) ba industria, non-industria no ema estrangerio sira.” Tanba la iha certeza ba tarifa, falta jestaun no kontrolu ba uso enerjia: povu barak mak uza enerjia ho livre no gratuita, governu mos uza laiha limitasaun, i ema estrangeiru sira ne’ebé haluga uma pupulasaun nian mos aproveita biban ida ne’e hodi uza enerjia ba sira nia negosio ho tarifa subsídio.”

La konsciente katak lorloron ita sunu hela osan (konsumu total enerjia elétrika) maka’as maibé la iha gestaun aproperiadu husi EDTL hodi halo redusaun ba gastus  no buka meus hodi aumenta reseitas ba EDTL nian. Além ida ne’e,  jestaun ba gastu telefonia, kareta estadu no viajem iha rai-liur no rai-laran la tuir regras no normas. Por exemplo uza telefonia públiku hodi kontaktu familia la tuir regras, uza kareta estadu no gasta konvustebel ba visita familia ou piknik, osan ba viajen ou vizita ba rai liur (perdiem) boot liu i la fo fila tan ba kofre estadu.

4. Subsídiu ba Fo’os MTC:
Subsídiu bo’ot mak gasta ba fo’os MTC maibé la iha gestaun ida diak husi governo hodi kontrola distribuisaun fo’os, ema hotu-hotu sosa ho livre: restaurante no warung sira mos sosa, ema estrangeiru sira mos sosa i ita nia empresario ki’ik sira mos distribui fo’os MTC to’o Atambua-Indonesia nian. Ida ne’e akontese tanba laiha gestaun governo, lei no norma hodi regula distribuisaun subsidiu fo’os. Exemplu ida mak foin lalais ne’e, folin fo’os sae maka’as tanba stock fo’os menus, maibé ministru MCIA  hatan kazu ida ne’e iha diskusaun OJE 2014 hateten, “fo’os iha armajen menus tamba iha tempu natal no tinan foun ema barak mak kompra.” Deklarasaun ministru ne’e hatudu duni la iha gestaun diak ba distribuisaun husi Upstream  to’o downstream, no la iha regulamentu ministerial kona-ba kompra no processu  distribuisaun fo’os MTC.  Gestaun inadekuadu ida ne’e sei habo’ot tan orsamentu subsídiu ba fo’os, i processu distribuisaun sei la ekuitativu: liliu populasaun sira ne’ebé mak hela iha sub-distritu no area rurais. 

5. Kontrolu Jestaun Imposto sei Fraku:
Timor Leste agora dadauk ne’e iha dependénsia bo’ot ba rendimentu husi minarai no gas. Tanba ne’e, preciza melhora governansa tributaria, inklui mekanismu kontrolu no surpervizaun. Maibé durante ne’e governansa tributaria fraku: la profesional, intransparente no la akuntabel. Ho frakeza ida ne’e emar barak mak la iha obediência hodi selu impopstu: ema strangeiros lubuk ida mak sei selu impostu ho la transparante no akuntabel (manipulasaun), i a’at liu tan funcionario balun husi impostu nian mak hensi emar sira nia-SPT ho la akuntabel. Mentalidade no maljestaun ida ne’e kauza rendimentu nasional husi taxa sei ki’ik ba bebeik i sei la prevene deficit orsamentu ne’ebé agora dadauk ne’e pulitiza hela.

6. Investimentu Aumenta Salariu;
Investimentu ida ne’e ho objetivu atu hasae produktividade servidores sira. Maibé fasilidade servisu rasik dala ruma la favorável hodi akomoda funsinario sira nia-servisu. Exemplu ida mak aumenta salariu ba servidores “mendiku no non-mediku” maibé fasilidade servisu la favorável i treinamentu ba dezenvovimentu kompetensia servisu mos sei fraku liu. Mezmu, aumenta salario ona maibé kualidade servisu saude nian durante ne’e sei uituan ho taxa mortalidade pasientes mós a’as. Exemplo seluk tan mak deputadu sira: sira hetan facilidade luxu, vensimentu boot, osan ba vizita ba rai liur ho perdiem bo’ot, pensaun vitalista mos bo’ot maibé balun sei tama servisu tuku 11 i la halao fiskalizasaun ho diak, no apoiu sosa kareta luxu pois lelang tia.

7. Investimentu Rekursus Umanu:
Orasamentu barak mos investe iha rekursus umanu liu husi treinamentu iha rai laran no liur, i mos manda funsionario públiku sira ba estudu iha nivel S1, S2 no S3 ho objetivu atu dezenvolve organizasaun, maibé prestasaun servisu inadekuadu no la fo fatin (oportunidade) ba sira hodi aplika sira nia-matenek. Distorsi koinecementu no habilidades ne’e sei impede produktividade organizasaun nian. Indikador hirak ne’e hatudu duni krescimentu ekônomia Timor Leste lao neneik liu i sedauk bele atinji vizaun PED nian, tanba investimentu fiziku barak mak sei fraku i la iha kualidade: liliu infra-estrutura, agrikultura no rekursus umanu.

Nune’e mos despeza ba social bo’ot liu maibé la kontrolu ho diak, investimetu kapital minor no bens i servisu mos la kontrolu no kuidadu ho diak ne’ebé hamosu desperdicio bo’ot OJE. Maske governu opimizadu liu OJE bo’ot ba investimentu maibé seitor barak mak governu sedauk investi ho diak, mak hanesan: setor turismu, hotelaria, eksportasaun no industria nasional. Além ida ne’e, governansa tributaria sei fraku (la profesional, intransparante no la akuntabel), lei no ordem ba investimentu no selu impostu sedauk forca, estabilidade no siguranca mos sei fraku, no birokrasia mos sei luan liu (la simples) i dificil atu aksesu.

A’at liu tan, mentalidade servidores sira-nian, ne’ebé fasilita liu ema estragerio sira hodi kaer servisu hanesan supplier no konstrusaun  civil (nivel ki’ik no media) duke’e ema timor oan (empresarial nasional) ne’ebé iha ona kapacidade no merece hodi kaer obras. Fator hirak ne’e kuando la hadia no ignora bebeik mak sei sai bottleneck ba krescimentu ekônomia “rapidu, avansadu no sustentável” iha futuru no PEDN sei falha.

Hernani Agostinho Soares, Estudante Programa Dotoramentu, Fakuldade Ekonomika & Business, Departemetu Business Management (Marketing) iha Universitas Kristen Satya Wacana (UKSW), Salatiga. Hela iha Delta I Comoro, no Hp 7724 3189 ou 75462329.