DÍLI–Dezempregu kada tinan sempre aumeta (2000 itál ba leten) iha nasaun Timor-Leste tanba relasiona joven sira ne’ebé ramata sira nia edukasaun iha nível sekundáriu no nível universidade.

Tanba ne’e, polítika governu Timor-Leste liu-liu Sekretária Estadu polítika ba Formasaun Profesionál no Empregu (SEPFOPE ) atu responde ba problema refere durante tinan lima ba mandatu Kintu Governu. Katak, sei fó oportunidade treinamentu Tivet ho aprosimasaun ba joven 8400 ne’ebé ramata ona sira nia estudu.

Hatán ba ezijénsia ida ne’e, Sekretáriu Estadu Polítika ba Formasaun Profesionál no Empregu, Ilídio Ximenes hateten, SEPFOPE iha komprimísiu ida servisu maka’as atu oinsá servisu hamutuk ho parseiru dezenvolvimentu hodi promove polítika ida katak kontinua hamosu, hametin sistema formasaun profesionál ida adekuadu relevante tuir Timor-Leste nia ezijénsia.

“SEPFOPE iha komprimísiu ida servi maka’as atu oinsá kontinua servisu hamutuk ho parseiru dezenvolvimentu hodi promove polítika ida hodi hametin sistema formasaun profesionál ida ne’ebé adekuadu relevante tuir Timor-Leste nia ezijénsia merkadu rai laran no mós merkadu rai li’ur,” Ilídio hateten assuntu ne’e iha sermináriu internasionál ba formasaun iha Timor-Leste, foin lalais ne’e.

Tuir nia katak Timor-Leste nia traballadores timor-oan oras ne’e barak servisu iha Korea do Súl no mós Austrália tambén pedidu no rekezitus kontinua tama nafatin atu oinsá bele priense proposta ne’ebé mai husi rai li’ur. “Durante tinan lima liu-ba husi lideransa Benditu Freitas hanesan SEFOPE kria no establese ona buat barak iha institusaun ida ne’e liu-liu hamosu ona sistema iha área formasaun profesionál no empregu, traballiu no empregu sai hanesan fundamentu importante ba ita hotu kontinua dezenvolve ba oin,” Ilídio informa.

Nia dehan, nia kontinua tuir dalan ne’ebé iha hodi hadi’a liu-tan no preoridade maka’as ba dezenvolvimentu direitu tanba tuir nia katak liu husi polítika dezenvolvimentu iha área ida ne’ebé sei prepara joven feto no mane iha kualidade matenek servisu ne’ebé kbit di’ak hodi rezulta produtu ne’ebé povu presiza ba moris. Iha parte seluk, Albano Salem nu’udar Diretór Nasionál Apoiu Formasaun Profesionál (DNAFOP) hateten durante tinan lima ba oin sei kria oportunidade no dezenvolve kualidade servisu iha Timor-Leste.

Tuir Albano , semináriu ne’ebé halo iha salaun inkontru Delta Nova durante loron 2 nia laran sira konvida parseiru dezenvolvimentu hanesan péritus husi nasaun viziñu sira hanesan Austrália, ILO, AusAID, Portugal, Brazil, ADB no mós sira seluk ne’ebé durante ne’e fó tulun ba iha Timor Leste inklui mós paseiru sira husi rai laran hanesan sentru formasaun Kámara Komérsiu Indústria Timor-Leste, KSTL, diretór eskola tékniku, nai ulun suprerior sira no mós diretór jerais, diretór nasionál sira.

“Ita mós halo diskusaun ida ne’e hamutuk ho parseiru no partisipante tomak hodi nune’e rekomenda ba iha governu Timor-Leste atu tau iha konsiderasaunn no inplementasaun planu iha futuru,” nia dehan. Iha tempu hanesan, Vise Primeiru Ministru Fernando La-Sama de Araújo iha nia diskuru hateten, durante ne’e atu atu fó servisu ba ema ruma presiza kapasidade (skill) tanba durante ne’e ema barak presiza traballadores ne’ebé iha kapasidade (skill) maibé sei menus.

Tanba ne’e, nia husu ba iha Ministériu Edukasaun no Sekretáriu Estadu Apoiu Setór Privadu no institusaun relevante ne’ebé sai parseiru governu dezenvolvimentu nasionál Timor-Leste sei hasoru problema barak liu-liu setór privadu seidauk halo buat barak tanba seidauk tuir sistema servisu ne’ebé governu fornese servisu ba. (R-3)