DÍLI----Ministeriu Edukasaun Juventude no Desportu (MEJD), Armindo Maia, ofisialmente halo lansamentu ba abertura prosesu Ensino aprendizajen prezensial iha Munisipiu Dili ne’ebé hahu husi Eskola pre-eskolar to’o Ensinu Sekundária.

“Ohin ita mai hamutuk iha ne’e atu hala’o serimonia lansamentu ba abertura prosesu ensinu aprendizajen prezensial, oinsa mak ita loke fila-fali aula prezensial, ita fila-fali ba eskola ho seguru, katak ita fila ba eskola tanba livre ona husi Covid-19,” Hateten Ministru Edukasaun Juventude no Desportu (MEJD), Armindo Maia, iha Eskola Básica Central 30 de Agusto Dili, Kuarta (06/10)

Nia hatutan, Moras Covid-19 la diak tanba hamate ema, da’et ba ema barak ne’ebé afeta ba mundu tomak, tanba ne’e mak ita deside taka provizoriu aula prezensial durante tempu naruk, mestre sira mós iha uma, ita aplika eskola ba uma maibé mestre sira haree ka lae, alunu sira mós labele asesu materia ho diak tanba pandemia Covid-19.

“Ministeriu Edukasaun Juventude no Desportu (MEJD), hafoin konsulta ho Ministeriu Saúde (MS), ita deside atu reativa prosesu aprendijazen prezensial ba eskola sira. Ohin ofisialmente abertura aula prezensial maibé eskola lubuk ida nia prosesu ensinu aprendizajen prezensial la’o kleur tiha ona, kuaze seman rua ona,” dehan nia.

Governante ne’e akresenta, Munisípiu Dili, ita fó rekejitu ida, eskola ida atu loke aula prezensial Mestre sira tenke atinje 90% simu vasina. Eskola hotu iha Munisipiu Dili profesor sira kuaze priense ona 90% maibé iha na’in rua ka tolu sidauk simu vasina, husu atu bele simu vasina hodi atinji 90% atu aselera lalais prosesu ensinu aprendizajen prezensial ba alunu sira.

Nia Salienta, La kleur tan ita-nia alunu sira ho tinan 18 mai kraik sei simu vasina ho tipu Pfizer tanba ne’e mestre sira labele lakon, mestre sira iha responsabilidade ne’ebé boot, ita iha direitu maibé ita mós iha dever para proteje a’an no proteje alunu sira. Ita lakoi atu Mestre sira mak da’et fali moras ne’e ba alunu sira, tanba ne’e mestre sira ne’ebé sidauk vasina tenke simu vasina.

“Ita espera katak, La kleur tan Governu deklara nova normalmente, ita hotu bele hala’o kna’ar ho seguru, kontente ho konfiansa katak, ita konsege ultrapasa tiha Covid-19 tanba ema hotu simu vasina. Eskola ita loke ona maibé tenke kuidadu a’an nafatin, ba alunu sira tenke kumpri protokolu saude nian hanesan fase liman, uja maskra no distansiamentu sosial,” Katk nia.

Nia Afirma, Durante tempu naruk ita-nia eskola sira la loke, agora ita loke fila-fali no la kleur tan ita realiza ezame Nasionál, tanba ne’e husu ba mestre sira atu bele simu vasina hodi bele rekopera fila-fali materia ba alunu sira. (BT)