DILI - Vise Primeiru Ministru Fernando Lasama de Araujo hatete dezempregu no kiak aas sei fo perigu ba iha nasaun. Tanba ne’e estadu Timor Leste sei fo solusaun lei husi planu no politika oin-oin hodi hamenus dezempregu no kiak iha rai laran. “Kiak no dezempregu nebe aas sei fo perigu ba iha nasaun tanba ne’e estadu no governu ida ne’e atu halo mak sei lori solusaun no dalan hanesan loke vizaun joven sira nian,” dehan Vise PM Fernando Lasama nia diskursu iha espozisaun kareira ba juventude iha CCD, eis merkadu municipal, sesta-feira( 28/09).

Tuir nia katak esposisaun kareira ba juventude ho razaun atu loke vizaun joven sira nia hodi hare saida mak tenke halo agora hodi lori pojetu sira ba iha futuru tuir dalan saida no sei halo saida. Bainhira joven sira iha ona baze ida forte husi agora, tuir Lasama, nudar mata dalan ida nebe bele loke joven sira nia hanoin nebe luan liu iha planu joven sira nia an iha futuru rasik. Nia mos tenik katak wainhira ekipa ida nebe forte, labele hein tanba servisu ekipa sei lori susesu boot ba iha nasaun Timor Leste.

“Ita iha razaun no iha optimistu iha ita nia futuru no iha kapasidade duni atu fo solusaun ba iha problema nebe mak Timor – Leste hasoru liu-liu ba problema juventude ninian.” Lasama hatete iha sekretariu estadu tolu nebe hare ba iha problema juventude mak hanesan Sekretariu Estadu Politika ba Formasaun Profisional no Empregu, Sekretaria Estadu Juventude no Desportu no Sekretaria Estadu Apoiu ba Promosaun Setor Privadu.

“Sekretaria Estadu Apoiu Promosaun Setor Publiku mos ba juventude, tanba bainhira setor privadu iha dezenvolvidu, la’os ema ferik katuas no idozus mak bele servisu 30 dollar mak agora atu ba servisu tenke foin sae sira,” Lasama dehan ba partisipante sira. Vise primeiru ministru kolia kona ba planu ministeriu agrikultor fahe traktor ba iha komunidade sira laos ba sira nebe terseiru idade mak kaer maibe joven sira mak kaer hodi halo servisu.

“Hau ba fatin barak joven sira husu no hau hatete traktor nebe ministeriu agrikultor mai fahe laos husu avo sira mak dudu fali iha natar laran lae maibe imi joven sira mak kaer,” dehan nia. Espozisaun iha CCD ne’e atu oinsa bele motiva no oinsa bele loke foin sae sira nia hanoin. Atividade esposisaun kareira ba joven sira nudar responsabilidade governu ninian. Lasama promete katak nudar vise primeiru ministru nia prontu apoiu tomak ba iha servisu SEPFOPE liu husi esperensia, energia no kompetensia tuir lei nebe haruka.

Nia prontu fo apaiu atu rezolve problema nasaun ninian. Tanba ne’e nia husu eventu ba programa espozisaun kadeira ba juventu tenke implementa mos iha distritu hotu-hotu no mos dezenha orsamentu nebe diak bele too mos iha subdistritu. “Planu sira ne’e labele iha nivel distritu deit tenke ba too iha 75 subdistritu atu fo esperansa ba joven sira katak penganguran no putus eskola laos ona fin husi ema ida nia vida maibe sei iha dala seluk tanba futuru nasaun nian iha dalan seluk,” Lasama dehan.

Iha esposisaun kareira ba juventude sira hetan prezensa husi Vise Primeiru Ministru, Sekretariu Estadu Politika ba Formasaun Profisional no Rmpregu, Sekretariu Estadu Apoiu ba Promasaun Setor Privadu, Reprezentante Sekretariu Estadu Juventude Desportu.
Programa ne’e realiza husi SEPFOPE ho topik Hahu Ohin ba Futuru. Partisipante Dili Institute of Tehcnology (DIT), IADE, Timor Telekom, Sub agrikutor, FFDTL, PNTL no mos husi institusaun sira seluk nebe relasaun ho kampu servisu juventudi nian iha futuru.(R-3)