DÍLI—Sekretáriu Estadu ba assuntu ASEAN, Roberto Sarmento de Oliveira inkontru hamutuk ho Ministru Komérsiu, Indústria no Ambiente hodi diskuti planu no polítika saida maka TL presiza halo hodi haforsa TL adere ba ASEAN. Roberto informa TL sei presiza formatu balun no mós prepara rekursu umanu no seluk ne’ebé sei reforsa atu lori TL ba sai membru ASEAN inklui produtu TL nian ne’ebé presiza atu promove ba merkadu livre. Nia hateten, Timor-Leste nia preparasaun atu sai membru ASEAN iha diferensa boot kompara ho nasaun membru sira seluk. “Komunidade ASEAN ninian iha pilar tolu. Pilar ida maka polítika no seguransa, ekonomia. Pilar seluk mós maka sosiál no kultura ninian. Pilar tolu refere sai servisu ne’ebé boot teb-tebes ba Timor-Leste la’os de’it Ministériu Estranjeirus maibé kuaze involve ministérius husi Governu tomak,” Roberto dehan ba jornalista sira iha salaun Ministériu Komérsiu, Indústria no Ambiente (MKIA), Segunda (17/09).

Ho pilar hirak ne’e, nia dehan, sira presiza haree husi aspeitu ekonomia ninian sai boot teb-tebes. Tanba ne’e, sira sei fahe informasaun ne’e ba kada Ministériu hodi prepara ita nia an ba adezaun ASEAN. “Ita presiza prepara an. Ita tenkiser mós haree oinsá atu reforsa liu-tan ita nia rekursu umanu, nune’e mós ho ita nia formatu sira ne’ebé maka ligasaun ba tratadu sira. Pur-ezemplu, husi Komérsiu no indústria no ambiente ninian bele haree ona kona-ba oinsá ita nia preparasaun ba produtu sira. Sé karik tama ona iha Timor ita bele promove hodi halo kompetesaun di’ak ba merkadu livre,” nia esplika.

Iha fatin henesan, Ministru Komérsiu Indústria no Ambiente António da Conceição hateten katak husi parte MKIA nafatin promove investimentu iha rai laran hodi prepara TL sai membru ASEAN. “Sertamente ke Ministériu ne’e nia knaar maka atu nafatin promove investimentu mai Timor-Leste ninian oinsá maka iha sentru ba sirkulasaun livre ba ema no mós ho sasan,” nia esplika. Nia hatutan, atu tama ba ASEAN siginifika katak TL tenki nakloke ba komunidade ASEAN ninian oportunidade atu halo negósiu la’os ba de’it ema timor-oan maibé sai mós oprtunidade ba ASEAN nian tomak. (R-2)