Iha loron 19 Novembru 2013 liu ba Istorikamente konsidera nudár loron mundiál sentina nian deklara husi Organizasaun Mundial Saneamentu iha  tinan 2001, no iha tinan ida ne’e (2013) nudár tinan primeiru ofisiálmente  deklara husi Nasoins Unidas nian, loron ida ne’e kria nudár loron hodi hasa’e konsiénsia públiku hodi luta ba ema biliaun 2.5 iha mundu mak sei hasoru problema la asesu ba saneamentu di’ak, labarik 700.000 iha mundu  mak mate tanba moras diária ne’ebé kauza husi bee ne’ebé la seguru no falta sanitasaun no kada tinan labarik ne’ebé moris iha uma ne’ebé la asesu ba sanitasaun kuaze 60 millaun, maske nune’e dadus hatudu katak ema barak mak iha telefone duke sentina.

Iha Timor Leste tuir census 2010 katak kobertura saneamentu báziku ki’ik iha Timor Leste porsentu 29 de’it husi ema Timor mak uza sentina ho di’ak, inklui porsentu 18 iha area rural sira no porsentu 61 iha area Urbana sira, Hahalok sira hanesan fase liman ho sabaun pratika ona iha uma kain menus husi porsentu 25, asesu di’ak ba bee hemu ne’ebé tulun hadi’a saneamentu no ijiene ne’e mós ki’ik, ho asesu porsentu 57 iha area rural no porsentu 91 iha area Urbana, tanba ne’e kria moras oin-oin hanesan diária, malaria, kólera, ispa, infesaun husi lombriga no mal nutrisaun. Moras sira ne’e hotu afeta, liu-liu ba labarik sira mak tinan 5 mai kraik ne’ebé kbiit laek no laiha lian hodi fó sai saida mak sira sente, tuir dadus katak kada tinan, labarik tinan 5 mai kraik hamutuk 380 mak mate tanba moras diária.

Ho situasaun ne’ebé povu Timor Leste enfrenta agora daudauk governu Timor Leste, define pozisaun no esforsu ba kria ona polítika nasionál ba saneamentu báziku tuir Rezolusaun Governu No 8/2012, 14 Marsu. Polítika ne’e hatuur ona komponente importante tolu mak hanesan: Melloramentu Kuadru Saneamentu báziku, Saneamentu báziku no Ijiene ne’ebé melloradu no finansiamentu ba saneamentu báziku, kada komponente iha polítika ne’e iha kedas estratéjia sira oinsá mak atu responde mai oin. Aleinde ne’e iha ona planu nasionál ba saneamentu estratéjiku ho haktuir ba objetivu husi polítika saneamentu nasionál nian katak hamenus mate no moras no hamosu manán sosiál, ekonomia, edukasaun, no meiu ambiente ba ema hotu-hotu liu-husi eliminasaun seguru ba fo’er perigozu sira husi meiu ambiente no pratika hahalok saudavel sira.

Atu realiza ida ne’e iha rezultadu sira mak hakerek ona iha Planu nasionál ba saneamentu estratéjiku katak ambiente ne’ebé laiha soe fo’er boot arbiru (sentina boot), ema hotu pratika hahalok ijiene konaba uza sentina, fase liman ho sabaun, kuidadu labarik sira hodi labele soe fo’er boot arbiru, ema no instituisaun hotu-hotu sempre pratika jestaun no soe fo’er solidu, líkidu ho seguru. Esforsu sira hotu atu kontribui ba responde Meta Dezenvolvimentu Miléniu 2015 no Planu Dezenvolvimentu Estratéjiku 2030, hanesan: 2015 kobertura ba saneamentu iha area rural 55% no iha area Urbana 80% no to’o iha 2030 iha Urbana no rural atinje 100%.

Ho hanoin sira hotu mak órgaun governu, ajénsia, sosiedade sivíl no komunidade servisu hamutuk hodi selebra loron mundiál sentina nian iha tempu liu ba hodi loke opiniaun públiku atu ema hotu bele iha konsiénsia no mós nudár oportunidade ba entidade hotu tantu governu, doadór no sosiedade sivíl hodi hatuur kometimentu ba problema saneamentu mak povu Timor Leste enfrenta. Ko’alia kona ba saneamentu báziku iha Timor Leste, kuaze entidade hotu fó atensaun maka’as tebes maibé presiza iha kometimentu hamutuk husi parte sira hotu tantu ema mak kaer knaar no mós ema ho direitu, presiza ativu hodi atinje Meta Dezenvolvimentu miléniu no Planu Dezenvolvimentu Estratéjiku nian.

Husi observasaun hakerek na’in katak Ministériu Obras Públiku liu husi Sekretáriu Estadu Agua, Saneamentu no Urbanizasaun ho nia diresaun tomak, Ministériu Saúde liu husi Departamentu Saúde ambientál halo ona promosaun no atividade kapasitasaun ba komunidade hanesan oinsá iha sentina iha uma kain ida-idak, fase liman no hamoos fo’er no tau iha fatin lixu. Maske esforsu sira hala’o daudauk ona maibé konsiénsia ema no uma kain ida-idak tenke aumenta tan. Ko’alia kona ba kestaun ne’e, iha fatór importante tolu: Iha parte primeiru ko’alia kona ba polítika sira no lei lokál ka lei iha komunidade sira; Iha parte segundu ita ko’alia kona ba rekursu material no finanseira no ikus liu mak ita ko’alia kona ba hahalok ema nian no asaun.

Parte Primeiru: polítika kona saneamentu iha ona, maibé polítika kona ba bee no jestaun ba rekursu bee sei iha prosesu dezenvolvimentu ezbosu, ida ne’e presiza aslera, ho nune’e bele iha baze legal ba povu hotu kona ba bee nudár rekursu importante ba povu nia moris, kona ba polítika saneamentu aprovadu ona no halo sosializasaun maibé hahalok ka pratika sira mak kontráriu sei akontese iha komunidade nia leet tanba ne’e governu presiza halo investimentu rekursu liu-liu finanseira hodi sosializa ba povu hotu atu nune’e bele hasa’e ema hotu nia konsiénsia hodi bele harii ida-idak nia sentina nudár responsabilidade família ba moris saudavel no livre husi moras sira hotu.

Parte segundu: kada tin-tinan governu aloka ona orsamentu ba dezenvolvimentu sistema bee moos iha territóriu Timor tomak, kategoria ba Urbana no nivel rural, grupu maneja fasilidade sira forma ona hodi responsabilidade ba kada sistema ne’ebé harii ona husi governu ho organizasaun Naun lukrativu sira, jestaun ka manutensaun ba sistema sira iha nivel Urbana governu mak toma responsabilidade no iha nivel rural grupu maneja fasilidade mak responsavel, tanba ne’e ema hotu tenke kumpre nia devér ho asegura sustentabilidade husi dezenvolvimentu bee no saneamentu. Iha parte ne’e rekursu finanseira importante tebes husi governu hodi hasa’e melloramentu ba bee moos, maibé iha area saneamentu hanesan harii sentina, harii fatin lixu, fase liman nia realizasaun no kometimentu tenke mai husi uma kain ida-idak hafoin governu fó apoia hodi hasa’e kualidade ba saneamentu ne’e rasik.

Parte terseiru: Hahalok no asaun husi ema, família, komunidade no instituisaun, ema ka instituisaun sira iha responsabilidade atu promove hahalok ne’ebé di’ak no sustentável, maske iha polítika ne’ebé di’ak, rekursu material no finanseira ne’ebé adekuadu maibé hahalok no asaun ema ida-idak nian importante no determinante, atu oinsá mak bele iha konsiénsia no pratika iha ida-idak nia família hodi kuidadu ambiente ne’ebé moos, seguru no saudavel. Ho nune’e mak ita bele kontribui ba redús moras mak afeta beibeik no halakon ema nia vida hanesan moras diária, malaria, kólera, ispa sst no mós redús malnutrisaun iha Timor Leste. Mak ne’e de’it maibé atu fó korajen ba lee nain katak “karik ohin ita lee artigu ne’e maka aban foti inisiativa hodi hatutan ba ema seluk no keta haluha hamutuk ho sira foti kedas asaun, antes tarde!!!”

Hakerek nain: Justino da Silva
Servisu nudár Jestór Advokásia
Iha WaterAid-Timor Leste