FATISI—Estrada át impaktu husi udan boot ne’ebé akontese iha tinan kotuk difikulta movimentu transporte públiku. Ho kondisaun ne’e, hamate vida ekonomia povu sira nian tanba labele lori sira nia produtu ba merkadu.

“Bainhira estrada la di’ak, konserteza produtu lokál bele sai estraga de’it. Ne’eduni, ami husu ba governu liu husi ministériu relevante tenki tau matan ba estrada iha rai laran,” Marta de Araújo nu’udar komunidade ba BT iha Merkadu Solerema, Fatisi, Distritu Aileu, foin lalais ne’e.

Nia dehan estrada importante tebes ba povu hodi fasilita povu halo atividade ekonomia hanesan fa’an sira nia produtu lokál ba merkadu. “Enjeralmente kondisaun estrada iha Aldeia Fatisi impede ami nia atividade. Ami nia atividade buka moris paradu, entaun mai nia produtu lokál mós konserteza hetan estragus,” Marta informa. Iha fatin hanesan, komunidade Solerema hateten ho vida fa’an produtu lokál maka durante ne’e hodi hatutan sira nia moris maibé agora estrada maka hakotu sira nia atividade atu hetan osan hodi sustenta moris lo-loron.

“Ami husu ba Kintu Governu konstitusionál liu-liu husi Ministériu Óbras Públikus tenki toma atensaun ba estrada ne’ebé át iha sub-distritu refere. Sé bele hadi’a lalais atu bele fa’an sira nia produtu lokál iha merkadu distritál no mós nasionál. Iha fatin hanesan, funsionáriu ONG Belun Mário da Costa hateten nia husi Same atu ba Díli sempre afetadu husi estrada ne’ebé át. Tuir nia katak estrada ne’e di’ak maibé fatuk ponte maka atu monu de’it ona.

Ne’eduni, nia husu ba governu tenki tau mós prioridade ba estrada refere. “Ami atu kona dalan loos Aileu tama to’o Díli maibé ami ta’uk kareta mós barak no mós estrada mós dook, ne’eduni kona dalan korta maka besik,” nia haktuir.  Tuir observasaun BT iha terenu katak estrada ligasaun merkadu Solerema ba liman loos no fila husi liman karuk no mós antes atu tama Manleuana liu husi mota laran maibé dalan besik tebes ba komunidade sira atu viazen ba mai. Maibé, kona-ba ponte dalan Fatisi, Soleremea, sorin atu monu tún ona ba mota kuak. (R-4)