DÍLI—Governu Timor-Leste liu husi Sekeretáriu Estadu Óbras Públikus (SEOP) konvida kompañia Indonézia, PT. Waskita Karya atu halo rehablitasaun ba ponte Lourba estrada ligasaun Bobonaro ba Suai maske orsamentu ba rehabilitasaun ponte ne’e la tama iha item Orsamentu Jerál 2012.

SEOP Luis Vaz Rodrigues hateten, sira bolu kompañia Waskita Karya atu halo rehabilitasaun ba ponte Lourba tanba kompañia iha tempu okupasaun Indonézia iha TL durante tinan 24 konsege harii ponte kuaze 80%. Tuir nia, Waskita Karya hanesan kompañia ne’ebé kualidade tanba faktus ne’ebé hatudu ponte barak iha Timor laran iha tempu okupasaun kompañia ne’e maka kaer hotu to’o agora ponte hirak ne’e balun sei iha ho kondisaun ne’ebé di’ak.

Luis hatutan ponte Lourba ne’ebé atu halo nia rehabelitasaun ne’e tama iha kategoria urjenti. SEOP mós fó garantia maka’as ba kompañia Indonézia nian ne’e atu hadi’a ponte ne’e no laiha dúvidas ho kualidade ba óbras ne’e. “Sé ita fó kompañia ne’ebé maka laiha konfiansa, ita sei bele dúvidas. Maibé, kompañia Waskita Karya ha’u hanoin laiha dúvidas,” nia tenik ba BT iha nia knar fatin, foin lalais ne’e.

Iha biban seluk, Diretór Waskita Karya, Setijanto Noegroadi hateten, estudu ne’ebé sira halo atu rehabilita ponte Lourba iha estimasaun sei haan orsamentu millaun $12 to’o 15.  “Orsamentu ne’e ba de’it projetu atu hadi’a ponte ne’ebé maka óbras públiku rasik identifika ona atu hadi’a iha tempu badak nia laran,” diretór ne’e dehan. Setijanto salienta, PT.Waskita Karya sei servisu hamutuk ho governu atu dezenvolve projetu iha área oi-oin iha TL hanesan eletrisidade, ponte, agrikultura, irigasaun no infra-estrutura.

Nia informa, iha fulan kotuk sira rasik identifika ona kualidade rai iha parte Lourba. Rai iha Lourba bainhira udan tún rai monu no rai mamar. Tanba ne’e, presiza hadi’a urjenti iha tempu bailoron. Iha fatin hanesan, peskizadór ONG La’o hamutuk Juvinal Dias kestiona projetu ne’e tanba orsamentu ba projetu ne’e la tama iha item Orsamentu Jerál Estadu tinan 2012 nian no husu mós ba governu atu hili kompañia ne’ebé iha kualidade di’ak atu kaer óbra refere.“Povu Maliana no Suai iha direitu atu hetan dezenvolvimentu husi estadu, maibé husu liu-liu ba SEOP tenki haree kompañia ne’ebé maka kualidade,” nia tenik.

Nia haktuir, ezemplu ne’ebé hatudu ohin loron governu hili de’it kompañia sira atu kaer projetu tanba ne’e ladun fó rezultadu ne’ebé di’ak ba nasaun foun ne’e. “Iha tinan 2009 liu-ba, estadu hili kompañia husi Xina kaer projetu konstrusaun eletrisidade no óliu pezadu gasta orsamentu biliaun $ 1,2 maibé kualidade eletrisidade kontinua sai prekupasaun. Tanba ne’e, presiza haree didi’ak kompañia sira molok atu hili,” Juvinal haklaken. (R-5)