DILI---Antero Pereira ho idade 22, dadaun ne’e hala’o estudu iha Úniversidade Nasionál Timor Lorosa’e (UNTL) Fakuldade Agrikultura no Departamentu Agro Sósiu-Ekonómia hateten, Kultura Timor-Leste lakon bainhira nia ezistensia iha aera Globalizasaun ne’ebé maka tuir peskizano prátika iha Jerasaun foun agora no ba futuru tanba dadaun hahú mihis ba bebeik.

“Nasaun Timor-Leste hosi tempu antes nasaun Portugal mai ukun ka invade ita-nia nasaun Timor-Leste, rai Timor-Leste forte nanis ona iha nia lisan kulturalmente ho animizmu hodi adora fatuk-lulik, ai-lulik no be'e-lulik sira hotu, Ho ida ne’e, ita nia Bei'ala sira seida’uk hatene, koba-bá relijiaun momentu ne'ebá no ita nia Bei'ala sira mantein iha ita nia kultura animizmu iha moris loron-loron nian, hodi hamoris sira nia futuru,” Hateten Antero Pereira ba Jornalista Bisnis Timor (BT) iha Fatuhada, Segunda (11/10).

Nia hatutan, Mai iha tempu okupasaun Indonesia nian, tuir ístoria ne'ebé ita intende liu iha tempu ne'ebá feto Timor oan barak mak hatene ona buka idak-idak nia individual, no nia moris iha sidade laran hodi hetan rendimentu ne'ebé nesesária nune'e bele responde ba sira nia vida loron-loron nian, hanesan hahú ona sira nia moris hanesan fila liman ka fa'an sasan iha Merkadu no estrada ninin.

Depois iha ona mudansa balun hosi sira nia hatais no modifika vestuáriu komersiál, sira nia-an tuir toman ne'ebé influensia boot hosi kultura nasaun sira seluk ne'ebé lori mai iha momentu ne'ebá, no hatene ona hatais kalsa naruk, vestidu naruk, dansa tuir múzikano sira seluk.

Antigamente Timor-Leste moris nu'udár nasaun ida ne'ebé moris iha mundu animisme nian ho kultura fundmentais sira hotu tuir realidade no istória lulik kultura Timor, ne'ebé nu'udár parte ida ne'ebé moris nanis ona husi ita nia beila sira, to'o ita nia nasaun Timor-Leste hetan Restaurasaun Independensia iha loron 5 fulan Maiu no tinan 2002 liu ba tuir istórikamente povu Timor moris ho kultura tradisionál, ai-moruk mós Bei'ala sira uza ai-kulit hodi kura moras prenvensaun nativísmu, tan la iha Hospital hodi sira hetan tratamentu Saúde ho fasilidade teknolójia nian.

Nia Dehan, Moris hanesan povu Agrikultura, moris loron-loron hanesan ba to'os no natar hodi serbisu buka moris ba hahán kabun laran nian no sustenta moris familiár nian. Tanbá ne’e mak, Bei'ala sira nia kultura hatais roupa mak hakfolik de’it ho sasan kultura ne'ebé maka iha, Feto sira uja tais feto, no mane sira uja tais mane nian, nune'e mós inan feton sira nia servisu iha uma hein labarik,soru-tais, fai-batar,fai-hare, prepara hahan ba sira nia laen kaben ne'ebe mak ba serbisu iha to'os no natar iha tempu loron (dailylife).

Maibé agora nasaun Timor-Leste hetan ona independensia iha ona mudansa evolusaun ne'ebé boot tebés iha aspeitu jerál liu-liu iha sosiedade nia leet, tanbá ita nia nasaun adapta ho sistema demokrásia, ho nune'e sidadaun hotu-hotu mós agora halo mudansa evolusaun ba sira nia-an iha parte di'ak no at.
Oras ne'e dadaun Timor ukun rasik-an ona, nasaun barak mak mai visita rai Lulik Timor Lorosa'e, intermus hosi Turismu Lokál, Turismu Relijioja, Turismu Istóriku, Turismu Kulturál, Turismu Nasionál hosi ne'e estranjeirus sira lori sira nia kultura molik mai hatudu no prátika ba ita povu Timor hosi sira nia vizitasaun.

“Ita Jerasaun foun sira hahú prátika tuir kultura ema estranjeirus sira nian, hodi haluhan tiha kultura Timor nian, tuir ita hotu haree ba realidade agora hosi ita nia inan feton no joven feto barak mak hatais roupa husar Saía, Kalsa Badak,Vistidu badak no parte seluk mós ita nia komunikasaun la efetivu.

Nia relata, Atetude ne'e hatudu ba jerasaun tuan sira iha ne'ebé hela iha foho hodi konta fali sira nia vida moris iha tempu nakukun nia laran., nune’e, haree hosi karakterístika jerasaun foun dalabarak jerasaun tuan sira hateten, ba ita jerasaun foun katak, ami uluk moris iha tempu nakukun laran buat modelu no atetude vestuáriu sira nee ami la komprende no laharee, maibé infelismente tempu agora imi jerasaun foun sira komesa hatudu no prátika imi nia modelu liu hosi imi nia hatais aplika tuir ona ema malae sira nia kultura hatais, kelen sai husar sai no komunikasaun.

Ne'e realidade ne'ebé hatudu no hetan prátika totalidade momós iha aspetu sosiedade nia matan katak, jerasaun foun hahú prátika barak liu ona kultura modernizasaun nian hodi defini ita nia-an hanesan ema estrajeirus ka malae, bainhira jerasaun foun sira hosi Díli ba Munisípiu Postu Administrativu sira hatudu no prátika makás kultura malae nian ne'ebé sira aprende iha sidade laran.

Maske tuir ita nia Konstituisaun Repúblika Demokrátika Timor-Leste (KRDTL) iha artigu 59 ko'alia kona-bá Edukasaun no Kultura no iha aliña 5 hateten katak, sidadaun hotu iha direitu atu goza no hari'i kultura hanesan nia obrigasaun atu haburas, defende no fó valór ba patrimóniu kulturál.

Maibé Estudante Antero ne’e profunda, sidadaun barak mak laiha konsiénsia umanidade atu fó valór ba patrimóniu kulturál nian ho responsabilidade, tambá ita haree fali husi ita nia (KRDTL) iha artigu 29 ko'alia kona-bá, Direitu ba moris no iha aliña 1 hatete katak, labele viola ema ida nia vida no iha aliña 2 mós hatete katak,Estadu rekoñese no garante direitu ba moris, nune’e sidadaun hotu halo tuir saída maka sira nia hakarak atu halo no laiha ema ida atu viola sira nia direitu no laiha ema ida mak atu limita sira nia espasu iha vida loron-loron nian.

Entaun iha tempu ida agora jerasaun foun mai ho karakterístika ida ne'ebé jeneraliza tiha entre ezisténsia kultura no ezisténsia globalizasaun tuir sira nia kostume ida-idak nian,ho nune'e fó impaktu boot ba ezisténsia kulturál nian ne'ebé horik nanis ona iha ita nia moris antes ita hetan independensia ho totalmente.

Tanbá ne’e, tuir realidade ne'ebé ita nota katak, Timor-Leste agora iha era ne'ebé ho nia mentalidade dilemátiku no ki’ak iha moralidade, nune’e konsikuênsia ne'ebé ita hetan mak haluhan ita nia kultura, saí traidór ba ita nia kultura, fa'an ita nia kultura, la fó valór ba dignidade kultura no ita nia Bei'ala sira nia ezisténsia, sai bainaka ida ba nia kultura rasik no fó oportunidade ba ema seluk, atu hanorin fali ita nia kultura nia ezisténsia hosi uluk to'o agora nian.

Tanbá ne’e, saí famozu iha aspeitu mudansa evolusaun iha era globalizasaun nian no ita laiha rekuperasaun morál ba iha parte kulturál nian, ho razaun ita laiha responsabilidade morál hanesan umanu iha nasaun ida ne'e no lakohi kontribui hosi parte kulturál nian ne'ebé saí hanesan prosesu fundamentál ba ita nia vida umanu nian,

“Fazeadamente ita jerasaun foun balun iha ona inisiativa boot halo promosaun ba ita-nia kultura iha mundu kompetetivu nune'e nasaun seluk atu rekoñese ho rasionalidade,maibé parte seluk hosi ita nia Estadu sei dauk iha ambisaun dignitivu hodi kria kondisaun ne'ebé favorável hodi oferese ba jerasaun foun atu halo promosaun legalidade tuir estandarte mundu internasionál nian,entaun ida ne'e ita labele garante ho di'ak tambá laiha komponente ida ne'ebé atu halo apresiasaun ba inisiativa tomak,” Katak nia.

Nudar Timoroan labele susesu iha inisiativa no kreatidade sira ne'e no ema rai seluk kontinua domina ita-nia kultura, tuir sira nia peskija no vizitasaun hotu, estranjeiru sira saí parte dominante ida ba ita nia kultura hahú hosi nasionál no rejionál ne'ebé sira halo prosesu peskija refere. Nasaun Timor-Leste iha vida naruk liu ba moris iha mundu animisme ho kultura fundemetais sira hotu-hotu,nune'e hanesan sidadaun Timor oan nafatin valoriza no dezenvolve ita nia kultura ho efetivu no kualidade iha ita nia moris loron-loron iha ita ida-idak nia ambiente natural no Global.

Nafatin tau aas dignidade kulturál sira nia ezistensia ne'ebé hahú husi Bei'ala sira nia tempu to'o mai agora ita jerasaun foun nia ezistensia nian,ho nune'e nu'udar jerasaun foun keta minimiza no halo eksplorasaun ba ita nia kultura sira hodi haluhan ita nia kultura no ita nia Bei'ala sira nia liman-fatin no ain-fatin sira hotu ne'ebé husik hela mai ita nu'udar jerasaun foun.

Dadauk ne'e ita nia nasaun afetadu boot tebes hosi kultura modernizasaun ne'ebé influensia ona sidadaun iha étapa jerasaun foun nian,agora jerasaun foun toman ka adapta ona ho kultura modernizasaun ne'ebé moderniza hotu ita jerasaun foun nia isin,fuan no klamar hotu iha mundu agora. No kultura lakon nia ezisténsia tamba emosaun jerasaun foun nian, no ita halakon ezisténsia kultura tamba pratikamente hosi ita jerasaun foun ne'ebé nakonu ho ambisaun hodi halo mudansa ba evolusaun iha mundu globalizasaun nian tuir kultura malae nian ho domin no fuan.

Maka ikus ita nain rasik tenki sai bainaka ba ita nia kultura rasik no husik hela malae sira kontinua habobar sira nia kultura global hodi domina ita nia moris loron-loron nian,tamba ita liberta ona sira nia kultura iha ita nia moris sosiál nian

Hosi artigu nee hakarak atu husik hela rekomendasaun ba ita ne'ebe moris iha (vida no era sibernísta) nu'udar jerasaun foun presiza defini ita nia an ho lolo'os iha era milineiál no globalizasaun ida ne'e ho matenek no maduru iha fileira beiala sira nian, para bele fasil ba ita hodi aprende ema nia kultura maibé nafatin diknifika ita nia kultura nia ezisténsia iha ita nia moris loron-loron iha nasaun RDTL ida ne'e ho kualifikadu no prosperiedade ,nune'e mós keta aprende ema nia kultura hodi destroi no haluhan ita nia kultura rasik,hanesan venonu aat ne'ebé supa ita nia isin,fuan no klamar tomak. (BT)