DÍLI—Sekretáriu Estadu, Indústria no Koperativa, Sekretariu Estadu Komérsiu no Meiu Ambiente, Sesta (21/9), vizita fatin indústria bee-moos iha galon no botir masa ka tofu atu identifika problema saida maka setór indústria sira infrenta. Vizita membru governu rua ne’e mos oinsá atu fó apoiu nafatin hodi hasa’e kualidade no mós kuantidade hodi halo kompetisaun ho bee husi li’ur.

Sekretáriu Estadu Indústria no Koperativa, Nino Pereira hateten nia parte sei mantein nafatin fó apoiu no mós apoiu saneamentu hodi kria sistemasaun ne’ebé di’ak nune’e garante produtu iha merkadu para iha kualidade. “Ami nia kompeténsia maka halo inspesaun ka fiskalizasaun ba sira.

Espera katak ho investimentu ne’ebé maka sira kuda ona iha Timor-Leste bele to’o longu prazu,” Nino dehan ba jornalista sira iha edifísiu Produsaun Bee Mor, Bidau, Díli, Sesta semana kotuk. Nune’e mós, Sekretáriu Estadu Komérsiu Ricardo Nheu katak, indústria bee-moos hanesan parte ida oinsá atu hamenus sasan importasaun husi li’ur, tanba tuir nia haree katak kada fulan TL hatama bee husi li’ur liu kontainer 200.

“Ami haree kada fulan importasaun bee-moos husi rai li’ur hamutuk kontainer 200. Ne’e osan barak maka sai. Fábrika água iha Timor fó vantazen boot ba ita nia rai tanba kompañia ne’e husi Timor,” Nheu informa. Nia hatutan, husi parte Komérsiu nian sei halo polítika oinsá halo promosaun no minimiza importasaun. Nia husu ba populasaun hotu hodi suporta água iha rai laran hodi loke tan kampu de servisu no miniza númeru empregu rai laran.

Aleinde ne’e, Sekretáriu Estadu Meiu Ambiente José Nominando Buras Marins hateten husi parte Meiu Ambiente nia mós nafatin apoiu haree husi aspeitu Meiu Ambiente nian oinsá indústria sira iha komunidade nia leet labele afeta komunidade sira. “Ambiente hola parte iha ne’e tanba atu haree mós ba kestaun ambientál ninian. Kualker atividade ekonomia ninian ne’ebé maka presiza, tanba kualker atividade sempre afeta ba meiu ambiente,” nia esplika.

Nia informa, tenki kuidadu ambiente para labele hetan estaga tanba ambiente mós fó saúde di’ak ba ema. Entretantu, Koordenadór Indústria Produsaun Água Bee Mor, Jhoni Jinggu esklarese, produsaun bee-moos kada loron to’o kaixa 1000. Nia dehan, kuandu produsaun refere maka ema barak koñese ona, sira sei produs barak liu-tan. “Agora ami produs de’it kaixa 1000 maibé sé iha futuru maka merkadu sei presiza, ida ne’e ami sei aumenta tan tanba to’o agora ita fa’an folin kaixa 200 de’it,” Jhoni haktuir.

Nia esplika kompañia refere produs de’it água butir 1500 ml, loron 1 kaixa 600 no ki’ik 400. To’o agora sira seidauk produs água galung tanba ema barak maka halo negósiu ida ne’e. Kompañia ne’e emprega ona timoroan hamutuk 17 no ema estranjeriu 2. Sekretáriu Estadu hirak ne’e mós ba vizita fatin produsaun bee-moos Bemori, Taibessi Likintai, hodi identifika mós problema kompañia bee-moos sira hasoru. Hafoin ida ne’e, vizita mós fatin produsaun tofu no susu been iha Kolmera. (R-2)