DÍLI----Vise-Primeiru Ministru (V-PM) No Ministru Planu no Ordenamentu (MPO) José Reis relata, Dau-daun ne'e dezeñu ponte Bekussi finaliza ona hodi submete ba Ajensia Dezenvolvimentu Nasionál (ADN) hodi prosesu verifikasaun atu hala'o konstrusaun.

“Kona-bá Ponte Bekussi nian, hala'o ona ninia dezeñu, ne'ebé mak sira seí lori ba iha ADN, nune'e bele hare Dezeñu, tanbá ita presiza mak dezeñu nune'e bele sobu ponte, ita labele sobu uluk no laiha asesu ba populasaun,” Dehan Ministru Planu no Ordenamentu (MPO) hafoin remata enkontru iha Salaun Ministériu Finansas (MF) Ai-Tarak Laran, Díli, Segunda (03/05).

Governante ne'e esplika, tempu ba halo dezeñu remata ona, agora tama hela prosesu verifikasaun, no sira seí lori tama ba iha ADN nune'e bele halo verifikasaun no atu tama ona ba iha konstrusaun. Nune’e, kontrusaun estrada ba iha estrada pantai-kelapa Embaixada Japaun nia oin, ne'e Diretór Jerál Obra Públika ninia avaliasaun dentru de fulan ida ne'e bele finaliza ona.

“Agora ita nia prosesu, tanbá foin dau-daun ami mós iha KAFI enkontru ona prinsipalmente iha Díli ne'e ita pakote 8 ne'ebé mak atu hala'o, inklui Bekussi mak atu hala'o no ekipa seí tun, hodi halo konfirmasaun fila-fali kona-bá situasuan ne'ebé mak ita nia populasaun sira infrenta iha terenu,” Esplika nia.

Alende ne'e mós, relatóriu ida mai husi Ministériu Obra Públika, ne'ebé mak hato'o ona, maibé sira nia ekipa tun ona ba terenu hodi halo konfirmasaun kona-bá dadús, maizomenus dadús sira ne'ebé mak halo levantamentu kuaze $300 miloens ba iha rekoperasaun estrada ponte no edifisiu públiku nian.

Enkuantu, Ministériu Administrasaun Estatal laiha partisipasaun ba reuniaun ida ne'e, ne'ebé mak seí tur hamutuk ho Ministru Administrasaun Estatal nune'e atu diskuti klean ba asuntu ida ne'e, oinsá bele fó solusaun ba problema ne'ebé mak populasaun sira infrenta. 

Nia dehan, Iha enkontru ida ne'e relata kona-bá servisu nia progresu sira ne'ebé mak ohin hala'o ona, ikus liu ami tur hamutuk mós oinsá atu bele hare mós problema ne'ebé mak imediata atu bele hala'o. “Ho ida ne'e, Primeiru Ministru mós akompañia reuniaun ida ne'e kona-bá progresu servisu nian ne'ebé mak husi ekipa ne'ebé mak hari husi Primeiru Ministru ne'ebé mak diriji husi Diretór Jerál husi Obras Públiku nia servisu,” Informa nia. (BT)