DÍLI–Sekretáriu Estadu Polítika ba Formasaun Profesionál no Empregu (SEPFOPE), Segunda (17/09), haruka tan traballadór timor-oan na’in 10 (feto 3 no mane 7) hodi kompleta númeru traballadór 1.074 iha Korea.

Traballadór na’in 10 ne’ebé SEPFOPE haruka sei servisu iha área rua hanesan setór peskas no fábrika. “Sira na’in 10 ne’e, na’in lima ba iha fábrika no na’in neen ba iha peskas atu bele kompleta númeru 1.074 ne’ebé maka agora servisu iha Korea,” Diretór Nasionál SEPFOPE Jacinto Barros Gusmão ba BT iha salaun inkontru SEPFOPE, Segunda (17/09).

Iha seremónia despedida, Jacinto husu ba traballadores timor-oan sira tenki hatudu komportamentu di’ak hodi lori nasaun foun ne’e nia naran iha rai seluk. “Ha’u husu imi tenki hatudu imi nia komportamentu ne’ebé di’ak tuir lei no regulamentu ne’ebé maka iha,” nia hameno. Aleinde ne’e, nia mós informa ba BT kona-ba problema finanseiru ne’ebé traballadores sira balun hasoru wainhira atu ba iha Korea. Tuir nia katak SEPFOPE kria mekanizmu rua. Ida impréstimu liu husi Banku Nasionál Ultramarinu liu-liu sira ne’ebé problema finanseiru. Rua, bele liu husi família.

Jacinto esplika katak osan ne’ebé traballadores timor-oan sira impresta iha Banku Nasionál Ultramarinu Estadu maka tau hodi bele fasilita sira karik bainhira hasoru problema atu bá. “Osan sira ne’e Estadu maka tau iha banku BNU hodi sira halo impréstimu ho montante orsamentu $2.000 kada fulan maksimál selu fali $ 150 depende ba sira,” nia esplika. 70 Resin Ilegal Tabalhadores Timoroan hamutuk hitu nulu resin tama iha lista ilegál iha Korea tanba kontra lei no regulamentu nasaun Korea iha.

Nia haktuir traballadores hirak ne’e ba iha tinan 2009 no 2010 legál husi governu Timor-Leste maibé to’o iha Korea muda fali servisu husi tasi laran no mai iha rai maran no laiha dokumentus legál ida husi sira rasik. Entre traballadores hirak ne’e, Jacinto informa, ida konsege hetan kaptura husi Seguransa Komunitáriu Korea hodi desporta fila ona mai iha Timor-Leste. Razaun traballadores sira tama iha lista ilegál tanba servisu balun traballadores sira servisu ba sente todan hodi sira muda fali husi kompaña ida ba iha kompaña ida.

“Situasaun ida ne’e perigu tebes ba iha traballadores sira nia vida. Katak, wainhira monu ba iha asedenti ruma laiha asuransi ne’ebé bele salva traballadores sira,” nia dehan. Tanba ne’e, tuir Jacinto katak Estadu Timor-Leste liu-liu SEPFOPE oras ne’e dadaun esforsu an hodi rezolve problema ne’ebé timor-oan sira hasoru iha nasaun Korea. Nia akresenta, traballadores sira balun ne’ebé infrenta problema iha Korea estadu TL rezolve ona hodi kontinua servisu fali tuir kompaña ne’ebé sira uluk servisu ba.

Wainhira BT koko konfirma problema ne’e ba iha traballadores timor-oan ne’ebé servisu iha Korea, Mário António Fraga liu husi skype hatete sira sai husi servisu ne’ebé primeiru wainhira to’o iha Korea ho razaun servisu balun todan no mós balun hetan influensa husi kolega balun hodi sira sai husi kompaña ne’ebé primeiru sira servisu. “Ami sai dala ruma servisu todan no mós dala ruma kolega sira influensia (pengaruh) ami dehan iha ne’e servisu kamaan no osan boot hodi ami sai husi servisu ne’ebé ami asumi primeiru,” Mário haktuir. (R-3)