DÍLI----Relijiaun Lima ne’ebé mak iha Timor-Leste halo serimonia inagurasaun ba Asosiasaun Turizmu Relijiozu (ART) iha Salaun Catedral Dili atu oinsa dezenvolvimentu sitius relijioju ne’ebé barak tebes iha Timor.

“Asosiasaun Turizmu Relijiozu Timor-Leste hari husi Relijiaun Katoliku, Islam, Hindu, Protestante no Kong FuTze, Relijaun lima ne’e ho kompromisu hetan apoiu husi Arsebispu Dom Virgilio do Carmo da Silva no hamutuk ho Bispu sira seluk apoiu atu oinsa maka tulun halo parseria ba dezenvolvimentu ita-nia sitius relijioju ne’ebé barak tebes iha Timor,” Hateten Prezidente Asosiasaun Turizmu Relijiozu Timo-Leste, Pe. Angelo Salsinha, ba Jornalista sira iha salaun Catedral Dili, Tersa (12/10)

Nia hatutan, Fatin Turizmu sira ne’e hotu, ita atur halo didi’ak, liu husi asosiasaun hamutuk ho parseiria Governu para oinsa dezenvolve no promove fatin Turizmu Relijiuzu sira diak liu tan tanba asosiasaun mak bele iha kbi’it no forsa bele halo advokasia ho parseria atu tulun ita. Nia dehan, Buat hotu-hotu bele tau tuir-nia fatin sagradu, nafatin sagradu no fatin profanu nafatin sai fatin profanu, atu buat sira ne’e bele sai edukasaun ida ambientál no armonia ida.

“Ita hotu hatene katak, fatin relijiozu barak liu maka Dioseze Dili, fatin sira ne’e kuaze 40, daudaun halo hela levantamentu dadus no tuir mai mak Dioseze Baucau no Dioseze Maliana hanesan Likisa ho Suai, fatin sira ne’ebé akontese masakre sira iha tempu pasadu,” Salienta nia. Fatin Turizmu ne’ebé bo’ot liu maka Ramelau, Soibada, Cristu Rei, Nain Feto Fatubesi no mos Sr.Morto iha Oe-cusse ne’ebé sai partimonia mundial ne’ebé ita hanoin atu bele hadia no dezenvolve diak liu tan fatin hira ne’e hotu, haktuir nia.

Nia realata, Assosiasaun sei halol advokasia ho Governu para oinsa mak fatin Turizmu sira ne’e, tenke halo demarkasaun ka baliza no tenke halo planu diak ba fatin sira ne’e hotu kompetensia Ministeriu Turizmu hodi bele dezenmvolve.

“Ita hanoin katak, se fatin profanu bele responsabiliza husi Governu no fatin sagradu ka relijiuzu sira bele entrega ba Asosiasaun Turizmu Relijiozu atu bele tau norma no bele iha ordem sagradu, nune’e ita bele respeita fatin sira ne’e tanba ita halo asosiasaun ne’e mai husi relijiuzu sira nia bontade rasik, husi Governu liu husi Ministeriu Turimsu no sosiedade sivil sira no apoiu husi parseria Internasional sira maka USAID, maibé ne’e mai husi ita-nia komitmentu atu hadia ita nia rai Timor,” Hateten Pe. Angelo.

Nia haktuir, Ohin mos halo selebrasaun vizita Amu Papa João Paulo II ba Timor ba dala XXII hodi hanoin hikas amu papa nia mensajen katak, Timor tenke sai Roman no masin. “Ha’u hanoin ho asosiasaun ida ne’e ita bele lori Timor ba oin, tanba ne’e mak asosiasaun nia lema mak fuan tanba ne’e mak Turizmu Relijiozu la’os ita halo komersializasaun kona ba Fiar maibé Turizmu Relijiozu hakle’an ema nia fiar no ema nia identidade kultural nu’udar Trimoroan, moris hanesan ema katoliku, ema sidadaun ne’ebé koalidade ho testamuña fiar, ne’e mak ita dehan Fuan,” Tenik nia.

Nia Afirma, Unidade ne’e mai husi diversidade hanesan Kultura, Relijiaun no hanoin oi-oin atu lori ema ba unidade tanba ema hotu mesak maromak oan no unidade hodi halo buat diak ba ema no nasaun ida ne’e, relijiaun hotu-hotu tenke lori ema ba amizade, tanba ne’e maka liu husi Asosiasaun ida ne’e atu bele hakle’an liu tan unidade, amizade entre Timoroan hotu-hotu, relijiaun no kultura atu sai integradu. Ida ne’e mak sai prinsípiu, misaun no lema asosiasaun nian hodi lori ita nia sosiedade ba masin no sai naroman. (BT)