LAUTÉM----Ministru Administrasaun Estatal (MAE) Miguel Pereira de Carvalho hala'o atividade lansamentu distribui zinku ba benefisiariu sira hamutuk na'in 37 ba Uma Naroman ba Povu (UNP) +B faze da rua iha Suku Ililai Postu Administrativu Lautém Munisípiu Lautém.
"Programa fahe kalen ne'e iha Munisipiu Lautém, kompostu husi Postu Administrativu Lautém no Lospalos, espera tuir mai fahe mos Postu sira seluk hanesan Iliomar, Luro, Lore no Tutuala, maibé ida hanesan dehafiu ida ba Governu tuir mai," hatete MAE Miguel Pereira de Carvalho ba jornalista iha ambitu lansamentu distribui zinku ba benefisiariu sira iha Suku Ililai Postu Administrativu Lautém Munisípiu Lautém, Kinta (04/05).
Ministru Administrasaun Estatal (MAE) Miguel Pereira de Carvalhu hato'o agradese ba populasaun iha Suku Ililai no Postu Administrativu Lautém tomák, ne'ebe mak hala'o servisu ba programa PNDS nian, partikular ba Uma Naroman ba Povu nian.
Nia relata, VIII Governu Konstituisional ida ne'e nia programa prioridade mak ema no sidadaun sira, agora Uma Naroman ba Povu ne'e nia siknifika sira bele hahú moris di'ak, tambá sira bele hela fatin ne'ebe mak dignu atu hela, benefisiariu sira ne'ebe mak ohin simu kalen ne'e tenke taka ho didi'ak labele lori fali ba bu'at seluk.
Iha sorin seluk Administrador Munisípiu Lautém (AML) Domingos Sávio, senti orgullu no kontenti, tambá bele fahe zinku iha Suku Ililai Postu Administrativu Lautém nian, tambá povu mak na'in ba dezenvolvimentu, uluk imi terus iha tinan 24, maibé agora imi presiza dezenvolvimentu, nune'e kontinua nafátin zinku ba ita nia komunidade ne'ebe mak seida'uk iha kbit halo nia uma no programa ida ne'e iha benefisiu duni ba ita nia komunidade sira iha baze.
Lider másimu iha Munisípiu Lautém hateten, programa Zinku ne'e implementa iha Teritoriu Timor laran tomák, iha kapasidade jere orsamentu bot, implementa ba Uma Naroman ba Povu, uluk uma Uma tomák, maibé agora bele simu kalen hodi troka kalen ne'ebe mak at, hodi bele hela, nune'e maho ven loron manas no udan labele kona.
Partisipa Serimonia lansamentu ne'e mai husi Ministru Administrasaun Estatal (MAE) ho ekipa, Administrador Munisípiu Lautém, Diretór PNDS Munisípiu Lautém ho ekipa, Administrador Postu Administrativu Lautém, Komandante Eskuarda PNTL Postu Lautém, Xefi Suku na'in 9, Xefi Aldeia sira, Benefisiariu nain 37 ho komunidade Suku Ililai. (BT)
