KOVALIMA----Diretor Eskola Secundaria Geral Publiku Suai (ESGP), Francelino Freitas Carvalho, Hatete, Oras ne'e daudaun dezenvolvimentu iha eskola ESGP Suai la'o maka'as tanba hetan kontribuisaun husi inan-aman mak ESGP Suai preve osan ho montante $ 2.500 (Dolare Amerikanu rihun rua atus lima) hodi sosa ekipamentu ba instala iha sala informatika (IT) no seluk tan.

“Durante iha hau-nia mandatu ami halo rehabilitasaun ba turma rua ida ne'e kontribuisaun mai husi Inan aman, konstrui rede haleu eskola, armariu, meza, Sosa banda musika, hadia kadeira sira, Komputador 30, depois ami preve osan ne'be mai husi Inan aman hamutuk U$ 2.500 hodi sosa ekipamentus hodi instala iha sala IT, ida ne'e kontribuisaun mai husi alunus nia inan aman sira,” Hateten Diretor, Francelino Freitas Carvalho, iha ESGP Suai Kuarta (06/10).

Enkuantu, Vise-Ministru Edukasaun Juventude no Desportu (V-MEJD), Antonio Guterres apresia ba dezenvolvimentu iha Eskola Sekundaria Geral Publiku Suai (ESGP) lao diak tanba kontribuisaun husi Komunidade estudante sira nia inan aman rasik. “Lori Ministériu Edukasaun nia naran hakarak fo parabens ba eskola ida ne'e tanba iha vontade bo'ot ho voluntariu kontribui ba dezenvolvimentu Iha eskola ne'e, ida ne'e valor ida ne'ebe maka bo'ot hodi kontribui ba dezenvolvimentu edukasaun,” Haktuir Vise-Ministru Edukasaun Juventude no Desportu (V-MEJD), Antonio Guterres.

Vise MEJD husu ba profesores sira hotu atu serbisu interligadu hodi nune'e edukasaun bele sai forti liu tan iha Futuru. “Hau husu ba Professor sira hotu atu servisu hamutuk husi kraik ba leten ka ita bele dehan interligadu atu nune'e bele haforsa edukasaun sai forti liu tan,” Dehan nia.

Entertantu durante Vise MEJD hala'o programa sosializasaun desiminasaun informasaun ba kampaiña vasinasaun kontra Covid-19 iha ESGP Suai partisipa husi Diretor Edukasaun Munisipiu Kovalima, Professores sira inklui Partisipa masimu husi estudante sira iha eskola refere. Nune’e mos hafoin remata kampaiña vasinasaun kontra Covid-19 iha ESGP Vise MEJD ho nia ekipa hala'o atividades hanesan ba iha Eskola Secundaria Tekniku Vokasional Cristal Suai. (BT)