DÍLI----Ministeriu Transporte Komunikasaun (MTK) Liu husi Autoridade Nasionál Komunikasaun (ANC-sigla portugés), hala’o atribuisaun sertifikadu Call Sing ho kodigu-4WBN2 no MMSI ho kodigu-550011111 Barco Nasional Ró Berlin Nakroma nian ba Diresaun Nasional Transporte Mariima (DTKM)

Tuir Presidenti ANC, João Olivío Freitas, Hatete, Serimonia ohin ANC atribuisaun sertifikadu Call Sing ho kodigu-4WBN2 no MMSI ho kodigu-550011111 dahuluk ba iha Ró Berlin Nakroma tanba durante Ró Berlin Nakroma movimenta ho Bandeira nasaun Indonesia ninian.

“Eventu dadersan ida ne’e atribuisaun sertifikadu Call Sing no MMSI ba iha Ró Berlin Nakroma, atribuisaun ida ne’e hanesan atribuisaun dahuluk ita halo ba iha Ró nasionál iha Timor-Leste hanesan nasaun soberana ida,” Hatete presidenti ANC João Olivío Freitas ba jornalista sira iha salaun MTK Kaikoli Díli, Kinta (25/11).

Nia hatutan, Durante ne’e berlin Nakroma lao ho sistema komunikasaun ita bele koalia lao ho Bandeira nasaun Indonesia ninian tanba numeru komunikasaun ne’ebé mak rejista ba iha Ró Berlin Nakroma to’o mai iha dia 12 Outubru tinan 2021 ida ne’e numeru husi nasaun vizinu Indonesia.

Entaun ANC hanesan regulador ita halo esforsu ida ho apoiu tomak husi MTK ho kooperasaun diak husi Diresaun Nasionál Transporte Maritima ninian ita depois restora hikas ninia indepedensia Timor-Leste konsege hetan alokasaun dijitu identifikasaun maritima iha tinan 2019, depois ita restaura ita nia indepedensia antes ne’e ita la iha.

“Iha tinan 2019 ita esforsu fo apoiu MTK nian ita konsege hetan, depois hetan MID ita avansa ba ba preparasaun alokasaun ho atribuisaun MMSI ho kodigu ne’ebé mak Timor-Leste hetan ba MID mak 550 ne’e dijitu identifikasaun uniku ba nasaun RDTL hanesan nasaun soberanu ida iha mundu rai klaran,” Esplika nia.

Nia dehan, Wainhira koalia kona ba komunikasaun iha tasi ho maritima ninian Timor-Leste iha ninia kodigu rasik la uza ona kodigu nasaun sira seluk, kodigu ida ne’e mak 550 se iha kodigu telemovel nian karik ita 670 ne’e iha servisu telemovel nian, maibé iha servisu komunikasaun maritima ne’e ita iha 550.

Agora ses husi numeru 550 ita mos iha Call Sing ba Timor nian ne’e mak 4WBN2 wainhira ema mensiona 4W ka iha aviaun hakerek 4W depois tuir fali kodigu sira seluk ne’e bele dehan Ró ne’e husi Timor-Leste nian no numeru dijitu identifikasaun ba komunikasaun maritima nian ne’e 550. Entaun ida ne’e mak hanesan esforsu ida husi ANC atu bele reforsa liu tan identidade RDTL ninia hanesan nasaun soberania ida iha mundu rai klaran.

Iha sorin seluk, Diretor Nasionál Transporte Maritima, Lino Barreto, hatutan tan, Seremonia ida ne’e halao enkolaborasaun entre instituisoens rua mak hanesan Diersaun Nasionál Tranporte Maritima no ANC suporta masimu husi MTK.

“Atu hato’o intervensaun badak ida ne’e hanesan mos relatoriu ba MTK hodi sai hanesan materia ba desizoens politika iha prosesu dezemvolvimentu setor Transporte no Komunikasoens tanba hanesan ita hotu hatene iha mundu globalizasaun numeru dijitalizasaun setor rua ne’e sai xave ba ema nia moris ho lais no efikasia,” Afirma nia.

Maske setor rua diferente maibé iha similaridade ka hanesan tanba entre transporte no komunikasoens iha alvu komum hanesan lori no entrega nesesidade no informasaoens ne’ebé hanesan ba ema no publiku nia nesesidade, ho nune’e mak transporte no komunikasaun nesesariu tebes ba nasaun hodi halo ninia dezemvolvimentu.

“Transporte no Komunikasaun mak sei bele meloria ekonómia nasaun ida ho objetivu ida ne’e mak MTK liu husi VIII governu iha inisiu to’o ohin loron konserta ona buat balun no ohin loron ita halibur iha ne’e hodi marka tan pontu importante ida pela primeira vez Timor-Leste liu husi MTK atribui sertifikadu balun ba ita-nia Ró Berlin Nakroma, sertifikadu hirak ne’e mak sertifaikadu Call Sing no sertifikadu MMSI,” Afirma nia. (BT)