DÍLI----Sekretáriu Estadu Protesaun Sivil (SEPS) realiza enkontru nivel altu ida hamutuk ho parseiru internasionál no nasional sira hotu ba apoiu umanitária vitima dezastre naturais ne’ebé akontese iha 4 abril liuba.

“Ohin ita realiza enkontru ho parseiru hotu-hotu tanba ita iha hanoin ida katak, presiza iha reuniaun nivel altu ida ho parseiru humanitariu hotu-hotu, korpu diplomatiku no ajensia espesialidada ONU nian nomos NGO internasional sira ne’ebé mak durante serbisu hamutuk ho Sekretáriu Estadu Protesaun Sivil hodi hasoru dezastre naturais ne’ebé akontese iha ita-nia Nasaun,” Hateten Sekretariu Estadu Protesaun Sivil (SEPS), Joaquim José Gusmão dos Reis Martins, ba Jornalista sira iha salaun enkotru UN Campaun Caicoli Dili, Segunda (18/10).

Nia hatutan, Reuniaun ida ne’e, hanesan reuniaun preparativu ida atu hato’o ita-nia agradesimentu ba iha parseiru sira ne’ebé maka iha okaziaun dezastre naturais ne’ebé akontese iha loron 4 fulan abril, sira hamutuk ho ita hodi bele ajuda povu ne’ebé mak afeita ba dezastre refere.

Nia dehan, Husi enkontru ne’e mos ita fó hatene ba parseiria sira katak, ita tenke prepara diak liu tan ho planu emerjensia hodi hasoru dezastre naturais iha ita-nia rai Timor. “Ohin ita mos hato’o planu kona ba povu afetadu sira, para oinsa bele evakua sira no lori sira ba iha fatin seguru, se mak resposabiliza no sasan saida mak ita presiza distribui ba sira. Parseiru sira mos preparadu para oinsa bele ajuda ita nia povu afetadu sira ba dezastre naturais maibé ita mos tenke halo kordesaaun di’ak ho parseiru sira hotu,”Akresenta nia.

Governante ne’e dehan, Ita haree parseiru sira nia prezensa ne’e hatudu ona sira nia komitmentu maka’as tanba ajensia internasional no enbaisador sira partisipa hotu iha enkontru, ne’e hatudu sira nia komitmentu para ajuda ita liu husi sekretáriu estadu protesaun sivil no ita mos presiza halo kordenasaun di’ak ho sira atu bele tulun ita bainhira Timor hasoru dezastre naturais.

Nia relata, Parseiru hotu-hotu iha Timor apoiu ita ba kombate dezastre naturais inklui setor privadu sira. Apoiu sira ne’e, barak liu sasan tanba dezastre akontese ita aloka kedas sasan ba iha sentru dezastre sira. Enbaixada China mak ajuda direita osan hamutuk $100 mil dolar no husi Enbaixada Thailandia apoiu $5 mil dolar no mos husi setor privadu sira kuaze apoiu $4 mil dolar no parseiru barak mak apoiu material. Orsamentu ida ne’e ita uja ba iha operasionál serbisu protesaun sivil ne’ebé mak serbisu 24 oras hodi atende komunidade sira ne’ebe afetadu dezastre naturais.

Ne’e Dunik, Komunidade afetadu sira ne’ebé mak agora sei hela iha sentru akollamentu ita iha ona opsaun ida atu evakua sira ba fali fatin seluk, ne’e hamutuk 69 familia mak hakarak muda. Sira hakarak muda ita sei lori sira ba fatin ne’ebé diak no seguru, ne’e serbisu protesaun sivil ninian.

Nia Akresenta, Familia sira ne’ebé mak lakoi muda ita atu halo saida ba sira tanba agora sira nia uma la eziste ona hanesan sira ne’ebé hela iha mota laran no sira ne’ebé hela iha foho lolon, sei harak muda sira ba fatin ida tenke hatene lai fatin ne’e, se sira hakarak muda ba fali sira nia Munisipiu ka muda ba hamutuk ho sira nia familia iha Dili, ita fo saida ba sira, ida ne’e mak sei nafatin halo prosesu komunikasaun ho komunidade afetadu sira hotu.

“Daudaun sentru akollamentu hamutuk 6 mak sei ativu hela, ne’e kompostu husi familia 131 no balun 135 familia, husi numeru ida ne’e 69 familia mak hakarak muda ba fatin seluk. Protesaun Sivil iha programa rekoperasaun, bele fo material konstrusaun ba sira, nune’e bele hadia no harii ona sira nia uma,” Salienta nia.

Iha sorin seluk, Kordenador United Nation Resident, Hemansu Roy Trivedy, hatete, nu’udar parseiru iha komitmentu ne’ebé forte atu ajuda Governu Timor-Leste durante periudu ne’e, ohin enkontru atu koalia kona ba dezatre ne’ebé akontese iha fulan abril liu ba hodi melloria, aumenta no fortifika resposta ba dezastre naturais iha situasaun emerjensia ne’ebé akontese iha Timor-Leste.

“Ami iha komitmentu forte atu ajuda Governu Timor-Leste liu husi Sekretáriu Estadu Protesaun Sivil durante hasoru dezastre naturais iha periudu tinan ne’e, parseiru sira hotu hamutuk fo apoiu sasan no arsamentu ba komunidade afetadu sira, no ami sei kontinua apoiu Timor-Leste ba dezastre naturais” Afirma nia. (BT)