DÍLI----Porta-voz Movimentu Popular Ba Libertasaun Maubere (MPLM) Guerson Ribeiro Hatete MPM husu ba VIII Governu konstituisionál atu bele aselera lalais orsamentu reatifikativu Jerál do Estadu (OJE) 2021 hodi bele fó apoiu emerjensia ba vitima sira ne’ebé mak infrenta iha situasaun kalamidade Corona Virus Desease 2019 (COVID-19) nomos inundasaun tanba konserteza hamosu populasaun barak lakon uma no sasan, balun hamlaha no sel-seluk tan iha territoriu laran tomak inklui balun lakon vida.

Nune’e, Ezekutasaun Orsamentu Jerál ne’e hodi fó ba refuziadus sira iha Díli laran inklui munisipiu, atu nune’e, populasaun sira bele reabilita fali ninia uma no balun uza hodi hatán ba nesidade familiar ninian. “Ami husu governu atu aselera lais ezekusaun OJE 2021 laos alterasaun ba OJE bebeik hodi fo apoiu imediatu ba komunidade hotu ne’ebe hetan afeita husi inundasaun iha Dili nomós munisipiu,” Dehan Porta voz MPLM, Guerson Ribeiro ba Jornalsita sira, iha Ai-tarak laran, Kinta (29/04).

Nia hatutan, MPLM husu halo ezekusaun lalais ba OJE laos diskusaun no alterasaun bebeik, atu bele halo intervensaun imediatu husi entidade principal no relevantes ba rekonstrusaun no rehabilitasaun infraestrutura publiku hanesan bee, eletrisidade, ponte no dalan iha Timor laran tomak. Entretantu, Timoroan lakon ona nia ema nain-tolu tanba moras Covid-19 ne’e no tuir ami-nia hare’e, ema ne’ebe mate, mesak ho moras komplikadu, idade no malnutrisaun, maibé em jerál, ema-kiak mak sai vitima liu ba Covid-19 ne’e.

MPLM konsidera Sem apoiu ou programa sosial imediatu sira ba ema kiak, ba saude no bem-star ema nian, ferik-katuas, ema ho malnutrisaun mak bele sai vitima barak liu ba Covid-19 iha Timor. Timoroan nain-ida mos konfirmadu oho-an tanba kauza hamlaha iha periodu Serka Sanitaria. primeira vez iha istoria Timor nian durante periodu Covid-19 ne’e hatudu katak, ema mate tanba hamlaha, maske hahan iha empreza privadu no armajem estadu sei iha no barak tebes maibe Governu atual pratika politika fase-liman atu fo apoiu imediatu no tempu naruk ba.

“Ami haree katak, partidu FRETILIN, PLP ho KHUNTO halo asaun karidade falsu no halao karidade falsu ne’e iha ida-idak nia partidu, duke lidera governu atu fo apoiu konkretu no garante atu fo apoiu ba familia ne’ebe nia uma lakon no estragus total tamba inundasaun foin lalais dezigualdade sosial ne’ebé buras iha Timor durante ne’e, tanba iha ema kiak no ema riku i ami hare’e katak ema kiak deit mak sai vitima liu ba inundasaun, no Covid-19.

Laos deit mate tamba inundasaun, maibe sofrimentu tomak lori husi medidas estadu nian kontra Covid-19 no ba inundasaun. Ami observa katak, laiha ema riku, ou ema-boot nia familia mak hela iha kampo evakuasaun ou refujiadu,” Kestiona Porta-voz MPLM. Movimentu Popular Ba Libertasaun Maubere ho firme hodi dehan katak, atu povu ne’e moris ho diak, progresu no hakmatek, ita hotu tenki radikalmente evalua no muda politika dezenvolvimentu ne’ebe kria dezigualdade sosial, ne’ebe mak destrui liu tan ekolojia, ne’ebe mak haterus ema barak no benefisia deit ema oitoan, ne’ebe habokur empreza privadu duke povu servisu-nain.

Alende, pratika ne’ebe benefisia empreza privadu ne’ebe destroi deit ekolojia. Ami ho pozisaun firme, kontra tebes pratika injustu no ladiak sira durante ne’e. Sem mudansa iha politika maka, luta ba libertasaun povu nudar slogan mamuk de’ it. “Hakarak ezizi Timoroan nia direitu nudar sidadaun ne’ebe tenki moris diak no hetan protesaun husi estadu. Tan ne’e ami ezizi estadu hodi atua, iha tempu hirak mai atu iha planu no asaun konkretu hodi ezekuta programa realokasaun sosiedade no reintegra ba area ka bairo foun neebe adeakuadu atu moris no dok husi risku dezastre naturais,” Relata nia. (BT)