SUAI----Comisaun Nasional das Eleisaun (CNE) nudar órgaun administrasaun independente ho nia kompetensia, kompozisaun, organizasaun no funsionamentu regulada ho lei superziona resenseamentu no aktu eleitoral iha Timor-Leste no diaspora ne'ebe haktuir ona iha konstituisaun RDTL artigu 65:5 nune'e mak CNE Munisipiu Covalima hola parte iha programa edukasaun sivika homemade “Promove esklaresimentu kona ba aktu eleitoral no eleisaun ne'ebe rezilente ho Covid-19” ne'ebe realiza iha Prizaun Suai.

Tuir Diretor CNE Munisipiu Covalima, Hermengildo de Sena, Hatete liuhusi diskursu katak, CNE realiza programa ida ne'e hodi prepara ba iha eleisaun ne'ebe atu mai daudauk iha Tinan 2022 ho 2023.

“CNE realiza programa ida ne'e hodi prepara ba iha eleisaun ne'ebe atu mai daudauk, ne'ebe CNE haree liu ba iha eleisaun prezidensial, maibe eleisaun parlamentar sei dook ne'ebe ami sei dauk koalia to'o iha ne'eba, entaun prezensa CNE nian liu hosi programa edukasaun sivika ida ne'e ho hanoin ida katak CNE sei la diskrimina tantu ema boot ka ema kiik, tantu feto ka mane, tantu ema ne'ebe halimar iha liur no mos ba maun alin sira dadur hela iha prizaun ida ne'e,” Hateten Diretór CNE Munisipiu Covalima, Hermengildo de Sena, liuhusi intervensaun hafoin hala'o edukasaun Sivika ba prizioneru sira iha prizaun Suai, Tersa (23/11).

Nia haktuir, CNE atu esklarese hirak ne'ebe relasiona ho eleisaun ne'ebe atu mai daudauk iha tinan 2022, tan ne'e CNE Munisipiu Covalima realiza atividade ida ne’e iha fatin ida ne'e laos ikus ba ne'e maibe CNE sei kontinua hala'o mos iha fatin seluk ho atividade hanesan.

Sorin seluk, Administrador Postu Administrativu (APA) Suai, Luizinho do Rego, Hatutan, CNE ninia programa ne'e ho hanoin ida katak governu tau ema hotu hanesan, ema hotu iha direitu atu asesu ba kualker informasaun kona ba saida deit tantu aktu politiku ka akru saida deit ema hotu iha direitu hanesan.

“CNE hakarak garante ema hotu tantu ema sira ne'ebe iha prizaun iha direitu hanesan ho ema sira ne'ebe iha liur ne'eba, tan ne'e CNE realiza edukasaun sivika hodi promove prosesu eleitoral iha Covalima,” Haktuir Administrador Postu Administrativu (APA) Suai, Luizinho do Rego.

Nia hatutan, Edukasaun sivika ne'e importante ba ema hotu atu nune'e nudar sidadaun Timor oan bele hatene dever no direitu ne'ebe atu kontribui ba iha prosesu demokratiku iha eleisaun prezidensial sei akontese iha tinan 2022.

Enkuantu tuir Segundu Komandante Eskuadra Postu Suai, Primeiru Sarjento João Alves, haktuir tan, Edukasaun Sivika ne'e importante tebes ba ema atu bele hatene buat hotu.

“Edukasaun sivika ne'e buat ida importante tebes ba ita ema se deit, ita ema la hatene buat ruma se edukasaun sivika ne'e iha, maibe kuandu edukasaun sivika ne'e laiha ita la hatene saida mak akontese iha ne'eba, ho oportunidade ida ne’e hanesan Timor oan apresia tebes inisiativa ne'ebe realiza hosi CNE hodi mai fahe tutan informasaun balu ba maun alin sira ne'ebe hela iha prizaun Suai,” Deklara nia.

Nia afirma, Husi parte polisia iha komitementu no planu karik mosu eleisaun sempre nafatin fo asistensia seguransa masimu ba iha atividade kulker saida ne'ebe mak mosu iha teritoriu nasional liliu iha Munisipiu Covalima. (BT)