DÍLI----UNESCO Ho Ministériu Edukasaun Juventude No Desportu (MEJD) parseiru ho komisaun Nasional Timor-Leste (KNTL) nian ba UNESCO organiza serimónia entrega Livru matemátika no siénsia hamutuk 9.108 ba ensinu báziku terseiru siklu iha Territoriu laran tomak.

“Ohin ita hamutuk ho Embaixador Coreia no reprezentante Nasões Unidas hodi selebra serimonia entrega ona livru matemátika no siénsia hamutuk 9.108 ba Esino Báziku Terseiru Siklu iha Timor-Leste,” Hateten Ministru Edukasaun Juventude no Desportu (MEJD), Armindo Maia iha salaun edukasaun Vila-verde Dili, Segunda (25/10)

Nia hatutan, Serimónia ida ne’e parte ida husi post-projeitu sikulu tolu ba matemátika no siénsia ba ensinu báziku terseiru siklu iha Timor-Leste atu responde ba área edukasaun iha pandemia Covid-19 hodi hasa’e sistema transmisaun edukasionál atu garantia kontinuasaun aprendizajen siensia iha Timor-Leste no atu bele hafasil estudante sira hodi asesu ba edukasaun ne’ebé gratuita no kualidade.

Governante ne’e dehan, Hanesan ita hotu hatene katak livru ne’e sai prioridade tebes ba alunu sira atu haforsa kapasidade nasionál iha hanorin no estuda. Ida ne’e hanesan apoiu bo’ot tebes ba MEJD husi parseiru sira hanesan Governu Koreia COICA (Ajensia Koperasaun Internasional Koreia nian), “Inisiativa ita fahe livru ba alunu sira tanba ita hotu hatene, durante tempu pandemia Covid-19 susar tebes ba alunu sira atu bele asesu ba eskola, lina internet mos susar entaun ita fahe livru ba alunu sira, estudante ida livru ida hodi hafasil sira nia estudu,” Salienta nia.

Nia Informa, Agradese ba Governu Koreia COICA (Ajensia Koperasaun Internasional Koreia nian) no UNESCO ne’ebé serbisu hamutuk ho Ministériu Edukasaun Juventude no Desportu (MEJD) hodi apoiu ona livru matemátika ba alunu sira iha ensinu báziku terseiru siklu iha Timor-Leste, dehan nia.

Iha sorein seluk, Embaixador Repúblika Koreia ba Timor-Leste, Kim Jeong Ho, hatete, Livru sira ne’e, ita distribui ona ba alunu sira no ita sei kontinua apoiu alunu sira atu bele estuda diak liu tan. Orsamentu ba projeitu ida ne’e hamutuk 1.4 miloes. “Mudansa globál ne’ebé akontese liu-liu pandemia Covid-19, obriga ita halo ajustamentu ba sistema edukasaun, tanba ne’e mak ami nafatin kompremetidu atu apoiu Timor-Leste liu husi setor edukasaun hodi fornese livru ba alunu sira,” dehan nia.

Nia dehan, Bainhira Koreia funu hasoru kiak, Edukasaun maka hanesan save diak hodi suporta iha dezenvolvimentu ba ekonómia no sosial. Covid-19 halo estudante sira labele estuda iha eskola no lakon sita nia motivasaun, ho ami (Koreia) ninia esperiensia rasik, maka Governu Koreia sei kontinua ninia komitmentu atu suporta hodi hadia asesu ba edukasaun, atu nune’e estudante sira labele lakon sira nia esperansa.

Entretantu, Diretor UNESCO Jakarta no reprezenta UNESCO ba Timor-Leste, Mohamed Djelid, kongratula no hato’o apresiasaun ba MEJD, KOICA no parseiru husi projeitu ida ne’ebé suporta ona UNESCO atu realiza Livru ida ba estudante ida.

Portantu, Reprezentante UNESCO, Francisco Barreto husi KNTLU no koordenador Nasoins Unidas iha Timor-Leste, Roy Trivedy, entrega livru siésia ensinu báziku ba Mnistériu Edukasaun Juventude no Desportu (MEJD) liu husi Ministru Edukasaun, Armindo Maia, ho prezensa husi embaixador Repúblika Koreia Kim Jeong Ho. (BT)