DÍLI----Governu da Ulau liu husi Ministru Finansas (MF) Rui Agusto Gomes, Hatete, Ministériu Finansas (MF) hahú realiza pagamentu iznesaun propinas ba estudante Instituto Ensinu Superiór hamutuk 18 ho valór orsamentu hamutuk Millaun $5,6.

“Ministériu Finansas (MF) realiza ona pagamentu inzesaun propinas ba estudante-sira iha Ensinu Superiór ho montante Millaun $5,6,” Dehan Ministru Finansas Rui Agusto Gomes liu husi Komunikadu Imprensa, ne’ebé mak Jornalista Bisnis Timor Asesu, Sexta (16/07).

Governante ne’e relata, Totál númeru estudante husi Ensinu Superiór ne’ebé mak hetan benefísiu hamutuk estudante 64.619 iha Instituisaun Ensinu Superiór (IES) hamutuk sanulu-resin-ualu (18) iha Timor-Leste. Entretantu, pagamentu izensaun propinas estudante IES ne’e, halo hafoin Ministériu Ensinu Superiór, Siénsia no Kultura (MESCC, sigla Portugés) konkorda hodi halo alterasaun ba Memorandu Entendimentu (MoU, sigla Inglés) ho IES sira kona-bá propinas ba estudante sira.

Nune’e, detalla IES públiku no privadu sira ne’ebé hetan pagamentu mak hanesan, Díli Institute of Technology (DIT), East Timor Coffee Institute (ETCI), Institute of Business (IOB), Instituto Boaventura Timor-Leste (IBTL) Instituto Católico Formação de Professores (ICFP), Instituto Ciências da Saúde (ICS), Institutu de Ciências Religiosas (ICR), Institutu Filosófico S. Francisco de Sales (IFFS), Institutu Politécnico de Betano (IPB), Institutu Profissionál de Canossa (IPDC), Instituto S. João de Brito (ISJB), Institutu Superiór Cristal (ISC), Institutu Superiór de Filosofia e Teológia (ISFIT), João Saldanha Institute (JSI), Universidade de Díli (UNDIL), Universidade de Paz (UNPAZ), Universidade Nacional de Timor Lorosa’e (UNTL), no Universidade Oriental Timor Lorosa’e (UNITAL).

Enkuantu, Relasiona ho subsídiu internet ba estudante Ensinu Superiór sira, MESCC seí kompleta rekezitus ba Operadór Telekomunikasaun sira, hanesan Timor Telecom (TT), Telemor no Telkomcel hodi submete fila-fali mai MF iha tempu badak nia laran, hodi verifika molok realiza pagamentu. “Iha fulan Maiu 2021, Prezidente Repúblika promulga ona Lei Orsamentu Jerál Estadu (OJE) Retifikativu, ho promulgasaun Lei OJE Retifikativu ne’e, lori mudansa iha dotasaun orsamentál lubun ida, inklui dotasaun Fundu Covid-19, ne’ebé ho montante inísiu Millaun $31, hetan ona reforsu Millaun $256,6, nune’e ninia totál hamutuk Millaun $287,6,” Esplika nia.

Tanbá mudansa iha dotasaun Fundu Covid-19 ne’e, fó biban ba Governu hodi finansia medidas sósiu-ekonómiku sira, inklui izensaun pagamentu propinas ba estudante ensinu superiór no subsídiu internet ba estudante ensinu superiór. To’o iha loron 16 Jullu 2021, Fundu Espesiál Covid-19, nia ezekusaun reál atinji ona Millaun $94,1 no 33% husi totál orsamentu alokadu Millaun $287,6. (BT)