DÍLI—Kompañia Ocean Line, Tersa ( 25/09) aban, sei halo aprezentasaun no loke diretamente ba públiku kona-ba sasan kontrusaun nian iha Díli ne’ebé ho folin baratu no kualidade.

Sasan sira ne’e fa’an ho grosir ka kontainer ho folin baratu ne’ebé sei loke ninia Agen iha Jacinto Departament Store Kuluhun ho sasan konstrusaun hanesan M-Class Ganteng, keramik berglazur Interlocking system, Milan Ceramic Tile , Elephan Gypsum Imagen of Kuality ,Wood plank Elephant ,HABITAT,Super Milan no herkules.

Razaun Ocean fa’an sasan konstrusaun tanba durante ne’e sasan sira ne’e fa’an ona iha Timor-Leste maibé seidauk iha nia agen ida hodi bele halo supply fali jerál ba públiku hodi bele sosa no fa’an fali ba iha distritu ho presu ne’ebé baratu. “Tuir survey ne’ebé kompañia Ocean Line ba iha sasan konstrusaun nia presu iha kapital Díli ás no laiha ajénsia espesializada ida ne’ebé bele halo supply primeiru ho grosir ba públiku atu bele fa’an tutan,” Diretora Ocean Line, Claricia Lay ba jornál BT iha nia knaar fatin, Kuluhun, Díli, Sesta (21/09).

Nia haktuir, durante ne’e Jacinto Departamentu Store no Jacinto fa’an halai de’it ba iha nesesidade lor-loron nian hamutuk item 219 durante tinan lima nia laran. Tanba ne’e, tinan ida ne’e, sira sei establese mós agen ba iha sasan konstrusaun hodi bele fa’an ba públiku. Aprezentasaun ba sasan konstrusaun nian ba públiku sei partisipa husi Ofisiál Kompañia Wings, Kámara Komérsiu Indústria Timor-Leste, Ministru Komérsiu hodi loke diretamete agen konstrusaun refere ba iha públiku.

Diretór Ocean Line mós planu sei loke nia agen mós iha distritu ne’ebé sei servisu hamutuk ho loja sira iha distritu atu bele fa’an sasan sira ne’e ba iha públiku liu-liu ba iha distritu lima ne’ebé maka oras ne’e hala’o survey ona tuir tarjetu ne’ebé iha. “Distritu sira ne’ebe maka tuir tarjetu sei loke ita nia agen hodi supply mós ba iha distritu maka hanesan Maliana, Suai, Baucau, Lospalos no Viqueque,” Claricia informa.

Nia hatutan sasan konstrusaun ne’ebé iha sei lori diretamente husi fábrika Wings mai iha Timor-Leste wainhira kompleta produsaun no sei la liu husi kompañia ida ba iha kompañia ida. “Sasan produs iha Wings lori kedas mai iha Timor-Leste ne’ebé ho nia folin baratu tanba la liu husi kompañia ida ba kompañia ida,” nia esklarese. Claricia mós informa katak liu husi agen Ocean Line sei fa’an folin ne’ebé diferente hanesan kontainer ho folin ne’ebé la hanesan ho gosir maibé ho folin ne’ebé baratu. (R-3)