LAUTÉM----Administrador Munisípiu Lautém (AML) Domingos Sávio, diretamente fo tomada de posse ba estrutura Sentru Komunitaria Aprendisajen Unesco iha Munisípiu Lautém hamutuk na'in-6.
"Administrador Munisípiu Lautém fó agradese no orgullu ba Unesco, tanbá servisu ne'ebé mak importante, ita tenke apresia aproveita oportunidade ho didi'ak, ba sira ne'ebé mak iha estrutura, servisu ho kualidade hodi bele jere orsamentu ho didi'ak, tambá ne'e orsamentu husi Unesco nian, nune'e bele hatudu nia rezultadu ne'ebe mak di'ak," Dehan Administrador Munisípiu Lautém iha ambitu serimonia tomada de posse, iha Salaun Edukasaun Munisípiu Lautém, Sexta (05/05).
AML relata, liga ho situasaun sira ne'e hotu atu ita alkansa ba ita nia objetivu ba moris di'ak fo naroman ba povu, nune'e husu ba funsionáriu sira primeiru mak disiplina iha kualker atividade no responsabilidade, tambá Governu da Ualu ne'e fokus ba dezenvolvimentu mak Ema, hanesan Edukasaun hodi forma sai ema ne'ebe mak di'ak ho kualidade hodi bele halakon beik, liu-liu ba ita nia Joven sira ne'ebe mak hotu de'it iha Pre-Sekundariu no Sekundaria hodi bele hasa'e sira nia kapasidade iha edukasaun Naun Formal.
Alende ne'e mós Sekretáriu Exekutivu Komisaun Nasional Timor-Leste ho UNESCO, Francisco Barreto haktuir, simu tomada de posse hamutuk na'in 6, atividade ohin ne'e husi Komisaun Nasionál Timor-Leste ba Unesco hamutuk ho Ministeriu Edukasaun Juventude no Desportu, planu atu estabele sentru komunitaria aprendisajen iha Munisípiu Lautém, nune'e husu ba Ministeriu Edukasaun Juventude no Desportu liu husi Diretor Edukasaun Munisipiu Lautém hodi forma estrutura ida hodi bele haree programa Sentru Komunitaria Aprendisajen.
Nia dehan, estrutura ne'e forma sira hanaran Sentru Komunitaria Aprendisajen iha valor vijaun Lautém oan rasik, nune'e bele estabelese sentru ne'e hodi bele responde nesessidade komunidade Munisípiu Lautém nian, liu husi programa prinsipal tolu kompostu husi Programa Analfabetizasaun, programa Ekivalensia no programa formasaun abilidade.
Alende ne'e mós sei kria kondisaun, antes sira hala'o atividade sei harii konstrusaun ida, ne'ebe mak ho fasilidade nune'e bele responde ba atividade lor-loron nian, programa ida ne'e iha tempu badak ita sei realiza, tambá programa ida ne'e implementa iha tinan 2020 to'o agora, implementa ona iha Munisípiu hamutuk 6 mak Inagura ona, iha Munisípiu hamutuk 4 mak sei inaugura iha tinan ida ne'e no tinan ida ne'e iha Munisípiu hamutuk 3 mak hanesan Manatutu, Lautém no Oe-Kussi.
Partisipa serimonia tomada de posse ne'e Administrador Munisípiu Lautém (AML) Administrador Postu Administrativu Lospalos, Diretor Servisu Edukasaun ho ekipa, Sekretáriu Exekutivu Komisaun Nasional Timor-Leste ho UNESCO ho ekipa, Xefi Suku sira balun ho funsionariu servisu edukasaun. (BT)
