KOVALIMA-----Vise Ministru Edukasaun Juventude no Desportu (V-MEJD) António Guterres husu ba joven sira atu servisu hamutuk ho autoridade lokal hodi enkoraza komunidade sira ne’ebe mak seidauk vasina, atu bele hakatak ba iha fasilidade saude sira ne'ebe besik hodi simu vasina.

“Ha’u husu imi joven atu servisu hamutuk ho autoridade lokal ha’u husulokal inklui profesor sira nia tulun atu fahe tutan informasaun ba komunidade sira ne'ebe sei dauk vasina bele hakbesik ba iha fasilidade saude hodi vasina kontra Covid-19,” Hateten Vise MEJDAntonio Guterres hafoin hala'o programa sosializasaun desiminasaun informasaun ba kampaña vasinasaun kontra Covid-19 iha Aldeia Busadão, Suku Belekasak, Postu Maucatar, Munisipiu Covalima, Segunda (18/10).

Vise-MEJD Antonio Guterres haktuir, Liu hosi simu vasina mak bele haforsa vida no kuidadu familia sira labele monu ba moras a’at ida ne'e tanba ne’e husu komunidade sira hakbesik ba sentru vasinasaun hodi simu vasina no labele fiar Informasaun falsu iha liur konaba vasina. “Hau hakarak husu ba inan no aman sira lalika fiar informasaun falsu sira no dalan diak liu simu vasina tanba saúde iha ita nia liman rasik, governu la iha hanoin at ba nia povu governu nia papel atu proteje no kuidadu nia povu,” Esplika nia.

Alende ne’e, Diretór Servisu Saúde Munisípiu Covalima, Filipe Pereira Lemos, agradese ba Vise Ministru Edukasaun Juventude no Desportu (V-MEJD), António Guterres ho nia prezensa hodi halo aproxima taxa kobertura signifikativu atinji ona pursentu 88 hela de’it pursentu 12 atu tama ba pursentu 100.

“Hau hanoin ho prezensa Vise MEJD nian iha Covalima hodi fahe 8nformasaun kona ba vasina atu fo neon metin ba ita hodi reforsa servisu parte saúde tanba taxa kobertura vasinasaun iha Covalima sae maka'as la’os médiku sira nia servisu mesak deit maibé autoridade lokal sira mobiliza komunidade no komunidade sira mos konstribui simu vasina mak ohin loron hatudu rezultadu vasina Covalima nian sae maka'as iha nivel nasional,” Haktuir Diretór Servisu Saúde Munisípiu Covalima, Filipe Pereira Lemos

Iha sorin seluk, Xefe Suku Belekasak, Leonito Gusmão, Hatutan liutan, Populasaun iha Suku Belekasak Aldeia Busadão hamutuk 402 hosi número ne’e feto 182 no mane 220, Xefe família 80, komunidade ne’ebè vasina ona dose dahuluk 49 no doze daruak 35. “Durante Vise MEJD nia prezensa iha de’it Suku belekasak hodi tama sai Aldeia, tanba taxa kobertura ba vasinasaun sei mínimo maibé ho prezensa vise MEJD komunidade mos antuziasmu no taxa kobertura vasinasaun Covalima atinji ona pursentu 82,” Afirma nia. (BT)