ILIOMAR----Komunidade aldeia tolu iha Suku Tirilolo, Postu Administrativu Iliomar Munisípiu Lautém ho sira-nia inisiativa rasik rehabilita Ponte Paifaka-Veir. Tuir Xefe Suku Tirilolo, Adão Teles Ximenes liu husi Via Telefone ba Jornalista Bisiness Timor informa, Komunidade aldeia tolu iha Suku Tirilolo hamutuk ho autoridade ho inisiativa rasik rehabilita Ponte Paifaka-Veir atu oinsa komunidade no estudante sira bele asesu hodi hala’o aktividades sira area refere.

“Rehabilitasasaun Ponte Paifaka-Veir ne'e inisiativa rasik husi Autoridade Suku no Aldeia ne'ebé mak koopera komunidade husi Suku Tirilolo nian, nune'e bele fasilitas komunidade no estudante sira bele aseu hodi hala'o aktividade lor-loron nian,” hateten Xefe Suku Tirilolo, Adão Teles Ximenes liu husi Via Telefone ba Jornalista Business Timor, Sabadu (05/06).

Nia hatutan, Atu rehabilitasaun ba Ponte Paifaka-Veir, ne'e kontribuisaun husi Komunidade Aldeia tolu husi Suku Tirilolo nian, ne'ebé mak kompostu husi Aldeia Tirilolo, Etewata no Tatalari-larin. Nune’e, Rehabilitasaun Ponte Paifaka-Veir hetan mos Kontribuisaun husi kada Xefí familia, husi Suku Tirilolo nian, tuir kbi’it ne'ebé mak komunidade iha, balun $25 no $50 Sentavus, ne'ebé mak ninia estimasaun hamutuk kuaze $12 Mil. “Orsamentu ne'ebé mak kontribuisaun husi komunidade Suku Tirilolo sufienti ona, maibé ne'e ba Mota Paifaka-Veir de'it, atu harí tan Mota Ta'amatu, maibé orsamentu ne'e limitadu tebés, tanbá ne'e mak Mota Ta'amatu atu harí ona, maibé seí iha planu laran,” Esplika nia.

Entaun, Kona ba rehabilitasaun ba ponte liliu ba orsamentu garantia ba kontribuisaun ne'ebé mak husi komunidade kuaze $12 Mil, maibé ne'e ba harí de'it ba Mota Paifaka-Veir, agora Mota Ta'amatu nian seida'uk, ne'e seí planu laran, bainhira obra ne'e remata, autoridade Suku no Aldeia koopera ho Administradór Postu Iliomar seí foti desizaun, nune'e bele hari tan Mota Ta'amatu. “Obra Ponte Paifaka-Veir dau-daun ne'e atinji ona porsentu 85, ne'ebé mak iha tempu badak komunidade no estudante sira bele asesu hodi hala'o aktividade lor-loron,” Relata nia.

Ponte Paifaka-Veir hari husi tempu Indonesia ho material ne'ebé Tradisional, ne'ebé mak to'o agora ponte ne'e saí at totál, tanbá ne'e mak Autoridade Suku no Aldeia koopera ho komunidade Suku Tirilolo hodi halo kontribuisaun, nune'e harí hikas fali ponte refere, nune'e bele komunidade no estudante husi Suku Tirilolo bele asesu hodi hala'o aktividade lor-loron. Durante ne'e, Ponte Paifaka-Veir seida'uk iha rehabilitasaun, obriga komunidade no estudante Suku refere, liu husi mota laran hodi prejufika komunidade nia moris, bainhira iha tempu udan. (BT)