KOVALIMA----Lia nain husi uma lisan Nikir Kalabu'uk no uma Lisan Amanas, iha Aldeia Sanfuk, suku Kamanasa, Postu Administrativu Suai, Munisipiu Kovalima, iha loron Segunda feira (11/10) ne'e hamutuk ho Autoridade Nasional Petroleo no Minerais (ANPM) hala'o serimonia ritual oho fahi aman ida no manu aman ida hodi husu matak malirin ba rai lulik no bei Ala sira molok kompania operador Timor Recources hakanek rai ba postu mina matan Liu Rai ne'ebe identifikadu ba perfurasaun.

Molok serimonia ritual ne'e hahu lia nain sira husi uma lisan Klaran Haemolin Nai Fatisin, Uma Lisan Sesu Rai Laduka Maneguim no Uma Lisan Babulu Matai hosi Dato Feto no Mane mai hamutuk hotu iha Uma lisan Nikir Kalabu'uk lori fahi ida no manu ida ne'ebe akompana hosi ANPM autoridade lokal no komunidade lao ba iha postu Mina Matan Liu Rai.

Hafoin to'o iha postu Mina Matan Liu Rai lia nain sira oho fahi lori fahi nia raan, Nikir no Kalabu'uk hisik ba iha mina matan no lidun 4 ija fatin perfurasaun no fo han ba rai lulik no bei alla sira hodi husu matak malirin. Tuir Lia Nain Uma Lisan Nilir Kalabu'uk, Bei Lala, Jorge Alves, iha lia hamulak husu ba bei alla no rai lulik atu fo matak malirin ba ema sira ne'ebe serbisu iha fatin ida ne'e no atu proteze ekipamentu sira ne'ebe sei instala iha fatin refete molok perfurasaun hahu.

“Ama tuan sia bei tuan sia rai Sorun Tolu Kamanasa hori uluk kedas hori wain kedas tanba ne'e ohin loron atan ami emar ami hamaroan ba ama tuan no bei tuan sia atu hatudu dadolin hatudu hanoin ba rai ida ne'e, mima matan ida ne'e mina liu rai naran boot sa boot tebes, naran diak sa diak tebes,” Hateten Bei Lala, Jorge Alves ho lia fuan dadolin.

Liu hosi serimonia ritual ne'e Lia nain Jorge Alves husu matebian bei alla sira no rai lulik atu tau matan no fo matak malirin ba trabalador sira ne'ebe serbisu iha fatin ida ne'e halo isin didiak no tau matan no kuidadu material sira ne'ebe sei uza hodi hala'o perfurasau ba mina matan liur rai halo didiak no labele halo at.

Entretantu iha serimonia ritual ne'e partisipa husi Prezidente Autoridade Nasional Petroleu no Minerais (ANPM), IPG, Timor Gap, Administrador Munisipiu Kovalima, Administrador Postu Suai, PNTL Munisipiu Kovalima, Veteranus, dato feto no Dato Mane uma lisan Nikir Kalabu'uk, uma lisan Klaran Haemolin nai Fatisin, uma Lisan Sesu Rai Laduka Maneguim no Uma Lisan Babulu Matai inklui kmunidade Sanfuk, maibe iha serimonia ne'e la hetan.partisipasaun hosi Xefe Aldeia Sanfuk no Xefe Suku Kamanasa rasik. (BT)