DÍLI----Diretor Ezekutivu Forum ONG Timor-Leste (FONGTIL), Daniel Santos do Carmo, Hatete, Forum Organizasaun Naun Governamental Timor Leste (FONGTIL) hala’o ona monitorizasaun ba sentru vasinasaun 29 iha Munisípiu 12 inklui Região Administrativa Especial Oe-cusse Ambeno (RAEOA) atu oinsa ajuda Governu hodi hadia prestasaun serbisu liu-liu parte vasinasaun atu asegura prevensaun Covid-19 iha Timor Leste.

“FONGTIL kontinua halo monitorizasaun iha Munisípiu 12 no RAEOA, atu bele garante partisipasaun sidadaun hotu no suporta Governu hodi hadia prestasaun serbisu liu-liu parte vasinasaun hodi asegura prevensaun Covid-19 iha Timor Leste,” Hateten Diretor Ezekutivu Forum ONG Timor Leste (FONGTIL), Daniel Santos do Carmo, ba jornalista sira liu husi komunikadu imprensa iha Salaun FONGTIL Caicoli, Segunda (11/10).

Nia hatutan, Monitorizasaun sira halo regulamente kada semana ne'ebé FONGTIL organiza ona ba ninia membru, tuir matadalan monitorizasaun ne'ebé kria ona ho pontuasaun valor 1 to'o 3 (1 la diak, 2 naton no 3 diak liu). Husi loron 4 to'o loron 8 fulan outubru, membru FONGTIL halo ona monitorizasaun iha Munisípiu 12 no RAEOA ne'ebé kobre sentru vasinasaun hamutuk 29.

Nia dehan, Membru FONGTIL ne'ebé halo ona monitorizasaun hatudu ona mudansa pozitivu tanba husi sentru vasinasaun hamutuk 29 maioria hetan kategoria di'ak loos iha 13 sentru vasinasaun, iha sentru vasinasaun 14 mak hetan kategoria di'ak no seluk tan hetan kategoria naton, ne'e hatudu katak, Ministériu saúde iha vontade serbisu di'ak no moos iha kolaborasaun ne'ebé metin ho autoridade lokal no membru konsellu suku.

“Mudansa signifikante balun haree husi tasa partisipasaun komunidade ne'ebé aumemta kada Munisípiu, ne'e tanba Governu rekoñese rekomendasaun husi sosiedade sivil. Iha moos deskobrimentu balun ne'ebé sai hanesan preokupasaun husi ita hotu mak hanesan; Komunidade nia konsiensia sei menus, liu-liu ba asegura implementasaun protokolu saúde,” Salienta nia.

Nia rekomenda, Presiza haforsa lina kordenasaun entre autoridade lokal no membru konsellu suku sira hodi asegura komunidade bele hetan vasinasaun. Presiza efetividade halo kampana ka sosializasaun kona ba importansia vasina iha komunidade. Kria estratejia di'ak, nune'e maluk defisiente sira bele asesu ba vasina no presiza mantein prezensa pesoal Saúde sira hodi asegura konsultasaun antes vasina. Hasa’e Konsiénsia komunidade iha fatin vasinasaun hodi kumpre protokolu saude no WHO nian sei menus, hanesan uza máskara no distánsia.

Nune’e, Haforsa Koordenasaun entre lider komunidade no pesoál saúde sira hodi kontinua koordena no servisu hamutuk to baze no aumezmu tempu hasa’e koñesimentu lider komunidade kona-ba vasinasaun no maneira kampaña vasinasaun. Husu ba Ministériu atu halo monitorizasaun ba fasilidade saúde sira hodi asegura iha fatin konjeladór ba konserva ai-moruk, afirma nia.

Iha rezultadu ne'ebé hatudu katak, iha mudansa signifikante kona ba komitmentu governu ba asegura efetivamente halo vasinasaun iha sentru saúde liu-liu ba atendimentu pesoal saúde. Tasa partisipasaun komunidade ne'ebé aumenta tanba iha kolaborasaun di'ak entre ministério saúde ho autoridade lokal no membru konsellu suku.

“Observa ba monitorizasaun semanál no relatóriu sira, FONGTIL observa iha progresu pozitivu husi monitorizasaun no rekomendasaun sira hato’o ona, no ami fiar katak mudansa sira mak akontese tanba kometimentu governu hodi foti asaun ba rekomendasaun sira, nune’e FONGTIL hakarak hato’o agradesimentu ba espasu kolaborasaun mak oferese husi governu no FONGTIL kontinua mobiliza rekursu sira husi perspetiva ONG nian hodi tulun governu iha kampaña hodi hasa’e partisipasaun povu nian iha vasina no tulun governu hodi ultra pasa husi surtu COVID-19,” Informa nia. (BT)