DÍLI—Atu prepara no ajusta programa, tuir planu, Governu no ONG internasionál husi Alemaña Gesellschaft fur Internationale Zusammenarbeit aprezenta proposta ba Sekretáriu Estadu Indústria no Koperativa (SEIK), Nino Pereira hodi identifika prioridade koperasaun iha parte indústria no koperativa.

“Sira hato’o hela proposta hodi husu hanoin ruma husi parte SEIK atu oinsá bele fó mós input para sira bele prepara programa ida ne’ebé ke bele fó rezultadu di’ak tuir planu Governu nian,” Nino informa ba jornalista sira iha nia servisu fatin, Ministériu Komérsiu, Indústria no Ambiente (MKIA), Bebora, Díli, Kinta (20/09).

Durante ne’e, nia haktuir, grupu no individu hetan apoia husi parseiru Governu nian hanesan GIZ maibé atividade ne’ebé grupu no individu sira hala’o ne’e mate no laiha sustentabilidade. Tanba ne’e maka parseiru no Governu haree katak apoiu ne’e tenki fokus ba grupu no tenki sutentabilidade. “Iha inkontru ho koordenadór programa GIZ, Paul- Mathias Braun, ami fó hanoin katak dalan di’ak ida maka tenki reforsa tan setór koperativa para bele garante sustentabilidade husi apoiu ne’ebé fó ba iha grupu joven sira ne’e,” Nino hateten.

Nia esplika koperativa ne’e Governu propoin liga liu ba koperativa produsaun hanesan iha agrikultura, pekuária, peskas no parte koperativa indústria kiik hanesan artezenatu (kerajinan). “Iha sorumutu ne’e, ami mós ko’alia liu-liu kona-ba oinsá bele involve ita nia joven sira iha atividade ekonómikus, ne’ebé ke importante liu maka liga atividade sira para oinsá sira bele harii sira nia grupu indústria kiik no mós grupus koperativa,” Nino hatutan.

Liu husi grupu indústria kiik no grupu koperativa, nia esklarese, bele iha hanoin ida atu produs produtu ne’ebé ke iha vantazen ekonómiku no bele fó servisu ba sira nia án rasik, nune’e mós husi grupu ne’e bele forma ona koperativa ida liga ona ho setór koperativa entaun husi fatin seluk sira bele iha sustentavilidade ba sira nia atividade ekonómiku. Nia akresenta, GIZ rasik haree katak laiha dalan ona para apoia ba ita nia joven sira hanesan individuál, tanba ne’e husi parte Governu liu hu)  si Sekretáriu Estadu Indústria no Koperativa, orienta ona GIZ para oinsá apoia sira ne’e diriji duni ba iha grupu joven sira. (R-2)