DILI----Diretor Jerál Empregu husi Sekretariu Estadu Formasaun Proflsional No Empregu (SEFOPE) Paulo Alves, informa, Traballadór Timoroan iha Australia hamutuk na’in-260 mak husu ona vistu protesaun ho numeru-408, entaun SEFOPE mos preokupa, SEFOPE informa kedan ba Embaixada Austrália iha Timor-Leste, maibé iha Austrália rasik ema sira dehan ba SEFOPE katak maske traballadór sira nia vistu mate maibé sira hetan protesaun nafatin.

Nune’e, SEFOPE manda ona karta ida ba Sala Situasaun-Sentru Integradu Jestaun Krize (SS-CIGC, sigla portugés) hodi husu autorizasaun repatria traballadór timoroan iha Austrália. “Traballador Timoroan iha Australia polisia no imigrasaun labele kaer sira, SEFOPE husu ba traballador timoroan iha Austrália atu ida-idak kansela vistu protesaun ne’ebé mak sira iha, tanba balun hili halo vistu protesaun hodi asegura Sira-nia a’an iha Austrália,” Hateten Diretór Jerál Empregu, Paulo Alves ba jornalista sira iha salaun SEFOPE, Kaikoli-Díli, Kuarta (12/05).

Nia hatutan, Traballador Timoroan iha Australia Sira-nia kontratu remata ona, tanba ne’e SEFOPE halo aprosimasaun ho familia iha Timor hodi kontaktu direta traballadór sira hodi kansela vistu protesaun, hodi nune’e sira bele fila ona mai, maibé durante ne’e sira la halo no labele fila.

Nia informa, Kona-ba kestaun ne’e SEFOPE antisipa ona bainhira kontratu remata, fasilita traballadór sira hodi labele halai ses hosi sistema tanba SEFOPE mos antisipa atu problema labele akontese tan ba traballadór seasonal Worlker sira, mak komunika ona ba Governu Austrália atu halo repatriasaun traballadór timoroan hamutuk-100 iha tempu badak.

“Sira serbisu iha Tasmánia no maioria kontratu remata ona, tuir loloos sira mai ona Timór maibé tanba situasaun Estadu Emerjénsia no Serka Sanitaria ne’ebé laiha voo komersiál, tanba ne’e ita halo komunikasaun ho Departement of Home Affair no Embaixada Austrália iha Timor-Leste, katak Austrália sei oferese kustu balun hodi apoia ita-nia traballadór iha ne’eba, liu-liu kona-ba kestaun kuarentena iha Darwin,” dehan nia

Iha fatin seluk, Sekretariu Estadu Formasaun Proflsionál no Empregu (SEFOPE), Alarico do Rosario haktuir katak, SEFOPE halo ona karta ba Sala Situasaun-Sentru Integradu Jestaun Krize (SS-CIGC, sigla portugés) hodi husu autorizasaun repatria traballadór timoroan iha Austrália. “Ohin ha’u asina tan karta ida atu haruka ba Sala Situasaun atu aprova ita-nia alin sira mai Timor tanba sira-nia kontratu hotu ona iha Australia,” Informa Serkretáriu Alarico. (BT)