KOVALIM----Xefe Suku Ucekai, Antonio da Silva, Deklara ba Ministru Obras Publika (MOP), Salvador Eugenio Soares dos Reis Pires, hafoin hala'o programa sosializasaun desiminasaun informasaun ba kampaña vasinasaun kontra Covid-19 iha Suku Ucekai, Postu Administrativu Zumalai katak hahu husi Timor-Leste restaura ninia independensia mai to'o ohin loron komunidade iha Suku Ucekai, seidauk asesu ba iha infraeatrura bazika.

“Ema hotu sente ona Timor-Leste ninia independensia ba nia diak ne'e só uniku suku Ucekai, Ucekai mak sente independensia ida ne'e tanba atu bee moos ka eletrisidade no estrada buat sira ne'e hotu iha Ucekai sei susar, ami bele hatete katak Timor-Leste bele hetan independensia tinan 10 resin ona maibe Ucekai sei dauk hetan independensiq tanba sei moris iha nakukun laran,” Hateten Xefe Suku Ucekai, Antonio da Silva diskursu badak, Ucekai, Kinta (07/10).

Nune’e Iha sorin seluk, Xefe Suku Mape, Francisco Preirra, Haktuir, Komunidade iha Suku Mape iha riku soin produtu lokal barak hanesan kamii, fore rai maibe susar atu lori asesu ba iha merkadu tanba kondisaun estrada ladiak, ahi deit mos seidauk tama to'o ohin loron komunidade iha tempu kalan uza solar panel, balu sunu deit lampu tradisional no sunu kamii.

Xefe dehan, Koalia kona ba bee moos agora diak ona tanba PNDS dada ona bee ba komunidade sira. Hatan ba preokupasaun hirak ne'e, Ministru Obras Publika (MOP) Salvador Eugenio Soares dos Reis Pires, Katak, Dokumentus tenderizasaun ba dada eletrisidade ba suku Mape ho Suku Ucekai prosesu aprozionamentu konklui iha fulan ne'e nia laran, tempu badak kompañia mobiliza kompleta imi tiha eletrisidade. Ministru Obras Publika promete ba komunidade sei fo orientasaun Institu Gestaun Ekipamentu (IGE) prioriza estrada iha Mape no Ucekai bazeia ba preokupasaun populasaun nian.

“Ohin nai xefe suku hatete dehan proposta mai tiha ona iha IGE normalmentu proposta ne'e ami kada loron simu proposta ne'e barak, maibe oras ne'e daudaun IGE iha sorin hela iha parte Ainaro nian karik hau husu sira bele prioritiza imi nian atu nune'e ita boot sira bele uza hodi hala'o atividade lorloron nian,” Haktuir Obras Publika (MOP) Salvador Eugenio Soares dos Reis Pires. Ministru Salvador haktuir, Kona ba bee nia parte sei hato'o problema ne'e ba iha Ministeriu Estatal tanba ne'e PNDS ligadu ho suku, hato'o ba Bee Timor-Leste (BTL) hodi haree netik ba komunidade nia preokupasaun.

Iha biban ne'e MOP husu komunidade hotu tenke simu vasina, governu hadomi nia povu, tanba governu ukun povu laos atu uku balada fuik sira ne'ebe kuandu povu la moris, la saudavel ukun an halo saida, povu moris ona mak foin koalia kona ba buat sira ne'ebe ligadu ho ema nia moris nian. “Se ita la moris oinsa mak ita koalia kona ba ema moris nian, buat sira ne'e sei lavale hotu kedas tan ne'e ho hakraik an husu inan ho aman sira hadomi ita boot sira nia an hadomi ita boot sira nia familia hetan vasina para nune'e ita hamutuk luta ba ita nia moras diak, hanesan apa ho ama sira ejiji mai ami bele haree ida ne'e maibe imi saudavel ona ami bele haree dezenvolvimentu fiziku,” Ministru hakotu. (BT)